Xã bhum cei akaok mereip di Quảng ngãi mek hu chuẩn palei pala barau

       Piah ngak hu rilo tiêu chí saong mek hu chuẩn palei pala barau di dom xã taneran lac bruk kan, daok ngan saong dom xã bhum ceik bo rilo meng lac urang bangsa takik ye dak kan kandah jeng. Yau nan min, xã Nghĩa Sơn, huyện Tư Nghĩa, tỉnh Quảng Ngãi ngak hu bruk ini. Kadh vak di Dinh Hương vak angaok báo TTXVN brei thau ka bruk ini :

      Nao tal Nghĩa Sơn harei ini, yaom lac abih tết, min dalam chreih chrai di bilan xuân, bhapbini di ini jeng daok bui sambai ngan soang rilo bruk ilimo, padhih, yaom lac barau rah tapa 4 mbang xua ribuk di akaok bilan 12/2016. Min, meng hatai anit ranam daong ba gauk, Tết Đinh Dậu 2017 ini, dalam xã oh hu sang lac eik lipa.

       Amuk Phạm Thị Min brei thau, mikva xã Nghĩa Sơn bui sambai rilo! Kayua bruk kham merat meng livik mai hu pabak veik tuk xã mek hu chuẩn palei pala barau. Thun blaoh, hajan xua miat ngak ka mikva dalam xã gaok khat lihik rilo. Hu oh takik sang oh daok hu trei sir yau dom thun dahlau. Min, sang halei kurang, kan kandah ye hu dom sang karei daong brei.

     Xã Nghĩa Sơn tame ngak danakdak bruk ngak neagr padang ngak palei pala barau meng thun 2011. Tukvak nan, xã tok ngak hu 1/19 tiêu chí. Yaom lac gaok rilo kan knadah, min meng truyền thống cách mạng, anh hùng dalam mesruh metak, tari tarieng, sáng tạo dalam ngak mbang pala drak hu ngak jeng hatai kham merat, yam tapa kan kandah di bhapbini dalam dak padang palei negar.

Ông Phạm Văn Sơn, akaok uy mban bhapbini xã Nghĩa Sơn brei thau, kayua lac xã bhum ceik, hu 98%  dom sang lac urang bangsa H'rê, yau nan ye tuk peih bruk padang ngak palei pala barau, bruk akaok mereip njauk ngak siam lac pathau khan praong dalam piah paglaong akaok sahanneg di bhapbini ka asal kadha, jalan ngak, sarak di karja ka padang ngak palei pala barau; pathau khan piah abih hệ thống chính trị cơ sở saong bhapbini hu thau cambaih lac : padang ngak palei pala barau  ye bhapbini khik labik dang glaong, bhap bini hu thau, hu ginum biai, hu quyết định, eng drei ngak, eng drei glang iek saong hu mbang tui. Rik daong pren yava, jien padai piah ramik pasiam libik daok di sang drei, buh jien padai tame ngak, rik daong dak apdang dom công trình công cộng di palei, xã.

       Piah patagok kinh te, paglaong jien mek tame ka bhapbini, xã Nghĩa Sơn hu peih dom tan pato bruk ka urang ngak di palei pala yau glang iek padai, raong limo binai, pala keo lai hom, pala bei plom nguyên liệu…Xã daok hu daong limo ka dom sang kathaot, tacei pato rilo alamu barau piah urang nong ba tame ngak. Meng di nan, năng suất padai dalam xã thun 2016 hu tagok 59 tạ sa hecta duk saong tanut 45 tạ sa hecta thun 2011. Urak ini, dalam xã hu jaik 88% sang raong glang dom janih athur, menuk ada. Jien mek tame di bhapbini tagok meng 6 triệu meteh sa urang sa thun di thun 2011 tagok tanut 27, 3 triệu sa urang sa thun di puac thun 2016. Baoh sang kathaot trun tok daok 3%. Saai Phạm Văn Thân, xã Nghĩa Sơn brei thau “ Dahlau thiah drei raong pabui palao, min hadei ini urang jakar tacei pato ngak var raong, oh lac raong pabui ralo bo gam raong pabui binai, raong limo binai, pala bei plom, keo…yau nan ye jien mek tame glaong, dom urang anek hu nao bac da-a. Saai Phạm Thị Việt khan lac “drei oh lac ngak hacih saat labik vil tam dhar sang bo daok ngak hacih saat libik bhapbini daok. Dom jalan menyek, jalan mbak, sang bac, balai y tế jeng hu buh jien tame ngak pasiam veik, praong -mekre. Mikva thei jeng bui sambai anak dom jak jeng bo drei kham merat ngak hu”

      Ngan saong xã bhum ceik Nghĩa Sơn, bruk hu brei angan lac mek hu chuẩn palei plaa barau oh lac hu makna ngan saong dom urang jakar saong bhapbini dalam xã, bo daok lac pren khang piah huyện Tư Nghĩa pamaong tal bruk padang ngak huyện palei pala barau di thun 2020. Ông Huỳnh Ngọc Quận, phaok akaok uy mban bhapbini huyện Tư Nghĩa brei thau : kol dahlak biak bui sambai saong pok meyaom bruk kham merat di karja saong bhapbini xã Nghĩa Sơn. Kol dahlak meda mek Nghĩa Sơn ngak mẫu piah dom xã karei ngak tui, kayua ini lac bruk nao dahlau meng kham merat, yam tapa dom kan kandah, gam rik pren, gam abih hatung hatai saong gauk.

     Meng kham merat saong njauk hatai gauk di Đảng bộ, karja saong bhapbini puk palei Nghĩa Sơn hu yam tapa dom kan kandah piah jeng xã bhum ceik akaok mereip di tỉnh Quảng Ngãi mek hu chuẩn palei pala barau saong jeng xã khang kajap gah kinh te, tani tanat gah an ninh chính trị, trật tự an toàn xã hội, gheih mekre gah ilimo./.