Di tỉnh Bến Tre, bruk raong pabui haluk patak pataom hu mbaok teme BHXH halar hatian daok jeng “labik hadah” ka jalan dui pachreih urang ngak di labik oh  chính thức tame dalam bruk an sinh xã hội. Bruk ngak ini kayua BHXH tỉnh pambuak haong Kapul urang kamei tỉnh peih ngak meng di bilan 9/2022 saong hu pambak prong tal taong abih dom huyện, ban. Di dom xã, hu padang takik abih 1 tổ urang kamei hu mbaok tame bruk raong pabui haluk, ngan haong 10 urang/1 tổ. Yaok urang kamei meda patak pataom jien cai pandar takik abih 10.000 đồng yaok harei piah hu mbaok tame BHXH halar hatian, ngan haong tanut biar di abih yaok bilan lac 297.000 đồng; atau meda patak pataom rilo jang tui jien mek tame saong tui tanut tut angan tame BHXH halar hatian.

Tal mbang sinh hoạt di Chi hội urang kamei, yaom jien ini hu dom adei sa-ai kamei pandar piah đóng BHXH halar hatian samu haong tanut hu ba tabiak. Meyah tanut rik tame glaong ye quyền lợi taduan mek sarak BHXH di bhap bani hadei di ini jeng tagok glaong. Meng jalan ngak mbuan, lagaih yau nan, bruk raong pabui haluk hu daong ka dom hội viên hu paglaong hatai saneng tal bruk patak pataom piah hu mbaok tame BHXH halar hatian bo daok sahanang hatai jia tame harei hadei tuk taha hu sanang sanaiy meng hu jien mek tame tani tanat meng jien lương hưu saong hu pabak brei thẻ BHYT oh abih jien piah mong iek pren yava.

Rilo adei sa-ai kumei khan lac, dahlau diah daok meluk di sarak BHXH halar hatian di Đảng, Karja haong dom janih bảo hiểm pablei salih karei. Meng di tuk hu mbaok tame bruk ini, adei sa-ai thau cambaih hu kein laba, dom yaom glaong oh kayua jalan ngak kein laba, jeng yau tanut rik jien tame, jalan rik tame mbuan lagaih… di BHXH halan hatian, meng nan daok hu jak ba gauk gar hu mbok tame. Tui nan, rilo adei sa-ai kumei chreih chrai hu mbok tame BHXH halar hatian oh lac ka drei bo brei ka taong abih manuac urang dalam sang.

Sa-ai Nguyễn Thị Ro, Kapul urang kamei xã Khánh Thạnh Tân (huyện Mỏ Cày Bắc), brei thau: “Ngak tuk daok hu pren caik piah ka tuk ruak kik pandik harao nan ye urak ini di tuk daok khang kadang drei nyauk patak pataom. Yaok harei buh tabiak dom pluh ribau “raong pabui haluk” piah rik tame BHXH, jeng lac oh kan kandah hagait. Pabak veik, hadei di ini taha nao, drei hu jien bilan  saong hu thẻ BHYT di Karja kuhria ka bruk pasang iek ruak kik piah oh caik ka anek taco gaok kan kandah”.

Meng bruk pambak tabiak, ba pachreih ka bruk “Raong pabui haluk patak pataom piah blei BHXH halar hatian” di Bến Tre hu brei mboh dom jak jeng siam mekre di anak meta saong pachreih hu bruk ngak tui di biak rilo bhap bani dalam tỉnh. Tal urak ini, yaom lac tabiak mbaok oh ka tal sa thun, min bruk ngak ini hu pambak prong tal 403 tổ urang kamei saong jaik 4.300 urang, dalam nan hu  1.679 urang hu mbaok tame.

Bến Tre lac sa dalam dom puk palei dalam negar daok peih ngak saong ba pandar biak siam dom bruk ngak ini, jalan ngak hadah krah piah peih prong bruk pacang me-om BHXH, BHYT tal bhap bani. Dom bruk ngak karei yau “Tổ, kapul nyaom urang kamei patak pataom daong gauk blei thẻ BHYT” (di Thanh Hóa); “Jak ba urang kamei patak pataom blei BHYT – brei ka pren yava di baoh sang” (di Hòa Bình); “ Dhar, kapul urang kamei patak pataom blei harak BHYT – brei ka pren yava di urang kamei” (di Bình Phước)… jeng hu daong ka oh takik urang ngak daok patak pataom jien mek tem piah blei BHXH halar hatian, BHYT baoh sang piah patak pataom ka harei hadei saong mong iek pren yava.

Meda ndom lac, bruk cak rok patagok bruk ngak di dom kapul nyaom dalam cak rok patagok BHXH halar hatian, BHYT baoh sang biak prong. Tapa dom kapul nyaom, sarak BHXH, BHYT daok hu pambak prong, dak harei dak jaik taphia jang, siam lagaih jang, padang hatai jia ka urang hu mbaok tame. Piah ngak hu bruk nan, biak caong hu bruk ba tangin tame rilo jang di karja puk palei, abih di nyu lac UBND dom xã, phường, ban sit dalam bruk pathau khan, jak ba bhap bani abih hatai blei BHXH halar hatian, BHYT baoh sang piah oh caik ka urang halei tabiak truh  bruk an sinh di Đảng, Karja.