Yaok harei saai ngak bruk gleih glar min oh ginup jien raong diuk anek. Kayua kurang thau ilamu kỹ thuật nan ye kaya nong sa-ai pala oh siam, meng nan jien duah tame ka boh sang gaok kan kandah. Min tuk xã Thái Mỹ hu ban raya palih ruah ngak xã điểm dalam bruk padang ngak xã palei pala bahrau, saai hu karja sangka daong phun jien, song hu mbaok tame dom tal pasram ilamu kỹ thuật ka bruk pala drak, rong glang, saong daok hu dong khak drak, phun pala, athur rong. Meng nan saai saong rilo mik va di Thái Mỹ khang hatai salih janih phun pala, anek athur rong . Meng 40 ha taneh ngak padai oh siam, saai salih tapa pala njam patam hacih saat yau tamun ia, boh paya, paloi, lanaong. Kayua pala luân phiên yaok thun 3 vụ song meng hatai tari tarieng kham merat bac megru tapa harak mbao, pang rayo, tapa dom mbang pasram ilamu kỹ thuật, dom mbang nao iek bruk pala njam hacih saat kein laba, saai ba tame pandar dalam mblang taneh pala njam patam hacih saat di drei. Tui jalan ngak ni, yaok thun ba mai ka sang saai jiak 150 triệu đồng. Kaoh abih phun jien buh tame ngak, saai daok liba hu 75 triệu đồng.

Ndom nyai song khol hulin, saai khan lac “ Piah hu yau harei ni, hulin kham merat biak rilo. Lingiu di bruk kham merat ngak mbang, urang nong njauk kham merat bac megru, hu mbaok tame dom mbang pasram saong nao mong iek bac megru jalan ngak mbang hu kein laba di labik karei, meng nan pataom ilamu ka rup drei. “ Oh lac sa urang nong ngak mbang naih joi hu rilo urang thau tal, bo saai Xuộng dok hu hatai siam dong tacei pato ilamu pala drak, jalan buh khak ……ka rilo boh sang urang nong dalam palei piah ba gauk kham merat yam tagok tani tanat rai duik./.