Bruă anei dưi ba wĭt boh tŭ dưn klă sĭt hlăm bruă pla mdiê lŏ, hbei tao, ba wĭt klei tŭ dưn, mkiêt mkriêm êa krih, hbâo pruê; boh nik jing bi hrŏ ai mă bruă, mmông mă bruă leh anăn răng mgang klei suaih pral kơ anak mnuih.

 Dŭm hruê ti knhal krah mlan 6, ti đang pla hbei tao 10 ha ti să Ƀuôn Triă, kdriêk Lăk, Phạm Đăng Xuân dôk mgăt mơ̆ng kbưi êdah phiơr amâo mâo mnuih mgăt (Drone) krih êa kơ đang hbei dôk mâo hbei. Ñu brei thâo, grăp hruê, êdeh phiơr anei dưi êran mơ̆ng 8 – 10 mmông, krih kơ 25 – 30 ha ana pla mjing. Bruă ba yua ênưih, knŏng pom êa bŏ hlăm giêt, lai hbâo pruê, hbâo brŭ, kă kdrăp bi klă ti asei êdeh phiơr, bi êran leh anăn ngă klei phiơr krih:

 “Êdeh phiơr amâo mâo mnuih mgăt hmei krih jing găl êdi, bi hrŏ ƀiă mnuih mă bruă, mmông mă bruă leh anăn hmar khuăt. Hlăm 1ha hmei krih 10 mnĭt leh yơh, êlâo dih 2 čô krih hlăm sa ha mkrah hruê kơh leh. Kdrăp mrâo mrang jing jăk êdi. Ară anei hmei thơ̆ng yua hbâo brŭ sinh học yua êdeh phiơr krih kơ ana hbei tao jing jăk êdi.

Mâo hĕ bruă blei yua êdeh phiơr amâo mâo mnuih mgăt hlăm bruă lŏ hma mơ̆ng mnuih ƀuôn sang jing klei myun êdi. Cao Xuân Phương, khua kiă kriê êpul hgŭm bruă lŏ hma Thành Tín, să Dăk Nuê, kdriêk Lăk brei thâo, dŭm thŭn êlâo, leh nao čuă dlăng klei bi hmô krih êa drao kơ ana pla mjing hŏng kdrăp anei ti kdriêk Đức Trọng, čar Lâm Đồng, ñu bi klă blei 2 boh mơ̆ng čar Cần Thơ wĭt yua. Phŭn kčưm, êpul hgŭm bruă ruah mă 2 čô pral kdal hĭn, hlăm anăn mâo Phạm Đăng Xuân nao ti anôk čhĭ kdrăp anei čiăng hriăm mgăt. Hlăm bruă ba yua êdei phiơr amâo mâo mnuih mgăt kriê dlăng ana pla mjing dưi bi klă boh tŭ dưn:

 “Hŏng bruă ba yua 2 thŭn hŏng anei, hmei dưi bi hrŏ 30% ênoh prăk kơ êa răng krih kơ ana pla mjing, hbâo pruê, bi hruê ai mă bruă hrŏ mơ̆ng 40 -50% kơ ƀĭng ngă lŏ hma. Kyua êdeh phiơr anei jing kdrăp mrâo mrang hĭn, pô lai êa drao krih msĕ hŏng dhul brei êa drao kma hlăm hla, kyuanăn amâo mâo liê êa drao ôh, êa lu leh anăn kăn hmăi kơ klei suaih pral anak mnuih lei.

Êpul hgŭm bruă lŏ hma Thành Tín, să Dak Nuê, kdriêk Lăk mâo giăm 100 gŏ sang hgŭm, plah êbeh 130 ha hbei tao, gi ăm 700ha mdiê lŏ. Dưn yua kdrăp mrâo mrang, hlăm anăn mâo êdeh hphiơr amâo mâo mnuih mgăt hlăm bruă mkra mjing bruă lŏ hma dưi mđĭ leh hnơ̆ng ana pla mjing, hnơ̆ng tŭ jăk mnơ̆ng dhơ̆ng. Hbei tao mơ̆ng Êpul hgŭm bruă dưi mkăp brei mrô krĭng pla mjing, ba čhĭ êlan phŭn kơ anôk mnia mblei China. Mơ̆ng boh tŭ dưn anăn, mrâo anei, Êpul hgŭm bruă lŏ bi klă blei thiăm 2 boh êdeh phiơr amâo mâo mnuih mgăt čiăng wĭt răng kriê ana pla mjing, grăp boh mâo ênoh êbeh 250 êklăk prăk.