Tame dom palei urang bangsa Mông di melam ia bulan hadah, harei roya, harei tết atau harei nyaom darak, meda hu pang sap sáo talak yuh tagok mehit tapa mbon ceik. Dom urang likei dam bangsa Mông tuk nao halei bhian ba tui talak yau sa urang ayut nao jalan, brei thau hatung hatai di drei ngan saong urang kumei bo drei caik hatai anit ranam.

Sa-ai Sùng A Phông takre sap talak meng tuk daok sit. Takre sap talak Mông, sa-ai megru yuk saong megru ngak talak. Urak ini, sa-ai lac urang yuk talak bingi pang di abih dalam xã Làng Chếu. Jeng meng sap talak nan bo dahlau daih sa-ai Phông ngak laman hatai rilo kumei dara. Sa-ai lac: “Dahlau diah, kayua thau yuk talak nan ye dahlak hu biak rilo kumei dara tui, duah hu diuk. Talak piah brei thau hatung hatai anit ranam meng atah, tuk kumei dara oh ka mboh mbaok drei. Drei yuk talak  ayut kumei thau lac drei mai. Mehit sap talak kumei dara tabiak raok”.

Ong Giàng Seo Gà  daok di xã Hầu Thào, huyện Sa Pa, tỉnh Lào Cai, brei thau: “Urang Mông biak melau oh ndom tapak lac sa-ai ranam adei atau adei anit sa-ai, urang nyim sap talak piah meyai saong gauk. Di kreh melam joa, urang likei dam bhian puac that saong ayut dara meng sap talak di drei.”