VOV4.Êđê - Sa hlăm dŭm bruă mâo hlăm Hdră mtrŭn mrô 19 mơ̆ng Klei bi kƀĭn tal 5 Anôk kriê dlăng bruă Đảng gưl dlông tal XIII kơ bruă lŏ hma, krĭng lŏ hma, ƀĭng ngă lŏ hma truh thŭn 2030, hnơ̆ng trah dlăng truh thŭn 2045 anăn jing bi leh klei bhiăn, hdră mtrŭn bruă lŏ hma, krĭng lŏ hma, ƀĭng ngă lŏ hma. Hlăm anăn, mñă klă bruă mkăp prăk čan hŏng ênoh hdjul, mtrŭt mđĭ anôk bruă brei čan prăk mđing kơ bruă lŏ hma, krĭng lŏ hma, ƀĭng ngă lŏ hma, đru brei dŭm êpul hgŭm, anôk bruă duh mkra, gŏ êsei krĭng ƀuôn sang mđĭ kyar bruă duh mkra blei mnia čan prăk… Ti Hdră mtrŭn 29 sa blư̆ dơ̆ng mñă klă bruă klam mơ̆ng Agribank, Knơ̆ng prăk đru ba yang ƀuôn lŏ dơ̆ng mđĭ lar bruă mkăp prăk čan hŏng ênoh prăk mnga hdjul hŏng dŭm gŏ êsei ngă bruă lŏ hma ƀun, gŏ êsei knŭk kna dlăng ba, gang mkhư̆ msưh kdŭn klei brei čan prăk hŏng ênoh prăk mnga ktrŏ.

Lŏ dlăng wĭt êwang êlan êbeh 34 thŭn mkŏ mjing lehanăn đĭ kyar, klei đru mguôp leh mơ̆ng knơ̆ng prăk Agribank hŏng bruă klam phŭn klei kơ prăk kăk brei bruă lŏ hma, krĭng ƀuôn sang, lehanăn phung ngă lŏ hma čan. Jing leh klei siă suôr prŏng hŏng 3 phung anăn mâo čan truh 70% ênoh leh mâo čan, jing prŏng hĭn êdi kơ klei duh bi liê hlăm bruă lŏ hma, krĭng ƀuôn sang ti Việt Nam, mâo leh klei tŭ dưn jăk kơ bruă duh mkra, lehanăn bruă kđi čar, bruă yang ƀuôn. Kyua mâo prăk mơ̆ng knơ̆ng prăk Agribank, bruă lŏ hma, krĭng ƀuôn sang mâo leh klei bi mlih, mđĭ kyar bruă pla mjing kjăp, bi mlih hdră mă bruă, lehanăn klei thâo săng mơ̆ng phung ngă lŏ hma, jing leh mah jiăng kjăp mơ̆ng Agribank, ƀrư̆ hruê đĭ hriê kơ prŏng, čŏng thâo kpưn đĭ, lehanăn đuĕ nao kơ mdrŏng sah hlăm krĭng lăn ƀuôn sang pô mtam.

Hŏng bruă čuăn mđĭ kyar bruă lŏ hma, mnuih ngă lŏ hma, krĭng ƀuôn sang Agribank ba êlan êlâo nanao, jing leh knơ̆ng prăk phŭn mâo ngă bruă hŏng klei tŭ jing hlăm jih jang hdră êlan ngă bruă, 2 hdră ala čar kñăm kơ bruă mkŏ mkra krĭng ƀuôn sang mrâo, lehanăn klei bi hrŏ ƀun hŏng klei kjăp. Ară anei, Agribank mkăp brei leh truh 200 mta mnơ̆ng hlăm klei ngă bruă jăk hŏng knơ̆ng prăk, đru bi kjăp hdră êlan bi tĭng tla, boh nik hŏng dŭm mta bruă djŏ tuôm hŏng bruă lŏ hma pla mjing, rông mnơ̆ng lehanăn krĭng ƀuôn sang. Êbeh 34 thŭn mkŏ mjing lehanăn mâo klei đĭ kyar, Agribank mâo đĭ kyar leh hŏng klei hơĭt, kjăp lehanăn ngă bruă mâo klei tŭ jing. Yap truh kơ mlan 6/2022, jih jang ênoh prăk knơ̆ng prăk mâo iêo mkrum êbeh 1 êklăk 620 êklai prăk, hŏng ênoh leh brei čan êbeh 1 êklăk 390 êklai prăk. Hlăm anăn ênoh leh brei čan kơ bruă lŏ hma krĭng ƀuôn sang mâo êbeh 896 êbâo êklai prăk, truh giăm 70% ênoh leh brei čan jih jang. Hŏng atur jing mâo ngăn prăk hơĭt, knơ̆ng prăk mđrăm mbĭt nanao hŏng phung ngă lŏ hma hlăm djăp čar kwar kluôm ala, dưi mâo leh djăp ngăn prăk duh kơ bruă. Mbĭt hŏng klei mkăp djăp ngăn prăk, nao mbĭt hŏng hdră êlan ngă bruă mâo lu klei knhăk, tŭ jing, djŏ guôp hŏng grăp wưng mđĭ kyar bruă knuă đru leh kơ phung ngă lŏ hma, boh nik krĭng taih kbưi dưi mâo čan prăk hŏng klei pral, lehanăn ênưih mơh, dưi đru leh hlăm klei mđĭ kyar bruă duh mkra pla mjing, bi kdŭn jih êpul phung duah brei čan prăk hŏng mnga ktrŏ.

Hŏng dŭm êwang êlan mrâo mơ̆ng bruă lŏ hma, lehanăn klei duh mkra ala ƀuôn hlăm kluôm ala, khădah dôk tuôm hŏng lu klei dleh dlan, klei lông dlăng, phung khua kiă kriê knơ̆ng prăk Agribank lač, knơ̆ng prăk mâo leh mta čuăn mđĭ kyar bruă lŏ hma, phung ngă lŏ hma, lehanăn krĭng ƀuôn sang, čiăng hrăm mbĭt hŏng knŭk kna, knơ̆ng prăk bruă lŏ hma, lŏ dơ̆ng mjing bruă mđĭ kyar mrâo, hlăm anăn mđing duh mĭn kơ klei hdĭp mda phung ƀuôn sang, boh nik jing phung ngă lŏ hma, lehanăn mđĭ kyar bruă lŏ hma, krĭng ƀuôn sang ala čar drei hlăm ênuk mrâo mrang. Hlăm hdră êlan pô mă bruă, dŭm mta kñăm prŏng mâo leh knơ̆ng prăk Agribank čoh čuăn anăn jing: Ba êlan êlâo jih jang hdră êlan mơ̆ng knŭk kna, lŏ dơ̆ng bruă klam jing pô phŭn duh bi liê kơ krĭng ƀuôn sang, jing nanao mah jiăng sĭt suôr, mâo klei jưh knang kjăp mơ̆ng phung ngă lŏ hma, krĭng ƀuôn sang.

Amâo mâo mdei dưi pŏk mlar, knơ̆ng prăk Agribank kpưn nao truh hlăm krĭng ƀuôn sang taih kbưi, hlăm dŭm alŭ wăl mâo bruă lŏ hma, krĭng ƀuôn sang hlăm kluôm ala kñăm pral mâo đru phung ngă lŏ hma kơ bruă čan prăk... Tui tiŏ hdră êlan mơ̆ng knŭk kna, lehanăn knơ̆ng prăk knŭk kna, Agribank kreh ksiêm nanao kơ boh klei ruă tưp, klei yan adiê ngă, lehanăn lŏ dơ̆ng mđrăm mbĭt đru mghaih msir dŭm mta klei dleh dlan kyua hmăi mơ̆ng klei ruă tưp Covid 19 lehanăn phung duh mkra mâo leh hdră êlan kiă kriê kjăp, anăp dưi lŏ kơrŭ wĭt bruă duh mkra, mnia mblei jăk, čŏng kpưn đĭ hŏng jih ai tiê, mâo nanao klei ksiêm mkă bi kjăp jih jang hdră bi djŏ hlăm klei bi duh mkra mnia mblei, hŏng djăp wưng găl lehanăn amâo mâo găl./.