Bhum taneran kraong Cuu Long daok tame bilan bhang nan ye pak Cần Tho langik biak pandiak. Dalam tuk dom bein phun kayau mbang baoh thu lagu, layau hala kayua kurang aia, ye bein thanh long hatai bhong di sa-ai Tám Son daok di ấp Trường Khương B, xã Trường Xuân B, huyện Thới Lai jeng bak baoh, that hijao.

         Piah pala phun thanh long hatai bhong, Tám Son abih rilo tukvak biak cuang kandah, gleih glar. Sa-ai khan lac: sang hu 15 công taneh, ralo meng lac taneh ngak padai, daok veik jaik 3 công pala phun mbang baoh yau mận, ổi, vú sữa. Yau nan min, jien mek tame meng dom janih phun ini tok ginup mbang tapa harei. Glaih glar bo jeng daok kathaot hamiat, Tám Son sahneng duah, mboh lac bhap bini Bình Thuận, Long An, Tiền Giang… pala thanh long hatai bhong mek hu jien tame rilo nan ye nao duah blei pajaih. Akaok mereip sa-ai kaoh klaak bein phun kayau daok brei baoh piah pala 50 gheng thanh long. Hadei di nan thau lac sa ayut daok di Đồng Tháp hu pabam pajaih phun ini nan ye sa-ai likau blei tavak ba mai pala pabak 100 gheng tra. Meng tari tareng mong iek nan ye phun thanh long sa-ai pala samar cakrok angaok bhum taneh bahrau saong tok hadei di sa thun ye paik baoh pablei: “Pak ini thei jeng lac drei mahroi kayua phun daok hu baoh bo nao kaoh nyu. Yau nan drei tok pala 150 phun min bo tapa sa thun drei pablei hu 16 triệu, thun nan pablei tok 12 ribau, 15 ribau, 8 ribau, 6 ribau, 4 ribau min dut veik samu haong 5 công hamu. Meng nan drei mboh takre, blaoh kaoh abih phun piah peih prong jang, drei lam ribaong drei pala hu 200 phun tra, abih tih drei hu 350 phun”.

       Mboh lac siam laghaih, thei thau tuk taong abih dom gheng thanh long brei baoh, tal tuk paik hu yaok tấn baoh, sa-ai Tám Son oh hu labik pablei. Kayua dahlau diah, baoh takik sa-ai mbuan pablei di dom darak dalam bhum, urak ini baoh thanh long ralo nan ye oh pablei hu abih.

         Oh khin iek dom baoh thanh long hu pala tabiak meng aia meta aia huac di drei pablei lap yau brei saoh, Tám Son taih pabah mbang dom gah hữu quan daong piah ba tame pablei di dom siêu thị, min jalan nao ini jeng oh hu  jak jeng.

        Ralo malam medeih, sa-ai kham merat duah jalan ba baoh thanh long hatai bhong pablei tabiak negar langiu meng meda langyah hu bruk takik pablei hu, yaom biar. Dom harei hadei di nan Tám Son nao grauk labik, duah doanh nghiệp pablei baoh kayau tabiak negar langiu caong hu pambuak bruk blei baoh thanh long di drei. Min tuk duah hu doanh nghiệp ye gah ini caong khin baoh thanh long di sa-ai njauk ngak tui dom tiêu chuẩn kayua doanh nghiệp ba tabiak.

        Oh kadun likuk, Tám Son nao tal ralo labik bac megru ilamu ngak ka phun tabiak bingu, ndam baoh, ngak ka baoh thanh long jangaih mekre. Tapa ralo mbang oh jeng, blaoh baoh thanh long di Tám Son jeng hu doanh nghiệp pablei tabiak nagar langiu taduan blei yaom glaong jang ralo mbang dut haong yaom pablei tabiak darak pasar dalam nagar. Duah hu labik pablei, sa-ai khang hatai pasiam veik taong abih mblang taneh di sang drei piah pala thanh long. Meng 1.700 gheng thanh long oh ka brei baoh samu gauk min dua thun tapa, yaok thun sa-ai paik hu 8 mbang baoh ba jien tame jaik 3 tỉ đồng.

         Ngak mbang hu, min Tám Son oh padauk bo abih hatai pato veik ilamu, pabak phun pajaih ka dom baoh sang jaik taphia ngak tui. Ong Phạm Văn Chính daok di ấp Trường Khương A, xã Trường Xuân B, huyện Thới Lai brei thau: Ong hu 20 công taneh rilo meng lacc taneh hamu ngak padai, daok veik lac bein tạp. Yaok thun jien mek tame 3 vụ padai tok hu labaih 100 triệu đồng. Ngak tui sa-ai Tám Son, ong Chính jah klak bein tạp piah pala 300 phun thanh long hatai bhong. Tok labaih dua thun hadei, dom phun thanh long hu ba jien tame ka ong yaok mbang jaik 200 triệu đồng. Urak ini ong Chính pala pabak angaok taneh hamu jaik 3.000 phun tra saong meda blei baoh di puac thun ini. Piah hu ralo baoh thanh long pabak ka bruk pablei tabiak negar lingiu, Tám Son nao jak ba mikva urang nong dalam bhum pambuak gauk padang bhum pala thanh long hatai bhong.. Akaok mereip ong nao tal yaok baoh sang piah jak ba jeng oh njauk lac mbuan, min tuk sa-ai langyah brei thau kein laba di bruk pambuak gauk ngak piah plaih bruk ban thei thei ngak ba tal bruk mariak gauk oh khang kadang nan ye ralo urang pang tui. Urak ini, Tổ Pambuak bruk pala thanh long hatai bhong di sa-ai hu 25 sang pala jaik 20 ha thanh long hatai bhong. Dom urang dalam Tổ sanya pambuak kajap haong gauk piah klah rabha ilamu, daong bruk pala, pablei.

         Tui amuk Lê Thị Hoa – Phaok akaok Ban kinh tế Kapul urang nong bal Cần Thơ: Dalam bal urak ini hu 17 ribau hecta bein phun mbang baoh, min rilo meng pala tui jalan sit sot, oh  tani tanat labik pablei nan ye tal bilan paiak baoh bhian laik yaom, pambuk pandap. Anak tal taphia di bruk padang bhum pala phun mbang baoh duh ka bruk pablei tabiak negar langiu di xã Nhơn Nghĩa, huyện Phong Điền prong 700 ha, Cần Thơ daok brei pambak prong dom bruk ngak mbang haong gauk dreh yau sa-ai Tám Son piah daong ka urang nong yam tagok ngak meda: “Sa-ai Tám Son hu sa salih bahrau biak siam, nan lac sa-ai padang hu bruk pambuak gauk veik di dom urang nong saong abih hatai daong  dom urang oh ka thau ilamu kỹ thuật piah pala hu baoh siam jang, chất lượng jang, pabak hu hatai caong khin di darak pasa. Meng bruk pambuak gauk nan bo hu sa sản lượng thanh long prong pabak hu ka darak pasa dalam tukvak tapa ”.

       Puac kadha vak ini, likau nyim panuac ndom di sa-ai Đinh Văn Son yau sa kadha di urang nong dalam jaman mbeik drei yam tame piah kakei, piah payua tal dom urang nong karei daok having akaok dalam bruk salih janih phun pala, anek athur raong duah jalan cakrok patagok kinh tế  sang./.