Menek tabiak dalam sa baoh sang kathaot di xã bhum atah bayah Khun Há, tuk tok gauk, hu amaik ame brei sa mblang taneh sit, diuk pasang sa-ai Sâu padang sang daok, taneh daok veik sa-ai pala tangei saong pala pablak janih phun karei tui bilan. "Ginup mbang ye biak uan tabuan paje, sahneng hagait tal bruk duah hu jien. Abih di nyu nan lac tuk hu anek, raidiuk dak kan kandah jang. Yaom lac drei kham merat tabiak truh kathaot, min oh hu bruk daong gah pandap panda jeng oh ngak hagait hu” – sa-ai Sâu khan lac yau nan.

Thun 2012, Dự án patrun kathaot dom tỉnh bhum ceik gah Brak mbang ka  II hu daong ka dom baoh sang kan kandah hu hatai kham merat tabiak truh kathaot, sa-ai Lù A Sâu saong 9 baoh sang karei di bản Sin Chải hu daong pabui pajaih. Meng sa drei pabui di dự án, sa-ai kham merat iek glang piah ka nyu menek bloh pablei ka mikva. Mek katut raong atah, sa-ai patak pataom phun jien blei taneh piah pala tangei, padai pabak ka bruk raong glang, blei menuk, ada mai ngak trang trại. Thun 2015, mboh labik daok di sang drei ohlagaih ka bruk ngak mbang, pablei salih kaya nong, sa-ai Sâu pataom jien blei 4 sào taneh daok tapen jalan nao pasak  xã piah padang sang, ba meneing trang trại trun piah lagaih ka bruk raong galng. Sang sa-ai raok dua danao tra piah raong ikan, buh  50 triệu tame var ro, danao ikan piah peih praong ruk raong glang.

Urak ini, var pabui di sang ong tuk halei jeng hu takik di abih meng 15 – 20 drei pabui ralo,  2 drei pabui menek, yaok rituh drei menuk, ada saong 2 danao ikan. Bruk njauk biai nan lac, meng di tuk hu daong pajaih bloh peih proang bruk raong glang, trang trại di sang sa-ai takik hu jit ruak.  Hu yau nan, sa-ai Sâu bhian bac megru ilamu meng harak báo. “Thun 2013, drei blei komputer kết nối mạng Internet – ini lac “gru” di drei piah drei bac megru. Kadha halei oh thau ye drei tagok mạng piah pabak ilamu, bloh tangi urang jakar tuk mboh bruk hagait oh siam rah tabiak, piah samar pasiam ruak” – sa-ai Sâu brei thau yau nan. Urak ini jalan ngak mbang kinh tế trang trại di sang sa-ai Sâu yaok thun duah hu labaih 100 triệu đồng.

Rilo mikva dalam palei mai rivang iek saong bac megru ilamu ngak mbang di sang sa-ai. Dom sang caong ngak, sa-ai Sâu daong phun pajaih, anek pajaih, tacei pato ilamu. Sa-ai khan lac: Tuk drei hu tabiak truh eik lipa kathaot rambah saong hu jien padai, drei dak thau dom caong khin dahlau deih di dom baoh sang kathaot yau drei. Yaom lac hu hatai caong tabiak truh kathaot, mi dom urang nan brei hu daong phun jien, anek pajaih, phun pajaih.

Ong Cứ A Sử, Bí thư Đảng ủy xã Khun Há, huyện Tam Đường, tinh Lai Châu brei thau: Meng dom đầu tư, phun jien, daong bruk ngak mbang di Karja, rilo sang urang bangsa takik daok di xã Khun Há hu jalan yam tagok tabiak truh kan kathaot, yau ye sang sa-ai Lù A Sâu. Ini lac kreih camin hadah dalam bruk patruh eik patrun kathaot di bản Sin Chải, rik daong patrun baoh sang kathaot di xã daok 20%./.