Bein durian praong labaih 7 ha di ong lame hu pala ngak tui tanut VietGap. Rilo thun tapa, bruk pala durian hữu cơ tuk halei jeng kak kajap haong sahneng, duah, ba ilamu kỹ thuật bahrau abih tame pala, ngak, ba mai kein laba glaong haong bein durian di sang drei.

Ong Nguyễn Hữu Năm khan lac: dahlau daih sang ngak rilo meng tangin takai. Piah abih takik phun jien, takik menuac ngak, paglaong kein laba, ong sahneng duah, ngak tabiak rilo jamriak, mac moc lagaih piah ngak, salih ka menuac ngak.

Tapa duah thau mangaok internet gam haong hatai tari taring, meng sruh radaih la-ua, ong lame ngak jeng mac pruh jru sinh học meng bruk pabak tame 2 phuy jru pagam mangaok rup radaih, gah likuk pagam tangin bơm, kadhik ngin ... daong pruh jru tagok glaong saong samu gauk. Jamriak tagok hu siam lagaih dalam bein durian saong di phun pa-ok blait, phun cao su... Tuk jamriak ini ngak bruk, jru nyu par bak phun, meng mbaok dalam tal mbaok langiu hala. Pruh samu gauk daong ka phun njom tame siam chất dinh dưỡng, lahik abih halak halin. 1 mon mac meda pruh hu jaik 1 ha phun pala. Abih di nyu lac yaok bruk meng lai jru, bơm tagok bồn, saong pruh tagok phun jeng kayua mac ngak abih. Sruh mac pruh jru ini, lac pandap njauk hatai abih dalam biak rilo janih pandap bo ong sahneng duah, ngak tabiak.

Dalam tuk pala saong iek glang phun durian, ong lame daok sahneng tabiak rilo jalan iek glang phun hu siam lagaih yau ye katrei cakak dhar, radaih patuh ngak jeng mac cakak hareik. Meng dom mac nan, 36 ha pala cao su saong durian di sang ong lame tok abih 6 urang ngak gam gam. Meng pala, ngak tal pandar ilamu kỹ thuật tame ngak nan ye di mangaok sa mbaok taneh samu gauk, sản lượng haong chất lượng kaya nong di ong lame tuk halei jeng glaong jang dom bein karei dalam palei.

Langiu di nan, ong Nguyễn Hữu Năm hu dang tabiak jak ba sang pala durian di palei padang HTX Long Phú. Tal urak ini, HTX dui pachreih hu 12 urang haong mbaok taneh praong abih tih jaik 30 ha, dalam nan hu 23 ha hu brei paik baoh.

Ong Phạm Đình Chung, urang dalam HTX Long Phú brei thau, dahlau daih, sang pala durian tui jalan meng kan. Meng tuk tame HTX saong hu tacei pato ngak tui jalan hữu cơ hacih, bein phun di sang ong praong, siam, baoh praong, mbang bingi, pablei hu yaom glaong jang dahlau.

Amuk Lê Thị Ánh Tuyết, Phaok Yam ndok Sở Ngak nong saong patagok palei pala tỉnh Bình Phước brei thau, HTX Long Phú lac sa dalam dom labik hu pala, ngak tui jalan hacih, salamat, pablei tabiak negar langiu hu. Ong Nguyễn Hữu Năm lac menuac nao dahlau dalam bruk ngak tabiak durian hacih, pandar ilamu kỹ thuật bahrau./.