Dom janih mbang huak brei ka siam lagaih daong brei ka sihat ka prein yawa sihat tian pruac sihat ka rup manuac urang. Tuk mbang pandap mbang siam, ginup janih brei sihat, siam lagaih ka jalan tung pruac di drei meda mboh rup hanjul hanjaic, tian hatung mek ndap nda mbang tame lagaih ka rup sihat siam ka rup. Langiu di nan, tuk mbang pandap oh siam ka prein yava meda ngak kan kandah tal jalan tung pruac, ngak kan kandah tal raidiuk, ralo di nyu mboh tamuh di dom harei raya Tết Nguyên đán.

Bác sĩ Huỳnh Tấn Vũ (Akaok Kapul taong ruak harei, Sang iek ruak Đại học Y Dược TP HCM labik ka 3) brei thau lac, harei Tết kol drei hu tukvak piah padeih padai rilo jang, tukvak ngak bruk, ngak takik takai hu trun, kayua yau nan ye bruk pandar prein takik jang dut saong yaok harei. Min dom janih pandap mbang bhian gaok di dalam tuk raya Tết lac hu prein biak glaong, dom pandap mbang tui kuhria lac hu rilo saradang, rilo janih mamek, rilo ralao đạm athur meng ralaow ikan, takik njam patam hijau, nan lac makna ngak ka drei tagok kilo, patagok dom janih ruak mạn tính abih di nyu nan lac tagok darak, ma-ik saradang saong dom janih ruak karei. Piah khik ramik tani tanat prein yava di dom harei raya Tết, mikva njauk ngak tui dom jalan mbang huak tui tacei yau ini:

-Mbang gap takre: Pandar siam lagaih saong parilo dom janih pandap mbang dalam yaok pandap mbang saong yaok var mbang piah ka bruk mbang huak hu siam lagaih. Njauk khik tani tanat 3 var mbang di dalam sa harei, oh klaak var mbang halei jeng ye mbang huak njauk masa tukvak. Njauk mbang ginup saong tani tanat 4 nyaom janih pandap mbang asal (hu saradang, hu janih đạm, janih limek, vitamin saong dom khoáng chất).

Mbang rilo baoh karaoh njam patam kayua janih nyah xơ di nyu ngak ka drei trei suai, caga plaih bruk mbang rilo ngak tagok kilo, langiu di nan, njam patam baoh karaoh daok pabak vitamin daong patagok prein yava piah pacang caga sihat rup haong caga ruak kik.

Langiu di nan, pei nung pei galik hu rilo calo mbuan ngak ka rup tagok kilo, yau nan ye drei mbang mbaih mbang gap. Patakik pandap nda mbang huak ralo manjek, ndap mbang cuh sao kayua hu rilo cholesterol tame rup pabhap. Njauk caik hatai caga tal pandap mbang huak ralo limen.

- Mbang siam gap: Oh mbang dom pandap mbang mboh khut: yau ye ndap mbang mbau bruk, oh daok bau bingi, pandap mbang caik lavik harei. Pandap njauk caik di labik lanieng lanoi plaih caga halak halieng roi tame. Njam patam baoh karuac atau ralaow ikan jeng njauk ngak hacih saat dahlau di tuk ba nao ngak.

- Manyum ginup ia, patakik manyum ia limen: Yaok urang njauk manyum labaih 2 lít ia yaok harei piah tame tanat ganap ia dalam rup, ganap ia dalam ka rup pabhap oh mboh glaih glar kayua kurang ia. Manyum ia pandiak daong ka tung pruac caga plaih bruk mboh kan, trak damak dalam tain saong ka rup mboh sanang njul njaic jang .

Sahanang hatai tuk mbang huak meda daong ka bruk mbang huak, tung pruac rup pabhap hu siam jang saong plaih caga di bruk rup tagok kilo. Daok hatai suh sah meda ngak ka drei hamu pandap mbang saong oh pasang iek caga hu bruk mbang huak, mbang biak rilo. Urang hu ruak, ruak dalam rup lawik njauk khik caga tani tanat bruk mbang huak ginup tui panuac kakei di jru gru, manyum jru njuak tui panuac kakei./.