Danak dak 8 hu peih ngak rilo bruk daong hadah krah, njauk haong bruk hu angan karei di yaok bhum palei, ba mai dom bruk salih bahrau siam makre.

Ngan haong bruk pathau khan, paglaong ilamo, dom Kalup kapul “Pan akaok ka bruk salih” saong “Kapul pathau khan di bol bhap rahra” hu jeng sa bruk pambak tabiak ilamo. Tapa dom var pataom gauk, parang iek, pathau khan tui dua sap bahsa (Sap Viet saong sap bangsa takik), dom kadha siam mekre ka bruk lakei kamei samu gauk, kanjah jhak di bruk tok diuk tok pasang tui amaik ame, tok gauk dalam but pajaih saong taong paoh dalam baoh sang hu mbang tame dalam bol bhap rahra. Mbuan mboh abih lac di palei Chùa, tinh Quang Tri atau Huổi Ho, tinh Dien Bien, bruk tok diuk tok pasang tui amaik ame saong tok gauk dalam but pajaih hu patrun rilo, rilo adei kamei hu pachreih nao bac gilac, daong atah klak bruk rabha lakei kamei. Adei Hồ Thị Bảy daok di palei Chùa, xa Hiếu Giang, Quang Tri brei thau:

“Var dakwah harei ini hu daong ka adei paglaong ilamo, jeng yau thau sangka saong ta-eng pacang khik rup drei. Thau plaih atah dom bruk kanjah jhak dalam rahra piah drei diuk rai siam mekre jang. Tapa nan ye adei jeng thau lac umo bahrau jeng dara ye bruk njauk ngak abih lac bruk bac magru, oh lac bruk cuak yut yau. Nan adei caong khin lac tapa var ini brei daong oh tok lac adei bo daok brei ka abih ayut sahabat karei”.

Ngan haong bruk daong bruk ngak, brei bruk ngak mbang duah jien, Danak dak hu jhul tagok padang dom kapul pambuak bruk, bruk brei masraiy payeng, pato pakai bruk ngak saong pambuak darak pasar pablei ndap nda ka urang kamei. Meng bruk raong glang pabui di bhum, raong pabe, pala phun jru, tal bruk jhik menyim jih dalah bhap bini atau yulit bhap bini, urang kamei hu jien mek tame tani tanat. Bruk ini oh lac daong patrun kathaot, pasiam raidiuk bo daok paglaong labik dang, sap ndom di urang kamei dalam baoh sang saong dalam bhap bini, patrun bruk pambak tame bruk ngak mbang di urang lakei.

Bruk daong urang kamei saong uranaih kan kandah: Danak dak “Amaik daong raong”, daong jien pachreih bac, daong bao hiem y te atau padang “baoh sang anit ranam” hu jeng sa labik pambak karo kajap ka dom urang kan kandah. Dom danak dak ini brei mboh bruk siam mekre, daong urang kamei saong uranaih hu kein lagaih uak drei tagok patruh kan kandah, siam mekre saong patagok.

Piah ka dom ruk daong meng Danak dak 8 patui veik patagok siam lagaih saong pambak praong grauk labik, tui amuk Nguyễn Thị Minh Hương, Phaok akaok Kapul Urang kamei Viet Nam, dom pakat kapul tuk peih ngak brei bhian taong yaom, kuhria iek veik, mek hu ilamo meng dom bruk piah thau ka bruk lagaih saong oh ka lagaih. Meng nan, ngak njauk bruk ngak saong kadha tacei ba ka yaok bruk ngak, brei kein lagaih ka bruk ngak tui saong pandar di dom bhum palei karei. Langiu di nan, brei buh jien tame pato pakai tani tanat ka ilamo pasang iek, khau tin, maong yaom saong taong yaom ka urang jakar dom pakat, njauk ndom tal lac urang jakar di labik saong saong dom kapul truyen thong di bol bhap rahra. Bruk hu mbaok tame siam mekre di bhap bini lac asal kadha hu makna ka bruk karo kajap di dom bruk. Amuk Nguyễn Thị Minh Hương brei thau veik:

“Bruk taong yaom ye khol dahlak hulin jeng mboh lac hu bruk pato tacei samu gauk meng Trung uong tal bhum palei, dom bhum palei ye jeng ngak yau Danak dak saong  hu bruk lagaih piah peih ngak bruk hu lagaih saong njauk haong bhum palei. Rilo tanut mek hu saong tapa jalan ngak saong hu dom salih bahrau siam mekre ka jalan sahaneng bruk ngak di rahra dalam nan hu lakei saong kamei, hu urang praong saong uranaih blaoh tapa nan ye jeng daong langyah dom asal kadha dalam rahra samar chip saong jhul tagok bruk lakei kamei samu gauk di bhum urang bangsa takik saong bhum ceik.

Danak dak 8 oh lac sa jalan langyah bruk anak meta bo daok lac jalan kuhria suai atah piah jhul bruk lakei kamei samu gauk, paglaong labik dang di urang kamei saong daong tame bruk patagok karo kajap di bhum urang bangsa takik saong bhum ceik. Ngan haong bruk paglaong saong peih praong dom bruk daong, dom bruk gheih di lakei kamei samu gauk brei hu pambak praong di grauk palei, daong urang kamei patagok rilo abih kein lagaih di drei, gam haong ngak ka sa harei hadei hadah hadai saong ginup meda ka taneh ia./.