Thun 2013, UB bhap bini ban raya HCM hu buh rilo pren yava ka bruk patrun kan kathaot, patagok boh sang mbiah ginup, paglong rai duik ka urang bangsa takik. Labaih 30 danak dak pakat ban raya dong ka urang bangsa takik kan kathaot hu peih ngak yau: miễn tong abih jien bac ka anek bangsa Cam song Khmer meng mau giao tal abih pakat phổ thông trung học, Mban bangsa ban raya hu brei rilo pok pandap song pok jien bac hu yaom labaih 1 tỷ 200 triệu đồng ka urang kan kathaot song anek saih urang bangsa takik. Taeng 24 quận, huyện jeng hu buh tabiak jiak 3 tỷ 100 triệu đồng iek glang rai duik ka jiak 8000 boh sang urang bangsa takik kan kandah. Boh sang urang bangsa takik kan kathaot dok di ban raya patrun meng 2.751 thun 2012 trun dok 300 boh sang thun 2013.

Yaom lac langik thun bahrau barak liar, min tuk vaih tame rivang sang muk Amina urang bangsa Cam dalam boh sang anit ranam di labik 111/14 jalan Huỳnh Văn Bánh, phường 17, quận Phú Nhuận, khaol hulin mboh biak ấm áp. Boh sang muk lac boh sang kan kathaot di phường dalam rilo thun, bahrau tabiak truh kan kathaot di thun deih. Amuk brei thau: ndih lipei sang di muk jeng oh sahaneng tal harei hu sang dok bahrau prong siam, khang kajap yau urak ni. Dom pluh thun ni mai, taeng bruk kuhria ngak habar ka 9 cambuai mbang tabiak truh bruk harei eik, harei trei, jeng ngak ka muk gleih glar ye. Harei ni, tapa harei deih mong mboh sang dok taih tahak nyu ngak ka muk biak duh hatai. Hu “labik dok tani tanat meng kuhria bruk ngak mbang khang kajap” meng hu bruk sangka dong ba di Kapul Lien Hiep urang kamei phường song mik va dalam khu phố, urak ni, amuk hu sang bahrau siam mekre.

Gam song bhap bini dom bangsa di ban raya dok kham merat yam tagok dak padang rai duik siam mekre, bhap bini urang Khmer dok di quận 3 kham merat hu mbaok dalam bruk dak padang rai duik ilamu di khu dân cư song dom bruk ngak pahla. Tet jeng lac tuk piah ka mik va brei mboh hatai anit ranam gauk pambuak kajap talei rohim jum pataom gauk dalam bhap bini menuac urang. Mikva bangsa Khmer oh lac jum pataom dong ba gauk patruh eik patrun kathaot bo dok jum pataom gauk khik ramik hacih saat alam môi trường, labik dok. Baha ChăntănrăngSây di quận 3 nan lac labik khik ramik song sinh hoạt ilamu di labaih 3000 mik va urang bangsa Khmer. Ni jeng lac labik bhain dong ka rilo urang janji oh siam, dong jien padang ngak sang anit ranam, iek glang tết ka urang kan di labik ni. Sư Danh Lung, chủ trì baha Chăntănrăng Sây brei thau: Thun ni, rai duik di urang Khmer ginup jang yaok thun biak rilo. Bruk nan mai meng hu danak dak tani tanat yaom kaom, patrun yaom, khuyến mãi... Karja dong phun jien, tacei jalan ngak mbang, yau nan ye jien duah hu glong jang.. Dom phật tử ginup meda hu rik jien ngak bruk pahla, dong ka uranaih metui medar, urang kan kathaot.

Ngan song bhap bini urang Hoa dok di phường 7, quận 11, mik va dok chreih chrai uan raok tết bangsa dalam bui sambai, rai duik hu ginup meda jang, anek taco hu jak jeng siam mekre. Ni lac sa labik pataom mbaok rilo urang Hoa duik rai song labaih 8.350 urang. Tết thun ni, sang halei jeng parang bingu mai takam, đào hồng, ahar bánh chưng, mứt kẹo. Angaok jalan mbak mehit sap hagar tamia lân tadhau ayuh likau brei hu patuah jamo, kaya meda, ngak ka harei tết dak bui sambai chreih chrai. Ong Châu Kiến Quang, phaok akaok UB bhap bini phường 7, quận 11 yaih lac: Mik va urang Hoa biak kham merat ngak mbang, tari tarieng ngak bruk, thau paglong akaok sahaneng kham merat yam tapa kan kathaot. Urak ni, dalam phường oh dok boh sang halei duah hu jien ala 12 triệu đồng yaok urang dalam sa thun. 2014, ngan song boh sang jiak si kan kathaot bahrau yam tapa tanut chuẩn, phường brei pataom tame mạng y tế, pachreih ba urang ngak pahla blei  BHYT ka dom urang ni, urang taha dok sa eng drei. Kadua, dong duah bruk ngak ka urang ngak phổ thông tame ngak bruk di dom cơ sở dalam phường. Dok bruk bac daa, meyah hu urang halei kan kandah ye phường brei dong tong abih piah ka dom adei hu nao bac. Ong Châu Kiến Hoan ndom yau nan.

Patui ngak sarak bangsa thun 2014, phaok akaok UB bhap bini ban raya HCM Hứa Ngọc Thuận hu panuac khin Mban bangsa ban raya patui bruk pasang iek dom boh sang kan kathaot urang bangsa takik piah iek glang hu ginup jang. Ong Thuận daok brei thau: Dom boh sang kan kathaot duah hu 16 triệu đồng sa urang dalam sa thun hu ban raya brei harak BHYT 100%  meng kadung jien kajar ban raya. Boh sang jiak si kan kathaot duah hu 21 triệu đồng sa urang dalam sa thun hu brei harak BHYT 75% dok veik jak ba di dom labik karei piah dong ka mik va. Khaol hulin gam tui iek bruk peih ngak sarak an sinh XH ka mik va dom bangsa dok di ban raya. Ngak yau habar peih ngak hu ginup sarak di Đảng dsong karja.

Thun anek sak saih ni, hu bruk sangka dong ba di Đảng song karja, yaok ribau boh sang urang bangsa Chăm, Hoa, Khmer hu tabiak truh kan kathaot. Ni lac bruk bui sambai di Đảng bộ, karja song bhap bini bhum urang bangsa takik. Meng bruk kham merat yam tagok di mik va, tapa nan, thun anak tal rai duik di mik va dom bangsa takik dok di ban raya HCM hu salih bahrau rilo jang, dong padang ngak ban raya angan Wa dak harei dak siam mekre ndung bak hatai anit ranam./.  

Kadha vak di Bhummi