Sa-ai Vinh ndih tapui tabiak dalam sa baoh sang ngak nong. Bac tamat THPT, Vinh bac gah Công nghệ thông tin di sang bac ĐH An Giang. Meng blah bằng kỹ sư, sa-ai mbuan likau bruk, ngak lập trình viên ka 1 Cty daok di TP.HCM, jien bilan hu labaih 2.000 USD sa bilan. Min meng hatai takre bruk ngak nong saong tuk halei jeng caong khin ngak kaya meda meng mblang taneh palei drei nan ye thun 2016, Vinh likau padeih bruk nao palei daok di xã Thân Cửu Nghĩa, Châu Thành, Tiền Giang piah raong laneng. 

Sa-ai Vinh khan lac: Jhung thun 2016, dahlak nao duah thau bruk raong laneng di Củ Chi (TP.HCM), Long An saong tabiak tal Hà Nội, bloh tagok Lai Châu. Tal akaok thun 2017, dahlak nao palei padang mbang ngui haong bruk raong laneng. Tuk nan, dahlak mboh laneng lac hu makna praong dalam bruk ngak nong hữu cơ saong ngak nong công nghệ glaong, nan ye mbuan hu jak jeng. 

Tuk camereip, Vinh buh tabiak phun jien jaik 20 triệu đồng saong raong laneng di mangaok mbaok taneh praong dom rituh mét vuông min. Dalam luac 5 thun, sa-ai gam ngak gam bac megru ilamu. Tal urak ini, sa-ai hu ngak po labaih 100ha (dalam nan hu trang trại pambuak gauk haong bhap bini) raong laneng di dom tỉnh miền Tây, peih Cty hu drap ar yaom labaih 40 tỷ đồng.

Vinh khan lac, piah raong laneng hu, ye bruk padang var ro raong laneng hu makna tal meteh jak jeng dalam bruk raong laneng. Var ro raong glaong meng 4-6cm, nền tauk cuah glaong 5cm, dalam tal cuah hu tauk halam saong brei hu tabung pacang pandiak, caga hajan. Yaok m2 taneh palao jaik 25kg laneng pajaih. Hadei di 15 harei palao raong lac meda mek pablei hu laneng ralow, 3 bilan ye mek aih laneng piah ngak khak drak. 

Tui sa-ai Vinh, raong laneng oh hu hagait kan, mikva tok pa-auk khak limo, pabe, kubao, pong, hareik klaak meng bruk ngak nong,...ka nyu bruk ralai piah ngak pandap mbang ka laneng. Laneng tuk praong ye pablei ralow, daok aih laneng ngak khak drak. Sa-ai Vinh pandar pabak men vi sinh blei meng Israel lai haong mật saradang tabau pa-auk dalam labaih 3 adit brei ka laneng mbang. 

Ralow laneng hu pablei ka dom labik raong hadang, lanung, ikan saong dom Cty ngak pandap mbang ka athur. Aih laneng hu pablei ka dom nông trại pala tui jalan công nghệ glaong dalam sang camin di dom tỉnh, ban dalam taneh ia.

Hadei di 5 thun peih padang ngak, bruk raong laneng di sa-ai Vinh hu ba mai kein laba praong. Urak ini kuhria rah tapa yaok bilan labik raong di sa-ai pablei hu meng 1.700 tal 1.800 tấn khak laneng, yaom meng 4-5 triệu đồng sa tấn; 5-6 tấn laneng ralow, yaom meng 50.000-60.000 đồng sa kg. Langiu di nan, sa-ai Vinh daok pablei laneng pajaih saong rilo janih pandap karei hu ngak meng aih laneng. Kaoh abih phun jien buh tame ngak, yaok bilan sa-ai Vinh mek tame hu meng 500-600 triệu đồng./.