Ong Lâm Nho, urang hu angan je di palei Cần Dực, xã biên giới Lộc Thành, huyện Lộc Ninh, tỉnh Bình Phước lac sa kreiH camin ngak tui bruk jak ba “Bac megru song ngak tui jalan hadah krak siam mekre di Hồ Chí Minh”. Patagok  phẩm chất “Bộ đội Wa Hồ”, ong oh lac ngak mbang naih joi, paglaong rai duik bo dok kak kajap talei rohim puk palei, jak ba mik va dalam palei jum pataom dak padang xa biên giới Lộc Thành dak harei dak khang kajap. Khol drei tui pang dom bruk ngak siam gheih di ong dalam bruk bac megru song ngak tui jalan hadah krak siam merke  di Wa, tapa kadha vak  hadei di ni, di Jasi, urang vak di rayo sap ndom VN daok di ban raya  Hồ Chí Minh:

     Tui takai di urang jakar biên phòng Đồn Tà Pét, khol hulin nao tal sang ong Lâm Nho – urang hu angan je di palei Cần Dực, xã Lộc Thành, huyện Lộc Ninh, tỉnh Bình Phước. Tuk ndom tal angan ong, bhap bini di labik ni thei jeng thau, abih di nyu nan lac mik va bangsa Khmer bhum tapen negar ni.

Dok la anak boh sang bahrau padang, ong Lâm Nho khan lac: Tuk dok dam, ong tui Đảng ngak cách mạng, dong peih paha palei negar. Hadei di tuk phục viên thun 1983, ong dok veik bhum taneh ni piah ngak kinh tế. Tuk nan glai glo kan kandah, hu rilo ruak kik, sang ong gaok rilo kan kandah. Patagok phẩm chất “Bộ đội Wa Hồ”, ong nao bac megru ilamu di dom bhum palei jiak tapen, pang rayo, puac harak mbao, hu mbaok tame dom tal pato pasram pachreih nong katut harei kayua huyện Lộc Ninh peih tabiak. Tuk thau rilo, ong jak ba duik nek kham merat ngak mbang, yam tapa abih dom kan kandah, piah yam tagok dalam rai duik. Tui jalan ngak mek katut rong atah, pataom takik livik jeng praong, urak ni, ong hu sang danaok prong siam, anek taco siam mekre, thei jeng kham merat ngak mbang. Meng jiak 10ha taneh pala amriak kalu, paaok blait song padai, yaok thun sang ong laba hu labaih 150 triệu đồng .

    Oh lac ngak KT joi, rong anek jeng menuac jeng urang, khik ka sang danaok hu trei sir, ong dok patagok bruk di urang umo prong thun, kham merat jak ba mikva ngak siam dom sarak di Đảng, hokum di karja, jak gauk padang palei Cần Dực dak harei dak tagok.  Ong Lâm Nho brei thau, drei  brei kham merat ngak mbang piah kuhria ka anek taco harei hadei. Di labik ni, hulin jak ba mik va ngak mbang patagok kinh tế, jhui pablei papaok blait meda, jhui ngak suan hokum bhum tapen negar, jhui jah tak glai, jhui pagam pambak tame karja, bo kham merat yam taogk

      Khin pato anek taco hu siam mekre, ong tuk halei jeng ba akaok nao dahlau song pamong tame dom bruk hu kein lagaih ka bhap bini, ka  xã hội. Nan lac bac megru song ngak tui jalan hadah krak siam mekre di Chủ tịch Hồ Chí Minh. Ong Lâm Nho mboh ni lac bruk ngak gam gam saong njauk ngak luac rai. Dok pren yava ye ong dok kham merat pambuak haong mik va dak padang puk palei tapen negar dak harei dak siam mekre, kaya meda, mek hu dom tanut palei pala bahrau. 

       Oh lac urang hu angan je song mik va dalam palei, ong dok lac ayhut sahabah nao gam song urang lin biên phòng labik ni.  Urang jakar khin lang sap di labik halei, tuk halei ong jeng halan hatain hu mbaok. Dalam dom harei rija prong di mik va Khmer yau Chol Chnam Thmay, Sen Dolta... ong  jak ba dom urang ngak pahla song dom đồn biên phòng alin pandap panda brei ka mik va kan kathaot bangsa Khmer dok tapen xã Tuần Lung, huyện Mi Mốt, tỉnh Tbong Khmum- Campuchia, dong padang talei rohim jum patom bhap bini 2 negar  Việt Nam – Campuchia.

      Thượng tá Hoàng Tất Thắng – Chính trị viên Đồn Biên phòng Tà Pét, Bộ đội Biên Phòng tỉnh Bình Phước brei thau: Wa biak jiak song đồn biên phòng, dalam dom mbang ginum biai Wa bhian jak ba mik va Khmer ngak siam sarak di bhum tapen negar, kham merat ngak mbang, patagok sản xuất, patagok rai duik mik va urang Khmer di palei  Cần Dực.

    Ong Lâm Nho lac  sa dalam  341 urang hu angan je di tỉnh Bình Phước. Ni lac dom urang nòng cốt, lac talei pambuak pakat  ủy, karja song bhap bini ; hu rilo rik dong dalam bruk pakacah gauk anit ranam taneh ia. Dom bruk ngak di ong Lâm Nho hu rik dong ngak brei siam mbaok meta bhum tapen negar, hu bhap bini labik ni anit ranam, njauk caik ka mikva Khmer bhum tapen negar  Bình Phước bac megru ngak tui ./.