Sa-ai nan lac Đinh Kiều Dung, bangsa Mường daok di xã Cuối Hạ, huyện Kim Bôi, tỉnh Hòa Bình. Thaik thaoh sit sot, mbaok meta hadah metuah nan ye maong sa-ai mboh daok ranaih jang umo 52 di drei. Anit ranam ka lagu daoh bhap bini Mường, sa-ai Dung khan lac:  amaik ame di sa-ai hu sap daoh biak bingi pang, abih di nyu nan lac sap daoh di ame. Tuk daok sit, sa-ai bhian hu daok di lingiu mblang bein maong iek ia bulan hadah saong pang ame daoh dom lagu daoh bhap bini Mường biak bingi pang, dom panuac daoh, panuac ru Mường yamen li-an njom tame dalam hatai sa-ai mbiah tal harei ini. Sa-ai brei thau, lagu daoh bhap bini Mường nyu hu pren ngak ka hatai anek menuac mboh chreih chrai jang, anit ranam gauk jang.

 Dom lagu daoh ví, lagu daoh bhap bini di urang Mường,ngak ka menuac sia mai jaik gauk jang, anit ranam gauk jang, min panuac khan, panuac ndom meng baoh hatai brei thau ka raidiuk di drei jeng hu urang khan meng ariya, meng lagu daoh bhap bini. Di yaok tuk, yaok labik, urang jeng pambuak abih tame lagu daoh bhap bini, tuk bui sambai urang jeng pambuak tame ariya piah daoh jeng lagu daoh bhap bini Mường, tuk mebuk hatai urang jeng pambuak tame ariya piah daoh lagu ví nan..

 Dahlau deih hu tukvak lac sa urang kumei lin, urang kumei daoh dalam bol bala, dalam dom mbang nao daoh pamơrơ lin saong bhap bini, sa-ai kanal di abih nan lac hatung hatian di urang lin saong bhap bini brei ka sa-ai hadei di yaok kadha daoh, yaok lagu daoh bhap bini Mườnghu sa-ai daoh meng abih hatai jai brei mboh bruk gheih, bruk mekre di ilamu bangsa. Sa-ai dak mboh anit anek menuac, ranam bhum taneh menek tabiak dom lagu daoh bingi pang, lai li-an. Hadei din an, tuk mai ngak bruk di jabat ilamu huyện Kim Bôi, tuk halei sa-ai jeng mboh dalam hatai lac: ngak yau habar piah ka lagu daoh bhap bini Mường oh lihik nao.

 Drei ngak gah ilamu daoh tamia bhap bini, drei mboh lagu daoh meng kan, ilamu bangsa nyu pamedeih tagok dalam hatai. Yau nan ye tuk nao ngak bnruk di puk palei, drei tuk halei jeng lac urang pathau khan piah ka dam dara, urang umo samu drei atau daok ranaih jang, drei jeng ba ilamu hadah krah di bangsa Mường tame pathau khan ka abih menuac sia. Ba ilamu di bangsa Mường tame dom danak dak di harei pataom pakacah salam uan dom kadha praong dalam palei dalam xã dalam huyện. Nao tal labik halei jeng hu bhap bini takre. Nan lac bruk pachreih ba piah ngak ka drei dak mboh anit ranam jang lagu daoh bhap bini di urang Mường.

 Anit ranam lagu daoh bhap bini Mường, urang kumei nan daok hu hatai takre pato veik ka anek kamuan, ka dam dara piah khik veik ilamu, khik veik panuac daoh saong sap kong cheng ka bhap bini Mường. Yau nan ye, thun 2004, sa-ai dang tabiak peih tal pato daoh lagu bhap bini saong taong kong cheng di sang daok dalam Xóm Bo, xã Kim Bình, huyện Kim Bôi palei pasang sa-ai. Yaok melam car, dom kamuan umo bac tal 4, tal 5 mai pataom gauk di sang sa-ai. Tuk camereip hu dom adei min, hadei di nan dom adei dui gauk mai rilo jang kayua sa-ai gheih ba dom kadha daoh đồng dao, dom kadha daoh ru adei tame pato, ngak ka dom adei pachreih hatai tui bac. Mboh hu dom kham merat di sa-ai, karja palei saong dom urang taha dalam xã hu daong ka sa-ai biak rilo, meng pandap panda tal panuac pachreih. Xã hu brei ka sa-ai nyom bilik bac di ủy ban xã, dom urang taha jeng mai pato ka dom adei jalan puac panuac, jalan yuak lagu yau habar ka nyu njauk haong suan yava di lagu daoh bhap bini Mường. Thun 2012, hu bruk daong brei di jabat pato megru saong labik bo sa-ai daok ngak bruk, sa-ai peih tal pato daoh lagu daoh bhap bini di sang bac phổ thông bangsa gam bac gam daok huyện. Hadei di tuk tame tal bac di sa-ai, rilo adei hu jeng urang ba akaok ngak brei patagok bruk ilamu dalam palei. Ndom ka tal bac di sa-ai Dung, amuk Bùi Thị Thêu, umo 65 thun, daok di Xóm Bo, xã Kim Bình brei thau:

 Dahlak mboh biak hu yaom glaong. Dom amuk amuk saong sa-ai Dung ini jeng caong khin ka kol anek naih nyu thau hu ilamu di urang Mường klak. Piah ka kol nyu thau cambaih, bloh anit ranam bangsa drei.

 Dom bruk ngak di sa-ai biak njauk iek praong, njauk pok meyaom, meyah oh hu menuac ngak ka nyu medeih tagok, menuac khik ramik saong patui jalan ye dom ariya, dom lagu daoh bhap bini Mường nan oh thau nyu nao gah halei. Saong rairah dam dara urang daok ranaih umo oh thau hagait tal varies praong glaong di muk kei caik veik./.