Thun ini umo 74 thun min taha A Díp di palei Kon Stiu, xã Ngọc Réo, huyện Đăk Hà, tỉnh Kon Tum jeng daok khang kadang. 35 thun ong dang akaok palei saong akaok mban mặt trận thôn; 5 thun mai ini ong lac taha palei. Kadha vak di Rơ Châm Nga, báo Văn Hóa yaih khan ka ong:

Lingiu bruk jak ba mikva patagok bruk ngak mbang, patruh eik patrun kathaot, A Díp daok lac urang pachreih ba dam dara khik ramik dom ilamu meng kan di bhap bini Xê Đăng. 

Tui sa-ai A Quyết, akaok Ủy ban Mặt trận Negar xã Ngọc Réo,  harei harei, lingiu tukvak jak ba mikva ngak siam dom sarak di Đảng, hukum di karja, adat palei, A Díp daok kham merat ngak mbang. Urak ini, sang A Díp hu 5 sào cao su, 3 sào padai, 1 ha bei plom, raong limo, raong menuk... Lac urang cambuai ndom tangin ngak, nan ye angan je di taha A Díp dak harei dak glaong, mikva palei Kon Stiu thei jeng anit ranam, iek praong saong ngak tui. Tapa nan bo meng labik lac hu rilo sang eik lipa kan kathaot, tal harei ini, dalam 86 baoh sang di palei Kon Stiu, daok 17 baoh sang kathaot min. Lingiu bruk trun samar baoh sang kathaot, Kon Stiu daok hu taong yaom lac palei bhap bini bagsa takik daok khik ramik siam ilamu meng kan. Gam saong bruk padang ngak palei pala bahrau, palei Kon Stiu urak ini oh daok bruk raong palao menuk ada, anek athur, sang halei jeng ngak paga pacang bein piah pala njam, ngak var ro raong glang. Dom jalan palei labik halei jeng hu pui hadah kayua mikva halan hatian rik jien tame ngak. Tacei baoh sang rông biak mekre daok di kreh palei, A Quyết daok brei thau lac: hu sang rông mekre yau nan, jeng hu pren yava di taha A Díp.Ong lac urang dang tabiak thiết kế, tacei pato mikva ngak sang rông, saong daok jak ba mikva rik tame labaih 10 ribau harei ngak bruk, tame glai mek kayau. Taha A Díp daok lac urang kham merat jak ba piah mikva dalam palei, abih di nyu nan lac dam dara khik ramik ilamu bhap bini bangsa takik. Urak ini, palei Kon Stiu hu 4 kapul cồng chiêng, yaok kapul hu 14 urang. Dalam nan hu 2 kapul cồng chiêng thanh thiếu nhi me-in biak gheih.

Piah yaih khan kapul cồng chiêng anek naih di palei, taha A Díp ieu A Thiện (umo 7 thun), lac menuac di kapul cồng chiêng mai sang drei piah gam me-in dom lagu cồng chiêng duh ka tuai damuai. A Thiện tuk camereip mboh huac, min tuk hu taha A Díp ba brei baoh chiêng sit di abih dalam bộ chiêng ye meta adei hadah tagok, tangin ndok mek baoh chiêng saong samar ba drei tui sap chiêng di taha palei. A Thiện brei thau, “Adei thau taong chiêng meng labaih sa thun ini mai. Harei harei, adei bhian nao tal sang taha A Díp piah megru taong cồng chiêng...”. Lingiu bruk pato urang daok raniah umo taong chiêng, taha A Díp daok hu pato kol nyu paik capi ting ning, sa janih alat ragam di urang bangsa Xê Đăng.

Ndom ka bruk khik ramik ilamu bhap bini, taha A Díp bui sambai lô, gam biai, A Díp gam khan ka bruk peih ngak dom lễ hội di urang Xê Đăng, ngak ka urang pang mboh yau daok hu mbaok dalam lễ hội di mikva. Tuk ia harei tame ceik, mikva angaok hamu puh ba gauk mai sang, jeng lac tuk taha A Díp ba capi ting ning tabiak daok la anak pabah mbang paik dom lagu lai li-an  rap ar tuai damuai. Taha lac, sap capi ting ning lac sa binah suan yava di palei, kayua sap di nyu ba mai bui sambai, ngak brei lihik nao dom glaih glar hadei di sa harei ngak bruk./..