Sa thun bahrau gilac mai angaok bhum taneh Tây Nguyên. Ini jeng lac tukvak peih ngak Adat Lisei Cơm Bul (Adat mbang akaok padai bahrau) di urang Jrai pak Gia Lai. Adat Lisei Bul di urang Jrai pak ini nan lac sa dalam adat lavik rai mai pambuak pagam haong bruk ngak mbang pala drak, tự cung tự cấp, hu bhap bani peih ngak uan raok thun bahrau tuk mùa màng hu yuak kuak blaoh. 

Hadei di sa vụ mek hu ralo baoh jeng siam mekre, padai brah bak kho,  mikva palei Yang 3, xã Ia Phí, huyện Chư Păh chreih chai piah ngak Adat Lisei bahrau piah hu padeih padei uan raok thun bahrau dalam chreih chai bui sambai saong cei sil. Kuhria caga ka van ngak adat, mikva hu pataom gauk ginup abih pak sang rông saong kuhria caga ginup abih dom janih pandap panda yau: hình nộm bak hane gai taneh, alak cần, pabui, menuk saong brah…

Dalam sang rông, van ngak adat peih tabiak dalam trang ala bruk pal akaok di taha akaok palei, urang hu brei adat pok talam salao pandap di bhap bani tagok ka “Yàng”. Hadei di tuk pok pandap blaoh, taha akaok palei hu ngak adat saong pok likau yang mebhang khik iek palei negar oh njauk bala meng langik tasik, jit ruak saong yam tapa sa thun bahrau hu ralo pren yava saong rai diuk trei sil. Dom hình nộm ndung ba hane gai taneh hadei di nan meda hu taha akaok palei ba caik pak dom cổng palei piah patuak xui rủi, dom kadha oh patuah jamo mai haong bhap bani. 

Taha Rơ Châm Luơl brei thau: “Bhap bani palei Yang 3 peih ngak adat lisei Bul piah likau po yang pacang cag khik iek palei negar oh njauk bala meng langik tasik, jit ruak, brei ka mikva dalam palei sa thun bahrau hu ralo pren yava, hu sa rai diuk trei sir, haniem phol. Adat ini hu meng lavik mai, ong akaok ong akei hu caik veik ka khaol drei. Thun halei jeng yau nan, bhap bani jeng peih ngak piah mbang uan hadei di sa mùa vụ thu hoạch blaoh”.

Dalam tukvak peih ngak adat, dalam palei thei thei jeng halar hatian ba mai alak, rilo piah rik tame dalam bruk ngak prong di palei. Hadei di tuk taha palei tamat blaoh binah lễ, rilo, alak jeng hu pok dak blaoh blai ala sang rông. Taha palei gam haong dom urang prong thun nan lac dom urang akaok mereip veih cần khai tiệc alak. Mikva dalam palei menyum alak dalam hatai bui sambai, oh phân biệt taha, ranaih, likei, kumei, meda, kathaot... Taong abih menyum haong gauk meng hatai gul pataom, sa-ai Anh Rơ Châm Yung, sa urang dam dalam palei bui sambai khan lac: “Harei ini lac harei bui abih dalam thun di palei. Taong abih manuac urang hu padeih padei kuhria caga uan raok thun bahrau saong kuhria caga ka sa mùa bahrau siam gheih jang.” 

Tây Nguyên jeng yau Gia Lai lac bhum taneh hu bein ilamo meng lavik mai, biak, phong phú. Janih siam gheih ilamo tâm linh tapa Adat Lisei Bul di urang J’rai njauk khin hu khik ramik saong patagok kayua adat cambat ini lac dang talei pambauk pagam hatai gul pataom bhap bani./.