Meng palak tangin gheih ngak saong thau cambaih gah thủ công mỹ nghệ, bahrau ini, Nguyễn Phúc Sang, sinh viên thun ka 1 sang bac Đại học Kinh tế - Tài chính bal raya Hồ Chí Minh ngak ka rilo manuac takre tuk mbang akaok meti meyaih khan baoh nduan du lịch meng xơ dừa. Xơ dừa mbuan duah, lap jien, ngak jeng pandap siam ka môi trường saong yaom jien ngak biar nan lac dom siam lagaih di janih nduan biak karei ini. Mỹ Dung, urang vak di rayo sap ndom Việt Nam daok di bal raya Hồ Chí Minh hu kadha vak brei thau ka hatai sahneng ngak mbang bahrau meng xơ dừa di urang sinh viên ini.

Tabiak rai dalam sa baoh sang hu labaih 30 thun ngak pandap thủ công mỹ nghệ pak tỉnh Bến Tre, meng sit, Nguyễn Phúc Sang brei mboh ka hatai takre di drei dalam bruk ngak ini. Bahrau ini, dalam sa mbang daong amaik ame ngak xơ dừa ép ly pandar piah pala bingu lan, Sang ngak laik ly trun haluk. Baoh ly úp trun ngak ka Sang saneng tal baoh nduan du lịch rộng vành. Tuk nan, urang sinh viên thun ka 1 ini hu mboh dalam akaok sahneng bruk ngak tabiak baoh nduan meng xơ dừa.

Pak Bến Tre, xơ dừa yaom biak lap kayua tok pandar ngak pandap cuh atau pablei tabiak negar langiu tui dạng thô. Meng dự án ini, xơ dừa hu xử lý siam gheih piah ngak jeng pandap ba jien tame glaong, saong daok hu daong pasiam môi trường ka bhap bani labik ini. Meng tuk sahneng mboh tal tuk ngak hu pandap akaok mereip, Sang abih biak ralo tukvak ka bruk thiết kế, palih ruah khuôn saong ngak hỗn hợp keo pambuak pagam. Tui urang sinh viên palei la-u Nguyễn Phúc Sang, bruk duah tabiak công thức ngak keo ba tal jak jeng ka bruk ngak tabiak nduan: “Xơ dừa  kan gam gauk. Nan ye bruk praong lac ngak keo habar ka xơ dừa nyu  gam gauk bo oh biến dạng saong oh ngak kandah ka urang tuak. Adei hu công thức ngak keo karei piah tuk ép xơ dừa haong hỗn hợp keo adei ngak ye  tram aia dom tuk jeng oh njauk khut, oh biến dạng hagait.”.

Oh lac ngak pandap piah pablei, kadha bo Sang daok pamong tal nan lac meyaih khan rup binguk puk palei tal tuai du lịch. Urang sinh viên ini hu padang sa jalan ngak biak cambaih laih piah pachreih darak pasar dalam negar, yam tal pablei nduan tabiak negar langiu dalam tukvak anak tal. Meng hatai sahneng gheih saong jalan ngak mbang bahrau, meng blaoh, dự án “Nduan du lịch ngak meng xơ dừa” di sinh viên Nguyễn Phúc Sang meblah hu labik dang akaok dalam mbang pakacah “Ý tưởng kinh doanh” kayua sang bac Đại học Kinh tế - Tài chính Bal raya Hồ Chí Minh peih ngak. Tiến sĩ Nhan Cẩm Trí, Phaok akaok  Khoa Quản trị kinh doanh sang bac, urang dalam mBan peih mbang pakacah ndom lac: mai meng bruk pandar hu nguồn nguyên liệu lap jien, siam ka môi trường meda daong ka pandap meriak gauk khang: “Janih nduan ini angaok darak pasar oh ka hu nan ye nyu lac janih biak karei. Tapa pathau khan di ayut Sang, dahlak mboh lac jien piah ngak jeng sa baoh nduan yau nan lac hu min. Ini lac sa dự án meda peih ngak hu siam”.

        Pak di mbang pakacah “Ý tưởng kinh doanh”, dự án di Nguyễn Phúc Sang taduan mek hu ralo panduac daa daong brei meng 4 doanh nghiệp di ban raya Hồ Chí Minh. Taong yaom bruk sáng tạo saong bruk meda ngak hu di dự án, ong Trần Hữu Đoàn, Tổng Giám đốc Công ty cổ phần Kỹ nghệ thực phẩm Việt Sin tabiak bruk daong brei ka urang sinh viên ini tui jalantacei pato patagok dự án saong đầu tư paglaong chất lượng pandap. Ong Trần Hữu Đoàn lac:“Đề tài ini daok biak thô sơ oh ka ngak jeng quy trình chuẩn. Ini tok bahrau lac hatai saneng di adei ngan haong pandap tuk akaok mereip. Kayua yau nan ye adei njauk hu bruk daong ba di dom doanh nghiệp piah ngak tabiak pandpa panda ngan haong mẫu mã siam jang saong yam tal patagok parilo jang mẫu mã karei tra.”

        Nguyễn Phúc Sang daok kham merat ngak ka nyu salah khuôn nduan piah hiện đại hóa quy trình ngak tabiak jeng yau patagok jang ralo mẫu mã, janih pandap piah samar ba pandap tabiak darak pasar. Likei sinh viên ini daok hu mbaok tame sa mbang pakacah khởi nghiệp kayua bal raya Hồ Chí Minh peih tabiak ngak haong hatai caong khin pambak praong jalan ngak mbang bahrau di drei saong duah bruk daong ba meng dom doanh nghiệp. Meng dom xơ dừa thu lagu, klaak saoh - Sang hu ngak jeng sa janih pandap hu yaom glaong, ndung bak ilamo palei la-u. Yaom lac jalan nao daok atah gah anak min adei tuk halei jeng jia lac janih pandap biak karei di drei meda hu urang chreih hatai blei pandar./.