Tuk camereip lac ky su padang ngak hu ngak bruk di Ban raya Ho Chi Minh, min kayua bruk di sang nan ye thun 2018 sa-ai Trần Hứu Vinh gilac mai palei di xa Tam Hiệp, huyện Châu Thành, tỉnh Tien Giang piah padang mbang ngui. Dalam tukvak sa-ai nao ngak rilo labik, sa-ai mboh bruk raong ciim jaomao đột biến biak gheih, kan duah, hu kein laba. Nan ye, jaomao lac “patao” dalam dom janih ciim meda raong piah pablei duah jien. Kayua yau nan ye, sa-ai oh huaci hagait bo buh jien tame labaih 600 trieu dong piah blei 20 yau ciim jaomao đột biến pajaih, abih di nyu lac ciim hu balau mbong atau kanyik piah raong di sang.

Meng hatai takre saong bac megru ilamo meng dom urang raong dahlau pambuak haong ilamo bac hu meng bruk ba tangin tame raong nan ye tapol jaomao đột biến di sa-ai praong siam. Urak ini, sa-ai padang ngak dom var ro sit vilval 2.000 m2 taneh di sang. Dalam tukvak ini iek tui janih jaomao jeng yau ilamo pakacah bo yaom yaok drei meng 5-7 trieu dong; gaok mai hu drei pakacah naih joi hu yaom tal dom rituh trieu dong.

Tui sa-ai Trần Hữu Vinh, piah raong hu ciim jaomao, urang raong brei hu hatai takre, brei roh duah dalam ka janih ciim ini; pandar dom ilamo sangka, caga ruak. Ciim jaomao hu yaom langiu di sambo màu, sap kanjaot daok lac hu ilamo pakacah. Ndom ka hatai takre padang mbang ngui meng ciim jaomao đột biến sa-ai Trần Hữu Vinh brei thau:

 “Bruk piah raong ciim jaomao jakjeng ye dahlau abih drei ruah pajaih, ruah dom drei pajaih siam. Nao pagam haong nan lac hu bruk tacei ba di urang nao dahlau, blaoh tapa bruk raong glang, drei ba drei tame meng hu dom ilamo piah langyah dom asal kadha rah tabiak dalam bruk raong”.

Bruk raong ciim jaomao lac urang raong brei hu hatai takre, tari taring, tani tanat, thau dalam ilamo raong glang; brei thau bruk di nyu, bruk randap, bruk pachreih di janih ciim ini. Kaya pandap mbang langiu di kaya pandap mbang kong nghiep daok hu dom janih baoh kayau yau patei, pa-aok, dom janih halak haling…Var ro hu padang di labik laneing, ginup hadah, dalam var caikpandap mbang, ia  ka ciim menei saong caik dom gai dalam nan ka ciim ndam.  Ngan haong ciim mebaoh brei padang var ro meng kiak, padang jeng dom gilaong praong 3m2, glaong 4m, ramik gam sruh ciim, phun hijao ja saong hu camera tui iek bruk mebaoh di ciim. Ciim jaomao đột biến raong hadei 7 bilan lac nyu mebaoh, yaok thun yau ciim mebaoh meng 5-20 mbang anek; yaok sa mbang anek mebaoh 2-3 baoh. Tui sa-ai Vinh, ciim jaomao đột biến hu rilo kein lagaih jang jaomao tự nhiên lac hu thaik thaot gheih, sambo màu balau karei, sap kanjaot bingi pang. Urak ini, darak pasar ciim jaomao đột biến daok biak chreih chrai, anak tal sa-ai Vinh peih praong bruk raong piah hu jien tame rilo jang:

 “Urak ini, langiu bruk patagok tapol ciim di sang ye dahlak hu pabak drei pajaih ka dom sang hu hatai caong patagok bruk raong bhum miền Tây saong dalam taneh ia, daong ka adei sa-ai raong, ruah drei pajaih saong mbang pablei hadei ini. Daok bruk me-in ciim ye anak tal dahlak peih pakak kalup kapul me-in ciim piah ngak labik ka adei sa-ai mai me-in haong gauk saong pabak ka gauk thau ilamo ka gah raong ciim ini”.

Labik raong ciim jaomao đột biến di sa-ai Trần Hữu Vinh lac bruk bahrau “karei, kan mboh” saong hu peih praong di bhum taneran kraong Cửu Long, brei siam lagaih kinh te glaong; daong parilo dom bruk ngak nong di tinh Tien Giang, duh ka hatai caong bui sambai me-in, paglaong raidiuk mbang ngui, daok dang di anek menuac./.