Urang nong bhum tapeng negar Huổi Luông patruh kathaot meng pala patei

Pathau mikva saong grauk yut ! dom thun jaik ini, meng pala patei bo raidiuk urang nong di rilo xã bhum tapeng negar huyện Phong Thổ, tỉnh Lai Châu hu tani tanat jang. Dalam nan  xã Huổi Luông nao dahlau dalam bruk  ba phun patei jeng pandap panda, hu dom sang meda tagok meng pala patei. Khắc Kiên, urang vak di rayo sap ndom VN daok di bhum Tây Bắc hu kadha vak “ urang nong bhum tapeng negar  Huổi Luông patruh kathaot meng pala patei, daa mikva saong grauk yut tui pang :

Nao tui jalan tapen negar tame pasak xã Huổi Luông, angaok dom takai mbuan patih kaok rilo patau dahlau thiah, urak ini lac bak hijao di patei. Saai Tẩn Chỉn Phù, sa urang nong daok di bản Pô Tô, xã Huổi Luông brei thau : sang saai hu 6 urang, lac sang kathaot dalam xã dom thun dahlau, hadei tuk pala patei labaih 1 héc ta , sang saai patruh kathaot saong raidiuk tani tanat rilo jang, oh daok huac eik veik. Phun patei paik baoh yaok thun, yau nan ye hu jien piah brei ka anek nao bac:  Sang dahlak barau pala patei hu dua thun  ini saong urak ini paik hu sa adit hu labaih 1 triệu. Urak ini sang pala gam tangei saong patei yau nan ye jeng hu ginup mbang paje. Dalam palei urak ini pala patei abih paje, tok ngak takik tangei min. pala phun hagaiyt jien mek tame glaong lac mikva pala, ngak habal ginup mbang saong mek rilo jien lac hu.

Ngan saong sang saai Giàng Phủ Lìn di bản La Vân, xã Huổi Luông pala patei labaih 3 thun ini. Hadei di tuk pala iek, mboh phun  patei jien mek tame rilo jang, yau nan ye sang saai pala patei abih di taneh dahlau thiah pala bei plom, tangei. Meng di nan, meng jien pablei patei, sang saai hu jien mek tame tani tanat, daok hu daong mikva dalam bản phun pajaih piah peih praong taneh. Saai  Giàng Phủ Lìn bui sambai lac :Dalam bản dahlak saong dalam xã Huổi Luông urak ini mikva pataom tame pala patei abih, kayua jien mek tame glaong duk saong phun tangei, bei plom. Makna mikva pala rilo lac kayua phun patei siam saong taneh mbok di ini saong cakrok sian jang phun pala klak. Dalam bản dahlak urak ini sang takik lac pala jaik 1.000 phun, sang pala rilo jeng hu meng 2.000 tal 3.000 phun).

Rilo thun ini mai, labik “ darak patei” di xã tuk halei jeng rilo menuac. Patei rilo yau nan ye harei halei urang blei jeng hu mbaok meng dah pagaiy piah blei. Harei ini patei daok hu yaom, yaok ki lô gam trung bình jaik 10 rabau đồng. Saai Phàn Thị Hoa, sa urang blei patei di “ darak patei” Huổi Luông brei thau : patei mbang baoh di ini biak tani tanat, yau nan ye harei halei takik, diuk pasang saai jeng teik hu dom tấn patei, blaoh pablei ka urang blei di Trung Quốc. Bruk blei patei di diuk pasang saai di ini rah tabiak gam gam rilo thun ini, min yaom daok pagam pambak tame  urang blei gah Trung Quốc: Urak ini bhapbini di ini pala patei abih saong yaok harei ba nao labik pataom piah pablei ka dom urang blei. Yaom patei jeng glaong jang duk saong rilo pandap karei yau nan ye mikva hu jien mek tame biak glaong. Yaom di tukvak ini daok pablei jaik 4,2 tal 4,3 đồng, sumu saong labaih pluh rabau sa kilogram ).

Phun patei hu bhapbini xã Huổi Luông ba tame pala rilo meng thun 2009, urak ini hu jaik 750 ha. Kayua hu kinh te glaong, yau nan ye hu pambak praong saong jeng pandap panda, saong lac jalan ba jien tame di mikva dom bangsa puk palei. Ông Lý A Hành, akaok uy mban bhapbini xã Huổi Luông, huyện Phong Thổ brei thau : phun patei hu daong mikva trun  sang kathaot meng labaih 70% thun 2010 trun daok 15% di thun 2015. Dalam xã hu domm pluh triệu phú barau tamuh ngan saong labaih 30 sruh ô tô hu blei meng jien pablei patei. Meng jien mek tame kuhria yaok akaok menuac di xã labaih 5 triệu/sa thun urak ini hu tagok labaih 15 triệu đồng.  Puh tangei dahlau thiah hu takik, yau nan ye mikva salih tapa pala patei piah hu nang suat glaong jang, Kuhria rah tapa, yaok thun, 1ha patei mikva mek hu 150 triệu. Urak ini mikva salih phun pala, patei lac hu yaom, yau nan ye radiuk salih bahrau biak rilo. Dalam klau thun ini, mikva blei hu biak rilo ô tô). 

Phun patei oh lac brei thau kein laba di takai ceik Huổi Luông, bo daok hu pambak praong tal dom labik tapeng negar karei ye Bản Lang, Ma Ly Pho, Ma Ly Chải. Bhapbini bangsa di dom puk palei hu ba phun patei tame pala rilo saong maong ini lac phun patruh eik patrun kathaot saong ngak kaya meda./.