Palei Cam Hà Bao, xã Đa Phước, huyện An Phú, tỉnh An Giang hu labaih 410 sang, 1120 menuac. Mikva Cam labik ini diuk meng bruk pablei salih sit, trah ikan, pala drak, raong galng, mnan ye raidiuk daok gaok rilo kan kandah, ilamu daok biar. Dalam dom thun jaik di ini, hu bruk sangka di Đảng saong Karja tapa dom sarak yau daong ka bhap bini hu taneh daok, hu mesraiy phun jien piah salih bruk ngak mbang..., raidiuk di mikva Cam dak harei dak salih bharau. Hanipha, urang vak di rayo sap ndom Việt Nam daok di ban raya Hồ Chí Minh hu kadha vak brei thau:

 Mai palei Cam Hà Bao dom harei jaik tết, mboh bruk uan raok thun bahrau sak pabe daok chreih chrai tagok, nao tal labik halei jeng mehit sap biai klao. Bui sambai bak palei, sang halei jeng chreih chrai caga raok Tết. Yaom lac di labik ini oh hu bingu mai, bingu đào, min nyu hu dom janih bingu meng ba-ar hu likei kumei dalam palei cakak, mbat jeng bingu biak mekre meta piah trang trí meng gah dalam tal gah lingiu sang, ngak jeng ban sambo hadah mekre. Dom mứt kẹo, dom janih ahar di urang Cam jeng hu mikva ngak piah caga payak tuai dalam dom harei Tết. Daok dom dam dara ye jar var haong bruk pasram daoh tamia piah parang me-in pamơrơ mikva puk palei dom harei Tết sak pabe. Adei Mariyah, akaok kapul daoh tamia di xã brei thau: Kol dahlak biak jar var haong bruk sang danaok, min kham merat pasram di tuk melam. Kham merat daoh ka nyu bingi pang, tamia ka nyu gheih piah pa mơ rơ mikva puk palei, jeng tapa nan piah khik ramik ilamu di bangsa drei

 Bruk bui sambai uan raok thun bahrau di mikva Cam palei Hà Bao saong xã Đa Phước yau hu tagok jang rilo mbang tuk karja labik ini bahrau brei padang saong ba tame pandar sang ilamu bhap bini yaom 1 tỷ 600 triệu đồng piah daong ka mikva hu labik me-in sambai, labik taom gaok, bac megru ilamu ngak mbang... Tết ini, sang ilamu bhap bini yau pahadah tagok meng dom bruk ilamu, daoh tamia pamơrơ bhap bini. Sa-ai Duso, Phó Chủ tịch Mặt trận negar xã Đa Phước brei thau: thun bloh, hu 10 baoh sang tabiak truh kan kathaot. Tết sak pabe, Trung ương hu daong “Kadung jien ka urang kan kathaot”, bloh Ủy ban Mặt trận negar xã jeng hu jak ba dom urang ngak pahla saong dom doanh nghiệp hu hasit jien piah daong ka dom sang daok kan kandah, saong daok hu brei 34 pok pandap ka dom baoh sang kan kathaot, baoh sang jaik si kan kathaot, yaok pok pandap yaom 300 ribau đồng piah mbang tết. Sa-ai Du So lac: Đảng saong Karja biak sangka tal mikva. Yaok thun tal tuk Tết, karja jeng hu pandap brei ka sang Cam halei kan kathaot piah mbang tết.

 Di Hà Bao, dom harei tết lac tuk piah taom gauk, piah bui sambai pambuak talei rohim jum pataom puk paga, bac megru ilamu di gauk tapa sa thun ngak bruk glaih glar...

Yaom lac daok rilo kan kandah dalam raidiuk, min bhap bini urang Cam di palei Hà Bao tuk halei jeng thau jum pataom haong dom bangsa karei piah ba gauk yam tapa kan kandah, glaih glar piah klhik ramik, dak padang puk paga, palei negar dak harei dak patagok. Nan ye Tết Nguyên đán, oh lac Tết praong di urang Cam, min yaok thun tuk phun mai rak bingu ye dom palei Cam dalam tỉnh An Giang jeng chreih chrai tagok bruk uan raok thun bahrau./.