Salih barau xa bhum bhapbini bangsa Khmer

          Hadei di 5 thun padang ngak palei pala barau, xã Bàn Thạch, huyện Giồng Riềng (tinh Kiên Giang) hu rilo salih barau. Jalan mbak nao mai hu peih praong, raidiuk di bhapbini dak harei dak glaong; sang kathaot dak harei dak takik.

      Bàn Thạch lac xa hu rilo bhapbini bangsa Khmer daok, meblah jaik 60% menuac sia dalam xa, daok dalam danakdak 135 di Thủ tướng rajaei. Hadei di 5 thun peih bruk padang ngak palei pala barau, Bàn Thạch hu rilo salih bahrau, dalam nan njauk ndom tal bruk ngak jalan mbak.

Tui jalan ngak lac “ karja saong bhapbini gam ngak”, dalam 5 thun tapa, gam saong jien dau tu di karja, xa hu jakba bhapbini buh jien tame ngak siam 11 km jalan nao mai dalam xã; ngak barau labaih 35 km jalan palei saong dom canah jalan pambuak dom phum sóc nao mai mbuan lagaih yaom lac bilan hajan.

       Tui ông Trần Văn Nhì, Phó akaok uy mban bhapbini xã Bàn Thạch, tuk taduan mek dom sarak di rajaei, Đảng ủy tacei pato uy mban bhapbini xã brei padang mban tacei pato pasang iek danakdak saong ba tabiak tal dom kapul nyaom xã, ấp saong bhapbini. Tapa nan, hu bhapbini pachreih tui, abih di nyu nan lac danakdak 134, 135...Dom danakdak ini lac jalan ngak njauk, njauk hatai bhapbini, brei mboh bruk sangka di Đảng, karja ka puk palei daok rilo kan kandah, abih di nyu nan lac puk palei hu rilo bhapbini bangsa yau Bàn Thạch. Tal urak ini, hu 96% dom sang dalam xã hu radaih nao mai, hu radio piah pang, hu tivi piah maong iek, hu labaih 90%  sang hu pandar menyek, pandar  ia hacih. Tapa nan paglaong jien mek tame di bhapbini, meng 11,2 triệu đồng thun 2010 tagok jaik 30 triệu đồng/sa urang sa thun urak ini. Baoh sang kathaot thun 2010 lac 18,38%, urak ini daok labaih 8%. 

        Ông Danh Cường, daok di ấp Láng Sen brei thau, dahlau daih jalan nao mai gluh baok, anek bhik nao bac biak glaih glan, urak ini jalan nao mai hu tuh menyek nao tal yaokpuk  palei, ba mbuan lagaih ka anek kemuan nao bac. Taphia nan daok peih tabiak jalan ka mikva pablei salih, daong ka bhapbini patruh kathaot yam tagok kaya meda.

       Daok ong Danh Tý, daok di ấp Cây Trôm brei thau, dahlau diah, ông hu  2.000 m2 taneh, min klak saoh blaoh nao ngak pah duah mbang. Hadei di tuk peih bruk padang ngak palei pala barau, hu urang jakar xã mai tacei pato jah tak bein tạp, pala njam patam ye : tamun ia, baoh paya, xà lách, nyam pahe…hu jien mek tame luac thun saong hu patruh kathaot.

          Tapa 5 thun padang ngak palei pala barau, pambuak pagam saong dom danakdak sarak karei, raidiuk mbang ngui daok dang di bhapbini bangsa Khmer di Bàn Thạch hu salih barau mboh di anak meta. Thun 2014, Bàn Thạch hu tabiak truh angan xã kan kandah tui danakdak 135./.