Tuk glai khộp Buôn Đôn salih hala, dom mblang hareik hadah tagok sambo màu kanyik katam, jeng lac tuk mikva dom bangsa buôn Ea Mar, xã bhum tapen negar Krông Na tame thun bahrau. Thun bahrau ini , amuk  H’A Ly Ê’Ban, bangsa Ê Đê, daok di buôn Ea Mar mboh bui sambai jang kayua sang amuk tabiak truh kathaot. Dalam baoh sang oh ka ngak blaoh abih, tết di H’Aly Ê Ban oh hu ralo har meneing, baoh karaoh, oh hu alak bingi, min biak chreih hatai abih urang dalam sang: Thun bahrau, bilan bahrau, yaom lac ralo takik jeng njauk hu sa Tết ka sang bui sambai brei mboh thun bahrau mai. Sang hu blei hasit har meneng baoh karaoh, nao ma-in sang adei sa-ai gauk gar,tadhau ayuh ka gauk hu ralo pren yava, ngak mbang hu ginup meda.

Ong Phạm Thanh Bình, akaok buôn Ea Mar brei thau, buôn urak ini hu 215 baoh sang ngan haong jaik 800 urang, ralo meng ngak nong, pala phun mbang baoh saong raong glang tui sang. Dom thun tapa, hu bruk sangka di Đảng saong karja, mikva dom bangsa takik kham merat ngak mbang, patagok kinh tế. Abih di nyu nan lac, dalam tuk tết, bhap bani dalam buôn taduan hu bruk daong di dom urang ngak pahla saong bộ đội biên phòng daok pak nan. Tuk tết nguyên đán hu bộ đội mai mbang tết haong mikva saong khik caga bhum tapen negar. Tết hu peih ngak di sang cộng đồng piah mikva dalam buôn palei pataom gauk veik tadhau ayuh ka gauk bui sambao raok tết. Taphia di nan hu ralo kapul nyaom di bhum taneran saong dom doanh nghiệp mai ngak pahla brei pandap ka mikva, anek kamuan dom baoh sang kathaot, sang kan kandah.

Daok ngan saong sang ong Quyết Văn Khiêm, hadei di labaih 30 thun klaak palei Phú Thọ mai bhum taneh bahrau padang mbang angui, buôn Ea Mar ini hu jeng palei negar ka 2. Ong Khiêm brei thau, dom urang anek hu prong jeng manuac jeng urang abih, hu anek nao ngak mbang atah nan ye harei tết lac tuk piah taom gaok gauk. Hadei di sa thun ngak mbang glaih glar, harei puac thun, pataom mbaok anek bhik ginup abih, sang danaok hu puh ramik haci hacih, phun bingu mai, bingu đào hu trang trí biak hadah tanjak meng dom chùm menyek màu saong bao lì xì bhong. Dom urang dalam sang pataom gauk veik, urang ini rao hala, urang diah rao brah piah papaok  bánh chưng, pei nung. Yaom lac klaak palei lavik paje min bruk mbang tết yau palei jeng hu sang khik ramik di bhum taneh bahrau. Tết jeng dreih yau  tuk daok palei, anek bhik mai pataom gauk ginup abih, nao ngak mbang atah blaoh mai sang veik haong amaik ame ye iew lac mbang tết. Di puk palei hu ralo lễ hội ka mikva mai ma-in. Harei tết di bhum buôn palei ini hu sa harei uan raok tết nguyên đán, mbang tết haong gauk bui sambai ralo, harei nan tabiak nao sang ilamo bhap bani di buôn palei, dom cei bộ đội biên phòng blaoh dom jabat kết nghĩa peih bruk ka mikva mbang tết, blaoh cuh apui trại, daoh tamia.

       Raok tết nguyên đán, mbang tết pataom gauk nan lac tuk piah ka dom ilamu siam mekre di dom bangsa hu brei mboh cambaih laih. Amuk Nguyễn Thị Hạnh, Bí thư chi bộ buôn Ea Mar brei thau, dalam buôn hu 6 bangsa lac Mnông, Ja rai, Ê Đê, Lào, Kinh saong Mường. Dalam dom harei lễ tết, abih di nyu nan lac dalam dom bruk ngak di bhap bani, mikva dom bangsa takik jeng hu mbaok biak ralo, angui cuk khan ao meng kan di bangsa drei, gam hu mbaok tame dom bruk kapul nyaom biak chreih chrai, bui sambai. Pak buôn Ea Mar ini hu ralo bangsa adei sa-ai saong dom ilamo bangsa jeng hu khik ramik, abih di nyu lac dalam dom harei lễ, tết, harei lễ trống chiêng di bangsa yau cúng tapen aia, cúng kabo, cúng mùa màng, meda lac dom harei lễ hội ye mikva dom bangsa di puk palei hu mbaok ginup abih. Thei jeng bui sambai, bangsa halei jeng angui cuk khan ao di drei, pataom gauk veik mai hu mbaok dalam lễ hội gam haong mikva dalam buôn palei.

           Oh lac tok hu mbaok tame ngak mbang patagok kinh tế, grap tanat rai diuk, dom baoh sang urang bangsa takik meng labik karei mai   daok ba tui dom ilamo di banga drei, bhummi palei drei khik ramik saong patagok nyu angaok bhum taneh bahrau. Dalam chreih chai bui sambai di bilan xuân, dom ilamo dom bangsa yau lai tame gauk ngak jeng bilan xuân hadah tanjak bhum taneh tapen negar Tây Nguyên./.