Pathau mikva saong grauk ayut! Palei Cam Hữu Đức di xã Phước Hữu, huyện Ninh Phước, tỉnh Ninh Thuận hu angan lac labik peih ngak Katê – sa kadha praong dalam raidiuk di urang Cam Ahier tỉnh Ninh Thuận. Lingiu di nan, palaei Hữu Đức urak ini daok hu urang thau tal lac palei ngak mbang hu ginup meda, hu rilo radaih xe hơi di abih dalam bhum, saong hu angan lac “Palei xe hơi”. Mai rivang Hữu Đức dom harei ini, kol dahlak mboh dom baoh sang glaong, rilo tal hu padang tagok taphia gauk, dom janih xe hơi ndik nao mai angaok dom jalan bê tông praong, siam. Raidiuk di labik ini daok hadah tagok. Kadha vak di Thúy Linh – urang vak di rayo sap ndom VN daok di ban raya Hồ Chí Minh brei thau ka bruk nan, da-a mikva saong taong abih grauk yut tui pang:

Palei Hữu Đức lac bhum palei hu rilo bhapbini Cam daok. Dom thun tapa, kayua mikva thau pandar dom alamu ky thuat barau tame bruk ngak nong saong raong athur, nan ye, raidiuk di mikva Cam pak ini hu patagok biak rilo. Jien mek tame rilo jang, hu labaih jien, labaih drap ar, dom sang kaya meda di palei ini dak harei dak rilo jang. Mikva hu jien blei phương tiện barau, sang trọng piah pabak bruk ngak mbang di sang. Bruk ini hu  mboh cambaih di abih lac bruk blei xe hơi dak harei dak rilo di pak ini.

Gaok saai Đàng Thị Mộng Triều  daok ndik xe hơi nhãn hiệu Toyota Fortuner, takik thei sahaneng lac sa-ai nan sa urang nong di palei Cam Hamutanran. Sang saai lac urang akaok meti dalam palei blei sruh radaih ô tô yaom jaik 1 ty dong. Saai Trieu brei thau : sang saai blei hu sruh radaih ini meng jien patak pataom dalam ngak mbang di dua diuk pasang tapa rilo thun. Pasang saai Trieu urak ini lac sa doanh nhan, lambaok ka Tập đoàn Humana  di Đức daok pak Việt Nam. Saai ndom lac, kayua palei hu jalan mbak dak harei dak praong, yau nan ye, saai blei xe hơi piah nao mai ka mbuan lagaih, an toan. Saai Đàng Thị Mộng Triều khan lac.

Yau sang saai Đàng Thị Mộng Triều, sang saai Quảng Thị Đức Tánh, Phó Hiệu trưởng sang bac tiểu học Hữu Đức jeng blei xe hơi meng jien patak pataom di drei. Pasang sai urak ini lac sa dalam dom doanh nhan Cam dalam palei. Sang saai barau blei xe hơi di thun bloh. Tui saai, urak ini jalan mbak nao mai di palei hu praong, laneng biak rilo, bruk blei radaih praong, siam piah nao mai lac bruk njauk ngak, kayua nyu khik hu an toan, paglaong chat luong diuk rai ka sang bo daok ngak ka ia mbaok palei pala dak harei dak hadah hadai jang. Saai Quảng Thị Đức Tánh brei thau.

Tui kuhria mboh oh ka ginup abih, urak ini, dom sang hu radaih xe hơi di palei Cam Hữu Đức meblah labaih 3% dân số. Bruk blei xe hơi bahrau di palei Cam ini daok jeng sa bruk ngak. Tapa nan nyu brei thau lac mikva Cam pak ini daok ginup meda tagok meng pren ngak mbang di drei, saong daok brei mboh tư duy barau di urang Cam, nan lac salih jalan sahaneng, jalan ngak, rik daong dak padang sa palei pala barau hadah hadai, njauk saong jalan nao tagok di xa hoi.

Thun klak tapa bloh, thun barau mai tal, likau tadhau yuh ka mikva palei Cam Hữu Đức jeng ye dom palei Cam karei hu rilo mbang raok dom sruh radaih xe hơi barau mai palei gam saong hatai jia padang ngak palei pala barau hadah hadai saong patagok di harei hadei./.