Mboh pulao Phú Quý hu siam ralo lagaih piah cak rok patagok bruk rivang ma-in jirah, thun 2019, amuk Trà Thị Thanh Xuân khang hatai nao tabiak pulao piah peih ngak bruk pablei salih jitvu ndih daok. Amuk Xuân khan lac, dom thun dahlau diah, pulao Phú Quý daok kan daman min harei ini ye karei paje. 

“Tuk nan bahrau yam takai mai tal Phú Quý ye mboh yau ye daok balau, sang padeih padei, hotel ndih daok oh ka hu rilo, mboh takik baoh. Min tapi tapa sang ka mong iek mboh labik ini hu pren khang piah cak rok patagok bruk rivang ma-in jirah, yau nan ye dahlak blei taneh piah ngak hotel. Tỉnh Bình Thuận klak cak rok patagok bruk rivang ma-in jirah di ia tasik, daok Lâm Đồng ye cak rok patagok gah ceik glai. Tuk pagam saong gauk, tui dahlak saneng ye meda cak rok patagok khang jang, pambuak pagam ka bruk rivang ma-in gam hu ceik glai gam hu pulao tasik.”

Atah di ban Phan Thiết (tinh Binh Thuan klak) 56 hai ly, pulao Phú Quý hu langik tasik taneh riya alin brei thaik binguk biak siam gheih ngan haong dom mblang me-nei ia tasik gheih mekre, hu rilo ieik siam daneiy angan gam saong 3 inem mek pakat negar saong 8 inem mek pakat tỉnh. 

Di Angaok pulao hu 68 baoh hotel, sang padeih padei brei ka jirah saong jaik 100 homestay ngan haong 1.500 baoh maneng ghe ndih. Gam haong nan lac dom janih pandap panda rivang ma-in bahrau, biak pachreih pambuak pagam haong tasik, yau nan ye dom thun jaik di ini, bruk rivang ma-in jirah daok cak rok patahok khang di angaok pulao ini.

Tuai damuai tuh mai pulao rilo, kuhria rah tapa hu 150.000 mbang/thun, kuhria gam haong bhap bani di angaok pulao Phú Quý urak ini labaih 32 ribau urang, ye kadha gom điện, aia hacih piah pandar saong hareik hareim… daok jeng bruk samar drah caik hatai peih ngak. Ong Ngô Tấn Lực, urang dahlau diah ngak Phaok akaok UB Bhap bini huyen Phú Quý klak, pagap yau ini: “Baoh sang Phú Quý sit sot yau ini padang brei ka1.000 urang, urak ini padang brei ka meng 2 tal 3 ribhau urang ye mboh susah dalam hatai.”

“Bruk rivang ma-in cak rok patagok njauk nao tui ha tang piah pabak hatai jirah caong khin. Urak ini Phú Quý huac kanda rilo abih nan lac aia, pak di ini mong aia taba yau ameh patih. Tukvak masa tapa, dalau abih di nyu hu lac dalam tukvak raya Tết, hu dom mikva jeng ndom trun ndom tagok ka aia pandar oh pabak hu hatai caong khin.”

Oh lac janih hu aia taba, hatai caong khin pandar gom ndien dalam tukvak masa tabung glaong peih ngak bruk rivang ma-in jirah di angaok pulao ini jeng daok pateik geik tagok halau pabak brei gom ndien dak harei dak prong. Gam saong di nan, ndap nda janih gah ha tang vien thong pambuak pagam pulao saong taneh haluk tuk tabung glaong jeng daok susah ralo. Thieu ta Phạm Hải Dương, Akaok Viettel Binh Thuan klak, brei thau, urak ini jabat hu 2 jalan vibar piah pabak brei internet cá\ap quang bang thong prong jeng yau brei ka mang di dong nduac samar drah, pabak brei hatai caong khin pandar internet di ka bhap bani.

“Khaol dahlak jeng hu roh duah ba tabiak 3 jalan ngak piah pabak brei băng thong siam jang ka pulao Phú Quý dalam tukvak masa mai neng anak tal tui jalan cak rok patagok di rahra. Tui kuhria dalam vaktu masa jaik di abih meda pabak jang 2 jalan Viba bahrau piah ba tame pandar.”

Urak ini, peih ngak jalan ba di Ndang, Karja ka bruk ramik brei ka jabat karja saong padang ngak bruk karja dua pakat, tui nan pulao Phú Quý hu peih ngak jeng đặc khu pataom pagam veik 3 xã urak ini: hu Tam Thanh, Ngũ Phụng saong Long Hải.

Ong Lê Hồng Lợi, Akaok UB Bhap bini Dac khu Phú Quý brei thau, kuhria meng harei hu jeng Dac khu hành chính – kinh te ndih dalam tinh Lam Dong (bahrau) nan lac jalan nao bahrau, gam gam saong di nan jeng ba tabiak oh takik kan kandah tavak tave dalam tukvak masa bahrau peih ngak. Yau nan min, gam saong hatai kham merat saong ba abih pren yava, Dac khu Phú Quý daok pambuak bruk catang saong dom pakat palei pakat so gah dhan di dalam tinh piah ramik sap grap tanat peih ngak jamriak bahrau ka nyu tani tanat, mek hu ro baoh jeng siam mekre.

Cak raok patagok jalan mbak sang danaok gom ia ieu lac yau ye anek gai peih Bambang piah paglaong rai diuk brei ka bhap bani saong khik takai tuai damuai. Kayua yau nan ye, Dac khu Phú Quý meda patui veik pathau tagok tinh Lam Dong bahrau saong pakat Trung ương daong buh jien tame ngak, taphia di nan jul khang bruk ba rahra bhap bini gam ngak, jak pataom pren khang njauk adat hukum piah cak rok patagok khang kajap, dalam nan hu brei ka gah rivang ma-in jirah./.