Di palei Chà Panh, xã Phước Hòa, huyện Bác Ái, tỉnh Ninh Thuận, bhap bani pak ini thei jeng thau tal ong Katơ Thơm, Akaok kapul urang dahlau diah ngak bol lin xã, lac kareih camin urang nong Raglai kham merat yam tapa kan kandah, yam tagok ngak meda angaok mblang taneh palei drei. 

Ong Thơm khan lac: Sang dahlak pambuak pagam haong bruk raong  athur meng ralo thun ini mai. Urak ini, sang raong 30 drei limo. Yaok mbang, tapol limo menrk meng 25-28 drei. Drei pablei limo tano, khik veik limo binai ngak pajaih, gam hu jien mek tame, gam patagok tapol limo. Piah grap tanat pandap mbang ka tapul limo, abih di nyu nan lac dalam bilan pandiak bhang, ong caik tabiak 5 sào taneh piah pala dom janih hareik. Meng iek glang siam nan ye dalam bilan pandiak bhang min mblang hareik tamuh siam, ginup hareik ka limo mbang yaok harei, nan ye tapol limo praong siam.

Langiu di bruk raong glang, angaok mblang taneh 4ha meteh ngak padai aia dahlau diah, ong Katơ Thơm tok khik veik 5 sào ngak padai, daok veik hadom ong salih tapa pala dom janih phun ka nyu lagaih haong bruk pandiak bhang yau urak ini, ba mai kein laba yau: tangei lai, ratak naih, phun pa-ok blait... Meng thau ba ilamu - kỹ thuật tame bruk pala drak nan ye năng suất, chất lượng phun pala hu siam mekre, dalam nan phun padai hu jaik 6 tấn meteh sa ha sa vụ. Kuhria taong abih yaom jien mek tame hu meng bruk raong glang, pala drak, yaok thun sang ong duah hu labaih 250 triệu đồng, grap tanat rai diuk.

Oh lac ngak meda ka sang drei, dalam rai diuk yaok harei, ong Katơ Thơm daok abih hatai daong ka dom baoh sang urang nong kathaot dalam bruk ngak mbang, pala drak meng dom bruk ngak hu mboh di meta yau: daong ilamu, kinh nghiệm, brei mesre phun jien, padai pajaih… Abih di nyu nan lac, ong daok brei “raong limo menek” daong ka ralo baoh sang yam tapa kan kathaot. Limo menek mbang akaok mereip, urang raong hu khik veik, mbang menek ka 2 jao veik ka ong, hu  5 baoh sang taduan mek limo mai raong tui jalan ngak yau nan ngan haong 25 drei; ba bruk ngak tani tanat ka labaih 20 urang ngak dalam palei. Sa-ai Katơ Pha, sa dalam 5 baoh sang taduan mek limo mai raong brei thau: hu bruk daong di sa-ai Katơ Thơm, sang dahlak taduan mek 4 drei limo menek, 4 drei limo mbang tui. Tal urak ini, limo menek hu 3 drei, sang dahlak bui sambai ralo.

Meng dom kham merat dalam bruk ngak mbang pala drak, thun 2014, ong Katơ Thơm hu tỉnh pok brei harak meyaom ka bruk urang nong pakacah gauk ngak mbang naih jioy. Thun 2015, hu huyện Bác Ái brei harak meyaom kayua hu thành tích xuất sắc dalam bruk pakacah gauk ranam taneh aia vaktu 2010-2014./.