VOV4.Êđê - Ti kdriêk krông Pač čar Daklak mrâo anei mkŏ mjing leh knăm hưn mdah ênoh boh durian tal êlâo mâo ba čhĭ kơ China hlăm êlan phŭn, hlue si hdră mtrŭn klei kuôl kă plah wah Phŭn bruă lŏ hma Việt Nam hŏng Anôk bruă kiă kriê klei mŭt kbiă China. Klei anei pŏk leh klei găl kơ boh durian Việt Nam mâo čhĭ hlăm êlan phŭn truh hŏng anôk mnia mblei prŏng dlông rŏng lăn.

Ênoh mâo ba čhĭ gưl anei truh kơ China jing êbeh 300 tôn mơ̆ng čar Daklak. Anei jing čar mâo ênhă pla mjing boh durian prŏng tal dua hlăm kluôm ala, êdei kơ Tiền Giang, hŏng 15 êbâo ha, boh mnga mâo hlăm thŭn anei truh 170 êbâo tôn. Y – Giang Gry Niê knơng, k’iăng khua knơ̆ng bruă sang čư̆ êa čar Daklak mơak brei thâo, ară anei, čar mâo leh Anôk bruă ksiêm dlăng klei mŭt kbiă ala čar China bi mklă leh 4 mrô knăl anôk đŭng hruh boh durian, lehanăn 23 mrô knăl krĭng pla mjing, jing truh mkrah ênoh mrô knăl krĭng pla mjing hlăm kluôm ala mâo čih yap./.

Y-Khem pô mblang