VOV4.Êđê -  Hruê 17.9 mrâo êgao, ti kdriêk Krông Pač, čar Dak Lak mrâo mkŏ mjing knăm hưn mdah ba čhĭ boh durian tal êlâo hlue si Hră mtrŭn klei kuôl kă plah wah Phŭn bruă lŏ hma leh anăn mđĭ kyar krĭng ƀuôn sang Việt Nam leh anăn Knơ̆ng bruă kriê dlăng mŭt kbiă China. Klei anei pŏk sa klei găl prŏng kơ bruă pla boh durian Việt Nam ba čhĭ kơ anôk mnia blei prŏng hĭn dlông rŏng lăn.

Gưl mdiăng boh durian tal êlâo dưi ba čhĭ klă anăp kơ ala tač êngao hluê Hdră mtrŭn mâo bi mklă plah wah Phŭn bruă Lŏ hma mđĭ kyar krĭng ƀuôn sang Việt Nam lehanăn Knơ̆ng bruă Mŭt kbiă China truh êbeh 300 ton dưi pla mjing ti čar Dak Lak. Anei jing alŭ wăl mâo ênhă pla boh durian prŏng tal 2 mơ̆ng kluôm ala (êdei Tiền Giang) hŏng 15 êbâo ha, hnơ̆ng mâo thŭn 2022 truh 170 êbâo ton.

Y Giang Gry Niê Knơng, K’iăng khua Anôk bruă sang čư̆ êa čar Dak Lak hơ̆k kdơ̆k brei thâo, ară anei, čar mâo leh Knơ̆ng bruă Mŭt kbiă China bi mklă 4 mta mrô đŭng hruh boh durian lehanăn 23 mta mrô krĭng pla (truh giăm mkrah wah mrô krĭng pla mơ̆ng kluôm ala mâo bi mklă). Mbĭt hŏng klei gĭr mơ̆ng Phŭn bruă Lŏ hma mđĭ kyar krĭng ƀuôn sang hlăm hdră bi trông, boh tŭ anei čih lač leh klei gĭr mơ̆ng ƀĭng mă lŏ hma, anôk bruă duh mkra alŭ wăl:"Boh durian dưi ba čhĭ klă anăp kơ ala tač êngao dưi hưn mthâo hlăm Hruê anei snăn dŭm krĭng pla, anôk đŭng hruh boh durian mprăp leh djăp ênŭm lehanăn găn lu gưl ksiêm dlăng mơ̆ng anôk thơ̆ng kơ bruă dua ala čar, djŏ hŏng klei ba mdah, hnơ̆ng čuăn lehanăn ksiêm dlăng mta mnơ̆ng ngă, klei doh êƀăt mnơ̆ng dhơ̆ng, hluê ngă djŏ hdră kơ klei đŭng hruh lehanăn bi mklă phŭn agha anôk pla mjing.

Blŭ ti knăm anei, Khua Phŭn bruă Lŏ hma mđĭ kyar krĭng ƀuôn sang Lê Minh Hoan mñă klă, Hdră mtrŭn kơ bruă ksiêm dlăng mnơ̆ng dhơ̆ng pla dưi bi mklă hlăm hruê 11/07/2022 plah wah Phŭn bruă Lŏ hma mđĭ kyar krĭng ƀuôn sang Việt Nam lehanăn Knơ̆ng bruă ksiêm dlăng klei mŭt kbiă China jing boh tŭ hdră bi trông mơ̆ng dŭm anôk thơ̆ng kơ bruă hlăm wưng sui mơ̆ng dua tĭng. Mbĭt hŏng anăn jing klei hrăm mbĭt mơ̆ng êpul êya, mnuih pla lehanăn ba čhĭ boh durian Việt Nam.

Khua phŭn bruă mñă klă, hdră ba čhĭ boh durian tal êlâo kơ ala tač êngao hluê hdră klă anăp jing klei m’ak mơ̆ng mnuih ƀuôn snag krĭng Yŭ kwar Dhŭng, Ngŏ kwar Dhŭng lehanăn Lăn dap kngư. Anei jing hdră mâo boh tŭ yuôm kyua China jing wăl anôk blei lu boh durian mơ̆ng tar rŏng lăn. Mbĭt hŏng klei găl wăl anôk mnia mblei prŏng, đru kơ anôk bruă duh mkra lehanăn ƀĭng ngă lŏ hma mâo hnư hrui wĭt mơ̆ng mta boh anei, hdră ba čhĭ kơ ala tač êngao klă anăp ăt mâo lu klei lông dlăng kyua mta klei hlăm Hdră mtrŭn klă sĭt jing Hdră mnêč mgô̆ brei tĭng pla, đŭng hruh lehanăn ba čhĭ bi hluê ngă. Khua phŭn bruă Lê Minh Hoan mñă:"Hlăk tar rŏng lăn mâo lu klei bi mlih lehanăn bruă lŏ hma mta, hdră duh mkra bi hgŭm ară anei, klei mĭn “Nao mbĭt” jing mgô̆ brei hluê ngă. Boh durian amâo dah ya mta boh kroh, mnơ̆ng lŏ hma mkăn čiăng kpưn đĭ kbưi hĭn, mjing wăl anôk h’ĭt kjăp, snăn hdră bi hgŭm, mđĭ boh tŭ yuôm mnơ̆ng lŏ hma brei mâo klei sa ai, hrăm mbĭt bi hgŭm gĭr ktưn kpưn đĭ”.

Hluê si Knơ̆ng bruă pla mjing, ênhă boh durian ala čar drei ară anei mâo giăm 90.000 ha hŏng hnơ̆ng mâo grăp thŭn hlăm brô 1 êklăk 300 êbâo ton boh, dưi pla lu ti krĭng Ngŏ kwar Dhŭng, Lăn dap kngư lehanăn krĭng Dap mnai êa krông Cửu Long. Boh durian Việt Nam dưi tĭng dlăng mâo hnơ̆ng tŭ jăk, Bruă dưi ba čhĭ klă anăp jing klei găl yuôm hŏng boh durian lehanăn ƀuăn rơ̆ng srăng ba wĭt boh tŭ dưn hlăm hdră bi trông kơ anăp čiăng lŏ pŏk mlar wăl anôk mnia mblei kơ mta mnơ̆ng lŏ hma Việt Nam wưng ti anăp./.

H’Nêč pô mblang