Dom harei ini, diuk pasang sa-ai Lưu Chí Cường daok pak tổ 1, khu phố Phú Mỹ, phường Tân Phú, bal sit Đồng Xoài, tỉnh Bình Phước daok jar var haong bruk iek glang labaih 250 phun tắc kiểng piah pablei tuk Tết Nguyên đán. Tui sa-ai Cường, langik tasik dom bilan puac thun siam lagaih, nan ye phun  tắc tamuh siam. Urak ini bein tắc kiểng sang sa-ai glaong jang 1 mét daok caga tame chậu, angaok phun hu baoh tathak kanjik katam, meluk haong dom baoh  hijao jangaih mboh biak mekre meta. Piah hu phun prong glaong yau nan, sang sa-ai buh pren iek galng dalam jaik 5 thun. Sa-ai Cường brei thau: Thun ini phun biak prong meyah yaom yau thun dahlau ye njauk prong. Thun bloh, phun prong yau ini pablei hu 3 triệu, daok thun oh ka pablei nan ye oh thau yau habar. Min thun ini mboh phun nyu praong siam. Oh ka thau darak pasar yau habar.

Lac sa urang hu ralo thun pala bingu pak tỉnh Bến Tre, thun ini, sang sa-ai Nguyễn Thị Liên palih ruah bal sit Đồng Xoài, tỉnh Bình Phước piah pala bingu pablei tết. Tết Nguyên đán Ất Mùi ini, sang sa-ai Liên caga labaih 5.000 phun vạn thọ; 200 phun cúc. Urak ini phun bingu di sang sa-ai daok tamuh siam. Sa-ai brei thau, piah hu sa chậu bingu mekre ba tabiak darak pasar pablei, brei hu ilamu iek glang, brei ngak njauk tui quy trình kỹ thuật. Karei jang yaok thun, thun ini yaok chậu vạn thọ, chậu cúc sa-ai pala tal 3 phun ka nyu gheih meta. Sa-ai daok brei thau lac: Tuk tame thun bahrau sak Pabe ini drei jeng ngak dom phun bingu piah pablei ka urang parang iek yau dom thun dahlau nan. Thun halei jeng ngak jaik 5 ribau bo pablei hu abih. Thun ini tui kuhria mek tame hu labaih sa rituh triệu. Caong hu yaom ye uan tabuan.

Tui ilamu meng dom thun dahlau, thun ini sang ong Đỗ Văn Tuyến daok pak khu phố Sơn Long, phường Sơn Giang, bal sit Phước Long, tỉnh Bình Phước oh pala phun vạn thọ, lay ơn atau cúc yau dom thun dahlau bo palih ruah phun hướng dương piah pala pablei dalam dom harei tết Nguyên đán. Ong brei thau, jaik 5 thun ini mai, tuk Tết mai, mikva labik ini hu tận dụng mblang taneh daok klaak saoh di sang drei piah pala bingu pablei tết. Kayua pala rilo sa janih bingu nan ye tuk pablei yaom oh hu glaong. Urak ini, labaih 500 phun bingu hướng dương di sang ong Tuyến tamuh siam saong daok tabiak rilo caduk, meda  ba mai ka sang ong yaom jien oh lac takik dalam tuk Tết ini. Ong Tuyến brei thau: Ngak bruk ini meyah njauk bilan nan lac 3 bilan, daok jaik 25 harei tra ye brei ka nyu tabiak bingu. Meyah drei oh khin ka nyu tabiak bingu avar ye drei bhian pruh aia, page pruh, kreh pandiak pruh, biar harei pruh. Daok meyah oh ngak yau nan ye nyu samar tabiak bingu. Pala phun ini tui langik tasik, meyah njauk hatai caong khin di drei ye bui sambai ralo.

Taphia di phun mai kanjik katam lac phun chủ lực saong dom janih bingu hu blei ralo dalam tuk Tết yau cúc, vạn thọ, lay ơn,…, thun ini, urang ngak bein Bình Phước daok hu pala phun tắc cảnh, hướng dương, pabak rilo janih jang ka darak pasar bingu, pabak hatai takre di urang blei.. Ndom ka darak pasar bingu pablei ka dom harei Tết Nguyên đán dalam tỉnh Bình Phước, sa-ai Nguyễn Văn Đạo, urang jakar pachreih nong di pasak pachreih nong - pachreih ngư tỉnh Bình Phước brei thau: Dom urang meng miền Tây tagok ini roh duah saong palih ruah labik piah pala bingu pablei tuk tết ini. Urak ini darak pasar pak Bình Phước daok biak sit nan ye khaol dahlak oh ka thống kê hu ralo. Min yaok thun khaol dahlak jeng nao mong iek dom labik pablei tết saong mboh bruk pablei bingu ka mikva jeng hu siam.)

Bruk pala bingu daok jeng bruk ngak mbangba jien tame di ralo baoh sang. Yaom lac jien mek tame meng phun bingu oh glaong dut haong dom janih phun pala karei, min nyu hu daong ka dom urang ngak bein hu bruk ngak mbang, hu jien mek tame, hu pabak hương vị ka dom harei akaok thun bahrau./.