Pathau mikva urang ngak nong: Anak bruk tua riya pandiak bang dui atah, karja saong bhap bani Ninh Thuận hu  duah ralo jalan ngak piah pacang caga, grap tanat rai diuk. Dalam nan, salih janih phun pala lac sa dalam dom jalan ngak daok ba mai ralo kein laba:

     Tui bruk salih 1.200 ha taneh ngak padai tapa phun pala angaok thu bilan Đông – Xuân 2016, hu 3 janih phun pala hu urang nong tỉnh Ninh Thuận ba tame pala nan lac tangeiy, ratak naih saong hareik brei ka athur mbang. Dalam nan, phun rarak naih hu mikva  pala ralo saong ba mai kein laba glaong dalam tuk tua riya pandiak bhang urak ini.

Daok dalam bhum hu ia di binek Phước Trung, min mboh ngak padai oh siam dalam tuk langik pandiak bhang, bilan Đông – Xuân 2016, sa-ai Cao Vắc daok pak palei Mĩ Hiệp, xã Mĩ Sơn, huyện Ninh Sơn hu salih 3 sào taneh ngak padai tapa pala ratak naih tui jalan thâm canh. Mbang akaok mereip sang sa-ai Vắc paik hu labaih 3 tạ asal ratak naih, urak ini sang sa-ai daok paik mbang ka 2, tui kuhria hu 60 kg sa sào. Meng yaom pablei 23.000-25.000 đồng sa kg tui  janih, 3 sào ratak naih sa-ai Vắc mek hu jaik 10 triệu đồng. Thun ini, kayua kurang ia vụ ini 1 sào jeng hu 1 tạ meteh ratak naih, meyah ginup aia ye hu 2 tạ sa sào, meda lac ngak padai hu sa tấn jeng lah 2 tạ ratak.

       Di xã Nhị Hà, huyện Thuận Nam, bruk salih labaih 40ha taneh padai tapa pala ratak naih dalam vụ Đông – Xuân hu ba jien tame biak ralo ka urang nong. Ini lac mbang akaok mereip salih tapa pala ratak naih nan ye mikva daok ngak tui jalan quảng canh, oh ka pandar ilamu kỹ thuật, min năng suất jeng mek hu labaih 1 tạ sa sào. Amuk Võ Như Sơn, akaok Ủy ban bhap bani xã Nhị Hà – huyện Thuận Nam-tỉnh Ninh Thuận brei thau: Tal tukvak ini bhum salih phun pala năng suất jeng oh ka glaong ralo min jeng langyah hu bruk ngak mbang anak meta dalam tukvak pandiak bhang. Jeng caong khin hadei ini đơn vị daong ilamu kỹ thuật ka puk pale piah mikva pala phun ratak naih hu kein laba glaong, pambak prong bruk pala phun ratak naih angaok taneh padai.

       Tui ong Trần Quốc Nam, Phaok akaok UB bhap bani tỉnh Ninh Thuận, kein laba tuk akaok mereip di bruk salih taneh ngak padai tapa pala ratak naih di dom puk palei brei mboh: ini lac janih phun tamuh siam dalam pandiak bhang  saong mbuan mong iek. Meyah pandar ilamu kỹ thuật phun ratak naih meda mek hu năng suất 2,8 tạ sa sào. Taphia di nan ratak naih hu darak pasar tani tanat. Kayua nan ye, bruk salih taneh ngak padai tapa pala ratak naih dalam vụ Đông – Xuân mboh lagaih haong  langik tasik saong darak pasar. Ini lac vụ akaok mereip mikva urang nong salih phun pala tui jalan tamuh siam dalam pandiak bhang, abih takik aia saong tuk akaok mereip ba mai hatai saneng biak glaong ka bhap bani. Meng dom siam lagaih tuk akaok mereip yau ini, dalam dom mùa vụ anak tal khaol dahlak pataom tame tacei pato mikva ngak tui saong salih janih phun pala tamuh siam dalam pandiak bhang, kein laba, năng suất hadei ini meda tagok.

     Pandiak bhang jeng daok rah tabiak khang dalam vụ Hè – thu, kayua yau nan ye, dom puk palei di tỉnh Ninh Thuận daok kuhria bruk pabak ia pruh ka yaok bhum saong quỹ taneh ka yaok janih phun pala piah patrun bruk klaak taneh balau./.