BREI THAU KA MEBUK PANDIAK, ĐỘT QUỴ KAYUA PANDIAK, PA-UH
Thứ năm, 06:30, 04/05/2023 Urang lang: Mousa Phương Urang lang: Mousa Phương
VOV4.VOV.VN - Pandiak, pa-uh mbuan ba tal mebuk pandiak, đột quỵ tagok glaong, abih di nyu lac di uranaih, urang taha, urang hu ruak dalam rup atau menuac ngak bruk rilo di langiu pandiak.

Tui yaok pataom di dom labik y tế mboh lac, dom menuac tame cấp cứu di sang iek ruak dalam bilan pandiak thu bhian tagok rilo jang 3 mbang duk haong dom tukvak karei. Dalam nan, dom urang njauk mebuk pandiak haong đột quỵ não, srau kadau điện giải, viêm phổi mboh lac rilo di abih.

Tui Tiến sĩ, Bác sĩ Nguyễn Thị Minh Đức – urang pan akaok Khoa Nội Thần kinh, Pasak Thần Kinh, Sang iek ruak Đa khoa Tâm Anh ban raya Hồ Chí Minh, tuk nhiệt độ tagok jang 1 độ C ye đột quỵ mbuan tagok tal 10%. Dalam tuk nan, mebuk pandiak kayua pandiak pa-uh jeng lac sa dalam dom bruk bhian gaok di abih. Abih 2 bruk ini jeng meda ba tal trak damak meyah oh hu langyah, cấp cứu samar drah.

Dom menuac bhian njauk mebuk pandiak saong đột quỵ kayua langik pandiak, lac: uranaih; urang umo meng 65 thun tagok, menuac hu ruak dalam rup atau ruak suai lavik yau ruak tim mạch, tagok darah, me-ik saradang, srau kadau jalan chuyển hóa,...; menuac daok di labik hu takik phun kayau, takik halui, menuac bhian takre menyum alak tapai atau njuk pakao rilo, menuac ngak bruk rilo di langik pandiak, abih di nyu lac tuk jala pandiak, menuac menyum oh ginup ia;...

Bác sĩ Minh Đức brei thau, makna ba tal mebuk pandiak, đột quỵ kayua pandiak pa-uh lac tuk langik pandiak, rup tabiak rilo ia hauk ba tal lahik ia. Meyah mikva oh samar pabak ginup ia, darah nyu ma-mbeik jang, nduac suai jang saong ngak brei tagok darah, mbuan hu dom huyết khối ba tal gar rak darah. Tuk ini, darah pabak ka glo akaok saong baoh hatai oh ginup, mbuan ba tal đột quỵ.

Bilan pandiak, nhiệt độ tagok glaong, urang taha, urang hu ruak dalam rup bhian mboh glaih glar, var menum jru, mbuan ba tal đột quỵ. Bruk daok  dalam bilik máy lạnh blaoh tabiak langiu pandiak atau daok di langiu pandiak blaoh tame bilik máy lạnh chip, ngak ka nhiệt độ salih samar drah, rup pabap oh ka tui samu, menei ia la-an chip tuk nao pandiak mai;... jeng lac dom makna mbuan ba tal mebuk pandiak, đột quỵ.

Tuk njauk mebuk pandiak, đột quỵ kayua pandiak pa-uh, dahlau di abih urang ruak mboh: glaih glar, mbaok bhong meriah, jhih cambuai, kalik thu, mạch samar, suak yava samar, pandiak akaok, having akaok, pacah ia hauk, bhang meta, kan suak yava, suak yava samar drah, mạch yếu, pandiak glaong (meng 39 - 40 độ C), var drei jan...

Dom kadha brei mboh dahlau di tuk ruak di dua janih nan nyu dreih yau gauk nan ye mbuan meluk, suai ba nao cấp cứu.

Menuac mebuk pandiak, đột quỵ meyah oh hu taong ruak samar drah, meda gaok rilo biến chứng trak damak, ba tal metai tangin takai, ndom puac oh cambaih, viêm phổi, duh hatai, khin daok sa drei, oh khin ndom biai haong thei karei... Gaok mai, hu urang kayua oh hu ba nao cấp cứu samar drah, ba tal metai, atau diuk min yau menuac metai blaoh, oh daok thau hagait, yau Yuan lac “sống thực vật”. Nan ye bác sĩ Minh Đức kakei lac, mikva njauk nao pasang iek đột quỵ piah samar mboh, samar thau, pacang cakak đột quỵ rah tabiak saong plaih dom biến chứng, di chứng kan kandah, trak damak./.

Urang lang: Mousa Phương

Viết bình luận

TIN CÙNG CHUYÊN MỤC