Tiên Giang: Mek jien tỷ meng bruk pala thanh long hatai tím hồng

Thanh long hatai tím hồng lac janih thanh long barau mboh di taneh Tiền Giang. Kayua hu rilo siam lagaih jang duk saong dom janih thanh long hatai mbon, hatai bhong, pajaih phun pala ini daok hu darak pasar takre, yau nan ye sang beir pataom tame pambak praong. Saai  Lê Huy Bình, 39 thun daok di ấp Hòa Phú, xã Hòa Tịnh, huyện Chợ Gạo, tỉnh Tiền Giang biak jak jeng meng bruk pala pajaih thanh long hatai  tím hồng. Tok hadei di 3 thun, sang hu jien mek tame labaih 1 ty dong meng thanh long barau ini. Nhật trường urang vak di rayo sap ndom VN daok di bhum taneran kraong CL yaih khan ka bruk ini: 

Urak ini, labaih 1 hecta phun thanh long hatai tím hồng di saai Lê huy bình daok di ấp Hòa Phú, xã Hòa Tịnh, huyện Chợ Gạo daok tasak, caga paik baoh. Yaom lac daok tame tabung paik baoh pablei, yaom thanh long hatai mbon, hatai bhong daok trun yaom, min thanh long tím hồng jeng daok di tanut 25 rabau đồng sa kg. Daok phun pajaih pablei lac 20 rabau dong sa dhar. Duk saong yaom thanh long hatai mbon lac hatai tim hồng glaong jang 3 mbang saong glaong jang labaih 10% duk saong thanh long hatai bhong.

-Dahlau thiah, saai Lê Huy Bình kak kajap saong phun thanh long hatai mbon, blaoh salih tapa pala janih hatai bhong. Jaik ini, saai duah mboh pajaih thanh long hatai tím hồng biak karei meta meng sa urang ayut daok di tỉnh Bình Thuận, bloh saai ba mai pala iek dahlau. Tapa pasang iek mboh phun thanh long cakrok siam, baoh hu chat luong, tuk tasak sambo màu tím hồng biak kheih, yamen la-an saong takik ia…yau nan ye saai pambak praong labaih 1ha.

-Urak ini, beir thanh long tím hồng hu 3 thun, bilan paik baoh akaok mereip min saai pablei hu yaom glaong, 60 rabau đồng sa kg, jien mek tame labaih 1 tỷ đồng. Bruk pala janih phun thanh long ini jeng dreih yau thanh long hatai mbon, hatai bhong. Min, phun thanh long tím hồng hu năng suất glaong, takik halak, takik jien blei khak drak. Sa thun beir thanh long di saai Lê Huy Bình paik baoh hu 6 mbang; dalam nan hu 2 mbang njauk ngak ka phun tabiak bingu karei bilan. Ndom ka janih thanh long barau ini, saai Lê huy Bình khan lac: Pajaih ini tuk barau blei mai oh thau pajaih hagait. Mai pala mboh baoh kheih, yaom darak pasal hu, dahlak meng pambak praong tabiak pala. Baoh thanh long ini racam, yamen, pablei yaom glaong jang duk saong hatai bhong, hatai mbon. Nyu mbuan pala, takik ruak, takik khak drak. Tukvak tal, meyah mboh siam lagaih drei peih praong jang.

-Urak ini, beir thanh long tím hồng di urang likei ini hu ngak biak siam, hu jalan pruh ia tu dong grauk bein, Baoh thanh long barau tasak hu urang blei mai yar jien dahlau piah ba nao pablei tabiak taneh ia lingiu. Langiu nan, saai daok cakak dhar piah ngak pajaih pablei ka urang bhapnini jaik tabhia caong pala. Ndom kabruk ini, ông Võ Văn Xuân, akaok kapul urang nong  xã Hòa Tịnh, lac : Bruk ngak di saai Bình barau pala thanh long tím hồng lac bruk barau di puk plaei, harei dahlau pablei hu yaom glaong rilo. Tui dahlak sahaneng, duk saong thanh long dahlau daih di drei ye thanh long tím hồng hadei ini hu nang suat rilo, pablei hu yaom. Tui darak pasal , urak ini mikva takre ye hu yaom. Độ dinh dưỡng rilo, pablei hu yaom glaong lac urang jeng ngak tui, drei pachreih mikva pambak praong.

Bruk pala phun thanh long hatai tím hồng di saai Lê Huy Bình daok di ấp Hòa Phú, xã Hòa Tịnh, huyện Chợ Gạo, tỉnh Tiền Giang lac bruk barau, mboh hu siam lagaih, daong ngak brei hu rilo janih pandap kaya nong duh ka bruk blei mbang saong pablei tabiak taneh ia lingiu. Gah chuyen mon njauk daong urang likei ranaih umo ini angaok jalan ngak mbang, pandar siam dom alamu barau piah beir thanh long dak harei dak hu rilo nang suat, chat luong;  salih dom pajaih thanh long mengkan daok taha, njaom ruak, trun nang suat di puk palei./.