Hà Công Cương ndih tapui thun 1992 dalam sa baoh sang urang nông kan kathaot daok di xã Hòa An, huyện Chiêm Hóa, tỉnh Tuyên Quang. Hà Công Cương khan lac, umo ranaih di saai lac yaok biar harei nao khik kabau, li-ua hamu haong ong kei nội saong amaik ame. Meng dom tuk padeih padei hadei dom var ngak bruk glaih glar nan, sap kalei di ong kei nội nyu dui pachreih hatai saai. Mboh hatai takre di taco nội ngan saong janih alat ragam di bangsa, ong nội Hà Công Cương hu tacei pato ka saai, meng jalan pan kalei, jalan mek yava mbiak tal jalan yuk ka nyu gheih sa kadha di urang Tày. Meng nan, mbaik kalei nyu pambuak saong Hà Công Cương yau sa ayut sahabat. Thun 2007, sang bac cao đẳng ilamu nghệ thuật Việt Bắc peih bruk palih anek saih, Hà Công Cương tut angan tame pakacah saong hu palih ruah, jeng sinh viên khóa 28 di sang bac saong hadei di nan tut angan tame pakacah ĐH ilamu Nghệ thuật bol bala. Hà Công Cương lac:  

 “Harei nao pakacah baoh sang biak kan kandah. Tuk nan sang dahlak oh daok sa đồng jien lei, jeng oh nao nyim hu kayua sang kan kathaot oh thei brei nyim. Maong vir taom dar sang, mboh daok tapon sau saong dua mbao padai piah mbang dalam dom harei cang yuak. Vụ nan jeng ngak oh jeng. Min kayua caong khin di anek bo amaik ame jeng hi sinh. Hadei di tuk pablei abih dom hagait drei hu njauk nao mesraiy. Nan lac pren khang abih drei hu, rilo mbang glaih glar oh thau pagam pambak labik halei ye drei saneng tal baoh sang. Tok di caong sa mbang ieu phon, amaik ame  hu panuac pachreih ba ye hu pren khang piah drei kham merat”.\

Bui sambai hu mai tal saai saong amaik ame tuk Hà Công Cương gam tame khoa nghệ thuật bangsa saong bhum ceik, gah alat lagam bangsa, ĐH ilamu Nghệ thuật bol bala. Thau lac drei njauk tự lập, nan ye tuk ngak salah bloh harak gar tame bac, Hà Công Cương nao duah bruk ngak piah hu jien kuhria ka bruk bac daa saong pandar cai sit dalam ban raya. Kayua ngành bac đặc thù nan ye bruk bac di urang likei jeng biak karei. Bac alat ragam bangsa, atau pasram megru Sona ( urang bhian ieu lac kèn ndam metai) nan ye gaok tuk Hà Công Cương njauk salih labik daok trọ meng 2 tal 3 mbang sa bilan kayua gaok tuk njauk bac eng di sang ngak ảnh hưởng tal urang jaik taphia. Hadei ini, saai bhian tabiak takai kraong Tô Lịch piah bac, kayua daok di labik nan takik urang nao mai, oh ngak ảnh hưởng tal thei. Kayua tari tarieng, kham merat bac nan ye tamat 4 thun bac đại học, urang likei bangsa Tày mek hu angan sinh viên bac naih joi dalam khóa bac 2011 – 2015; huy chương pariak ka độc tấu, hòa tấu alt ragam meng kan di Huế thun 2012; huy chương pariak ka độc tấu, hòa tấu alat ragam meng kan kapat negar di Đà Lạt thun 2015. Taong yaom ka anek saih di drei, Trung tá, NSUT, Nhạc sỹ Nguyễn Xuân Bắc lac:

 “Adei Hà Công Cương nan lac sa anek saih naih taong abih. Dalam luac tukvak bac di labik ini, taphia bruk kham merat ka chuyên môn ye dom bruk karei jeng ngak siam. Dalam tukvak bac di labik ini ye adei Cương hu ba tame Đảng Cộng sản VN, tapa nan brei mboh bruk kham merat yam tagok di drei. Praong di abih nan lac dalam bruk bac megru meng bloh adei mek hu angan thủ khoa naih joi di abih dalam sang bac. Kol dahlak biak hadah mbaok pato hu sa adei sinh viên naih taong abih gah”.

Ndom ka dom bruk daok kuhria ngak di anak tal, Hà Công Cương brei thau, meda tagok jalan nao ngak lin piah jeng bộ đội tui njauk hatai caong saong ngak hồ sơ likau tame sa kapul nghệ thuật bol bala piah hu ngak ayut saong mbaik kalei pambuak saong drei dalam luac dom thun bilan daok ranaih./.