Pathau mikva urang nông: Dom kein laba tuk camereip di bruk salih janih phun pala di Ninh Thuận brei mboh ini lac jalan ngak njauk ba mai kein laba saong jien mek tame ka urang nông dalam tuk pandiak bhang. Di Ninh Thuận, hu 4 janih phun pala lagaih saong pandiak bhang hu palih ruah nan lac ratak naih, tangei saong hareik. Thun 2016, phun ratak naih hu iek lac phun pala praong dalam bruk salih janih phun pala, jaik 1 ribau ha dalam abih tih 1.377 ha.

Min piah ka dom janih phun pala ini, lac phun pala praong di bhum pandiak bhang ye bruk blei abih pandap saong tacei ilamu kỹ thuật ka mikva urang nông lac biak praong. Ndom meyai saong urang vak di rayo sap ndom VN, ong Phan Đình Thịnh, akaok Jabat Khoa học công nghệ-Sở ngak nông saong patagok palei pala tỉnh Ninh Thuận brei thau:

 “Jalan ngak di tỉnh salih janih phun pala lac ba mai kein laba ka urang nông. Salih yau habar brei mek hu dom bruk, ka sa lac brei hu jien mek tame, glaong jang ngak padai. Ka dua lac kaya nông ngak tabiak brei pablei hu ye bruk salih janih phun pala meng jak jeng hu. Danak dak salih janih phun pala brei ka dom doanh nghiệp, dom gah pabak pajaih. Saong dalam tukvak palih ruah nan, ye vụ đông xuân 2016 phun ratak naih ba mai kein laba. Tuk pala ratak naih ye hu dom doanh nghiệp urang pabak pajaih. Hadei di nan, urang mbaoh tangin tame blei taong abih ratak pala hu. Saong urak ini, bruk blei nan daok rah tabiak siam, blei taong abih ratak naih di urang nông tui yaom urak ini lac 25 ribau sa kg ye urang nông hu jien mek tame meng 14 tal 15 tire65u đồng sa ha, duk saong ngak padai ye kein laba di ratak naih glaong jang dua mbang”.

Urang vak: Kadha praong nan lac ba ilamu kỹ thuật tame piah paglaong năng suất, patakik halak halin. Gam saong bruk salih janih phun pala yau nan, drei hu sangka daong bhap bini ba ilamu tame pala halei oh?

 “Tỉnh Ninh Thuận lac sa tỉnh pandiak bhang,  oh lac dalam thun 2016 bo anak tal jeng kurang. Kayua yau nan ye brei pathau khan ka bhap bini thau tukvak salih janih phun pala. Ini lac bruk di taong abih hệ thống chính trị taphia bruk ieu dom doanh nghiệp tame pambuak bruk, pataom blei bloh dom jabat chuyên môn gah ngak nông jeng tame bruk piah tacei pato ilamu kỹ thuật, tacei jalan pacang cakak halak halin saong daong bhap bini dalam bruk liên kết, pambuak bruk pablei kaya nông. Saong janih phun halei lagaih saong taneh halei ye gah chuyên môn brei tame daong ka bhap bini”.

Nhạc ngắn

Urang vak: Yau urak ini, taneh drei salih pala jeng oh praong ralo,ye 1, 2, 3 doanh nghiệp meda blei hu taong abih kaya nong mikva pala hu. Min meyah drei peih praong taneh, drei hu pamaong tal doanh nghiệp halei, di khu vực halei? 

 “Oh lac dom doanh nghiệp dalam tỉnh bo urak ini daok ieu dom doanh nghiệp di ban raya HCM, dom tỉnh jaik taphia piah urang tame Ninh Thuận hu mbaok tame bruk ini. Langiu phun ratak naih, phun lange, hareik raong glang anak tal gah ngak nong jeng brei peih praong ralo. Anak tal, rilo doanh nghiệp tame ini  padang ngak dom trang trại raong glang saong urang daok caong blei phun cọ ka urang nông./.