SALIH BAHRAU DI PALEI DAOK BAHRAU DI LAI CHÂU
Thứ bảy, 06:30, 04/02/2023 Urang lang: Thu Thảo Urang lang: Thu Thảo
VOV4.VOV.VN - Dom thun tapa, hu bruk daong di Karja, di urang jakar palei saong kham merat di bhap bini bo kinh tế - xã hội di dom palei daok bahrau di tỉnh Lai Châu dak harei dak hadah hadai.

Di palei daok bahrau Xám Láng, xã Nậm Khao, huyện Mường Tè, thun ini lac thun ka 9 mikva labik ini hu uan raok thun bahrau angaok bhum taneh bahrau. Meng hu Đảng, Karja buh jien tame padang ngak jalan, điện, sang bac gheih mekre, laneng lanoi saong bhap bani hu mbang tui dom dịch vụ xã hội.

Ong Lò Văn Hùng, Akaok puk Xám Láng brei thau, dalam puk hu 119 baoh sang lac bhap bani bangsa Cống saong hu 443 urang. Dahlau diah, tuk daok di puk klak (atah palei bahrau 4 km) ye mikva dalam palei biak cuang kandah, jalan mbak oh hu, nao mai kan kandah, sang bac, balai iek ruak tok hu padang ngak meng krem la-a. Baoh sang kathaot hu jaik 100%. Meng tuk tagok daok di palei bahrau, hu Karja buh jien padang ngak cơ sở vật chất khang kajap, rai diuk di bhap bani jeng hu salih tui. Sang halei jeng hu aia hacih piah pandar, nao mai mbuan laghaih jang, dom anek saih hu nao bac dalam sang bac bahrau praong, siam. Di labik daok bahrau, mikva hu nao bac bruk raong glang, pala drak, hu Kajar daong phun pala glai, pala pa-ok nan ye jien mek tame di mikva hu tagok. Urak ini, yaok baoh sang hu takik di abih jeng lac meng labaih 1 tấn padai tagok.  

Di huyện Nậm Nhùn, xã Mường Mô hu 751 baoh sang ngan haong 2.939 urang, 95% mikva lac urang bangsa Thái saong Khơ Mú. Ong Trần Anh Đôn, akaok UBND xã Mường Mô brei thau, bhap bani dalam xã jaik abih lac mai daok di labik bahrau dalam thun 2014 saong tal tukvak ini rai diuk di mikva hu  tani tanat jang, siam mekre jang labik daok klak biak rilo. Dom baoh sang hu padang ngak khang kajap, gheih mekre njauk haong tiêu chí 3 khang. Jalan mbak nao mai hu tuh bê tông laneng lanoi, hacih sa-at. Sang bac, quán mbang atah di labik daok oh atah, biak mbuan laghaih ka bruk pablei salih.

Tui bruk ba bhap bani nao daok di labik karei di Karja, ngak njauk tui tukvak ba tabiak, huyện Nậm Nhùn hu padang MBan Tacei pato ba bhap bani nao daok di labik daok bahrau saong rami ramik srap gap  tani tanat labik daok; peih ngak sarak daong ka dom urang hu brei nao daok di labik daok bahrau, sangka buh jien tame ngak cơ sở hạ tầng ka nyu samu gauk.  

Piah hu bruk pachreih tui di bhap bani, huyện patagok bruk pathau khan dom jalan ngak, dom sarak di Đảng saong Karja ka bruk rami ramik veik labik daok bahrau ka bhap bani tal taong abih manuac sia tui rilo jalan ngak yau: peih nyaom biai, ginum biai haong bhap bani, tapa dom loa papar sap oh hu talei. Meng nan, daong ka bhap bani thau cambaih jang saong halar hatian mai daok di labik bahrau.  

Tal harei ini, jaik abih dom baoh sang dalam huyện Nậm Nhùn hu brei nao daok di labik daok bahrau hu rai diuk tani tanat jang labik daok klak, hu ginup pandap panda piah pala drak, raong glang; hu sang daok khang kajap jang labik klak, điện, jalan, sang bac, balai iek ruak, aia hacih piah pandar, aia pala drak, sang ilamo… hu padang ngak samu gauk, pabak hu hatai caong khin ka bruk nao mai, ngak mbang pala drak saong mbang angui daok dang di bhap bani. Dom sarak daong ngak mbang pala drak hu sangka peih ngak, pabak hatai caong khin di bhap bani. Meng nan, paglaong hu rai diuk ka bhap bani di labik daok bahrau, peih tabiak jalan piah patruh eik patrun kathaot bhum bhap bini bangsa takik saong padang ngak palei pala bahrau.

Peih bruk ba bhap bani daok di dom labik ngak công trình thủy điện, labaih 9.000 sang bhap bani dom bangsa takik di tỉnh Lai Châu njauk nao daok di labik daok bahrau, caik taneh veik ka binek kavei saong dom công trình thủy điện. Tukvak 2016 - 2020, Lai Châu hu buh tabiak 2.850 tỷ đồng padang ngak cơ sở hạ tầng di dom labik daok bahrau saong daong, ba-yar jien veik ka dom sang bhap bini.

Meng hu danak dak ba bhap bani nao daok di labik daok bahrau, taong abih dom palei daok bahrau dalam tỉnh Lai Châu jeng hu buh jien tame ngak samu gauk gah cơ sở hạ tầng, tui nan taong abih dom palei hu jalan ô tô atau radaih mac nao tal palei hu ngak khang kajap, taong abih dom baoh sang hu pandar điện negar. Gam haong nan, mikva bhap bani jeng oh padeih peih prong mblang taneh ngak padai aia saong raong glang, taong mek kaya ikan dalam aia, peih tabiak jalan cakrok patagok bruk ngak mbang kinh tế bahrau. Meng nan, rai diuk di bhap bani labik daok bahrau hu rilo hadah hadai, ba jalan piah peih ngak siam danak dak pakat negar trun kathaot khang kajap saong padang ngak palei pala bahrau./.

Urang lang: Thu Thảo

Viết bình luận

TIN CÙNG CHUYÊN MỤC