Lac sa dalam 19 bangsa daok dalam tỉnh Điện Biên, urang bangsa Hà Nhì daok pak xã Chung Chải, huyện Mường Nhé tuk halei jeng jia tui Đảng, gul pataom, khik ramik saong patagok ilamo di bangsa, gam haong dom gah daok dalam xã khik caga khang kajap bhum tapen negar gah Timur taneh ia.

          Xã Chung Chải, huyện Mường Nhé daok jaik taphia negar Việt – Lào, ralo meng mboh urang bangsa Hà Nhì daok. Dahlau diah, rai diuk di mikva gaok biak ralo kan kandah, eik lipa kan kathaot luac thun saong hu ralo adat cambat tanarakun klak oh daok lagaih haong saman ini. Hu bruk sangka di Đảng saong Karja padang ngak cơ sở hạ tầng, daong bruk pala drak nan ye rai diuk di mikva bangsa Hà Nhì dom thun jaik di ini hu ralo salih bahrau. Hu rai diuk trei sil, yaok urang bol tuk halei jeng thau hu trách nhiệm dalam bruk patagok saong khik ramik ilamu meng kan di bangsa. Ong Phùng Khừ Xá, Phaok akaok UB bhap bani xã Chung Chải, huyện Mường Nhé, tỉnh Điện Biên brei thau: Pakat cơ sở hu  brei bruk ka dom ban chuyên môn roh duah dom asal ilamo, tacei pato dom palei, dom chi hội giao lưu ilamo daoh tamia piah ngak pamedeih ilamo di urang Hà Nhì.

          Sa-ai Chang Lé Pư daok di palei Đoàn Kết thun halei jeng yau nan, tal harei thìn bilan 12 saka aia bulan sang sa-ai haong dom sang labik ini mbang 3 harei Tết tui adat cambat tanarakun di urang Hà Nhì. Dalam harei tết meng kan di urang Hà Nhì bhian hu dom janih pandap piah paling Yang daa amuk akei mai uan raok thun bahrau: "Tukvak mbang Tết di urang Hà Nhì khaol dahlak meng harei thìn, bilan 12 saka aia bulan yaok thun. Dahlau diah, urang Hà Nhì mbang Tết dalam 5 harei, urak ini tdaok 3 harei min. Uan raok Tết di bhap bani Hà Nhì sang halei jeng ngak har bánh dày, ngak dom janih pandap di bangsa. Thun ini, urang Hà Nhì mbang Tết raok thun bahrau dalam ralo salih bahrau kayua rai diuk hu trei sil jang dahlau."

          Tui adat cambat tanarakun di urang Hà Nhì dalam dom harei tết, tuai daa di baoh sang langiu gauk gar, adei sa-ai dalam talei pajaih, mikva dalam palei daok hu dom tuai damuai mai rivang ma-in meng dom tỉnh karei jeng hu daa mai mbang tết. Tết di urang Hà Nhì rah tabiak dalam bui sambai, chreih chai ngan haong ralo kadha biak karei. Tapa nan, dom ilamu siam gheih meng kan jeng hu brei mboh tapa hatung hatai di anek taco ngan haong ong akaok ong kei, ong muk saong dom yaom glaong ilamo di bangsa hu khik ramik, pamedeih tagok meng dom anek menuac di bhum tapen negar. Ong Khoàng Văn Hương, urang jakar ilamo xã Chung Chải huyện Mường Nhé, tỉnh Điện Biên brei thau: Khaol dahlak pathau khan ka adei sa-ai kamei, kapul urang nong khik iramik bruk menyim, jhik pet di urang Hà Nhì piah pato veik ka anek kamuan harei hadei oh lahik nao ilamo di bangsa drei. Khaol dahlak jeng hu peih dom labik giao lưu ilamo daoh tamia di palei ini haong palei diah.

          Yaom lac urak ini rai diuk ilamo di urang Hà Nhì ảnh hưởng oh takik meng bruk du nhập di dom ilamo karei, min adat cambat tanarakun saong dom ilamo meng kan di bangsa Hà Nhì dalam dom harei tết jeng daok hu khik ramik./.