Padang ngak palei pala barau daok jeng bruk chreih chrai, grauk labik dalam tỉnh Trà Vinh. Urak ini dalam tỉnh hu 30/85 xã ngak blaoh dom tiêu chí padang ngak palei pala barau. Ngak hu yau nan, lac hu bruk rik daong pren yava oh sit di dom adei saai kumei Khmer di ini. Daa mikva saong grauk yut nao tal huyện Châu Thành, tỉnh Trà Vinh duah thau ka bruk padang ngak palei pala barau di adei saai kumei Khmer di ini tapa kadha vak di Sa Oanh – urang vak di rayo sap ndom VN daok di bhum taneran kraong CL.

       -Lương Hòa A, huyện Châu Thành lac xã hu bhapbini Khmer meblah labaih 70%, dahlau dhaih njauk dang anak dom kan kandah. Min, jaik ini ia mbaok palei pala hu salih barau, jalan điện negar dui hadah abih phum sóc, dom canah jalan jeng hu tuh bê tông atau tuh patau hijao, dom baoh sang tường hu tamuh tagok salih ka dom baoh sang taik tahak.  Lương Hòa A hadah hadai ye harei ini, hu bruk rik pren oh sit di hội liên hiệp urang kumei xã gam dom urang kumei libik ini.

       Saai Kim Thị Mai Loan, akaok kapul urang kumei Lương Hòa A brei thau, meng tuk peih ngak danakdak bruk ngak negar ka padang ngak palei pala barau, urang kumei xã tuk halei jeng pablak dom tieu chi padang ngak palei pala barau tame dom bruk pakacah di kapul. Abih di nyu nan lac, meng akaok thun 2017, kapul hu ba tabiak bruk yah klak dom tatua ikan palei pala, trun takik sang kathaot lac sang urang kumei ngak pô tal tanut bair abih saong dak apdang bruk “ sang hu mõ, jalan hu menyek”. Saong bruk nan rik daong ngak blaoh tieu chi alam moi truong, jien mek tame saong Quốc phòng, an ninh di xã. “Dahlau si peih ngak bruk hagaiyt kol dahlak jeng ieu pataom urang bhapbini piah duah thau hatai sahneng, meyah hu rilo urang njauk hatai gauk ye peih ngak. Daok dom sang oh mai pataom mbaok hu, khol dahlak nao tal sang jak ba saong mek angan halan hatian tut angan peih ngak mo hinh. Hadei di nan meng tabiak bruk mek jien phí atau harei ngak. Akaok mereip kol dahlak pilih ruah ấp halei nan ngak iek dahlau, blaoh pataom mek alamu meng peih tabiak ngak dom ấp daok veik. 

 -Piah daong adei saai hội viên kathaot patagok kinh te, yam tagok patruh kathaot khang kajap, rik daong pataom tame padang ngak xã palei pala barau, tukvak tapa, kapul hu samal mek dom phun jien daong saong pambuak bruk haong gilang pariak karja huyện Châu Thành tín chấp ba mbuan lagaih ka 210 hội viên kathaot mesraiy phun jien abih tih labaih 3,2 tỉ đồng buh tame patagok ngak mbang pala drak. Tabhia nan, jak ba dalam hội viên  padang dom tổ patak pataom jien, jak ba dom hội viên khá, meda daong hội viên kathoat meng daong jien, phun pajaih, anek pajaih, harei ngak…kuhria tabiak jien jaik 120 triệu đồng. Kuhra dalam thun blaoh, meng phun jien mesraiy ini hu 25 sang patruh kathoat, rik daong dui trun dom sang kathaot di xã daok 4,65%.

  -Saai Sơn Thị Phấn di ấp Hòa Lạc A, sa dalam dom sang hu takik taneh pala drak patruh kathoat meng phun jien mesriay di kapul brei thau: “Meng tuk khin likei tal ini, dahlak pala njam hamiet, kayua njam pala hu rilo mbang jang padai. Pala njam jien buh tame takik, min laba glaong jang padai. Padai meyah thun halei siam, pala njauk, pablei hu yaom lac hu laba, daok oh hu ye khat. Jeng hu kapul urang kumei yau nan ye oh duh hatai ka phun jien, jien daong gauk blaoh mesraiy jien meng gilang pariak sarak karja jeng biak mbuan.

-Sa dalam dom bruk jak ba daok hu dom pakat kapul pataom tame peih ngak pambuak pagam saong bruk padang ngak palei pala barau lac bruk jak ba “ dak apdang sang 5 oh, 3 hacih”. Dahlam nan kapul ba tabiak bruk yah klak adat raong athur palao, var raong oh khik hu hacih saat, saong pandar danaok yuak tian di danao ikan, kraong ribaong. Ini lac sa dalam dom adat biak kan salih di urang bhapbini di ini. Kayua piah salih bahrau, lingiu bruk sahaneng daok brei hu jien, hu taneh piah padang ngak veik, gam ngak trun jien mek tame. Min, meng pataom hu phun jien daong saong padang hu kapul daong harei ngak meng urang đoàn, dam dara dalam xã gam saong bruk pathau khan meng gah kapul nhyaom yau nan ye bruk peih ngak biak mbuan lagaih. Urak ini, dom tatua ikan hu yah klak, padang ngak veik danaok yuak tian njauk chuẩn.

       -Meng dom bruk ngak siam, lagaih, hội viên urang kumei Khmer di xã Lương Hòa A, hu rik daong puk palei peih ngak siam danakdak padang ngak palei pala barau. Kuhria tal urak ini, dom xã hu rilo bhapbini Khmer di huyện Châu Thành, tỉnh Trà Vinh ye Hòa Lợi, Đa Lộc, Lương Hòa A, Mỹ Chánh ngak hu meng 9 – 14 tiêu chí, dalam nan hu dom tieu chi kan ngak ye: sang kathaot, alam moi truong jeng ngak si blaoh.

-Ia mbaok palei pala barau di Trà Vinh daok salih barau yaok harei, bruk nan hu pren yava di urang jakar, hội viên urang kumei jeng ye urang kumei Khmer. Urak ini, bruk padang ngak palei pala barau daok pambak praong grauk dom pakat pakul urang kumei dalam tỉnh. Meda ndom lac, bruk pataom tame khang, sáng tạo di dom pakat urang kumei di bhum hu rilo bhapbini  Khmer hu rik daong patagok pren khang dalam padang ngak palei pala barau di tỉnh Trà Vinh./.

Thúy Linh