VOV4.Êđê- Ala čar drei mâo klei găl jing boh mnga bruă lŏ hma lu jơr, lu mta jăk yâo krĭng kwar. Ƀiădah čiăng ba čhĭ dŭm mta anăn mâo klei hơĭt leh anăn kjăp, hdră kčah hŏng ƀĭng ngă lŏ hma, êpul bi mguôp, knơ̆ng bruă jing srăng mâo ênŭm klei thâo ba čhĭ mnơ̆ng dhơ̆ng hlăm anôk mnia mblei mrô, anôk mnia mblei điện tử…

Mkra mjing, ba čhĭ mnơ̆ng dhơ̆ng lŏ hma dŭm thŭn giăm anei mâo nanao klei kdlưn mrâo. Hlue anăn, hlăm wưng êgao, bruă ba čhĭ êa hnuê Việt Nam kơ ala tač êngao msĕ si EU, Mi, boh xoài Sơn La ba čhĭ kơ dŭm anôk dleh hlăm klei bi mnia mblei msĕ si Ăngle, Australia, durian Dak Lak ba čhĭ ti China, vải Lục Ngạn, Bắc Giang dưi bi mni ti Japon, Prăng… brei ƀuh dŭm hdră êlan mkŏ mjing, mđĭ kyar anăn knăl, mđĭ kyar ba čhĭ leh anăn boh nik bruă mkăp klei hâo hưn anôk ba čhĭ kơ ƀĭng ngă lŏ hma dôk mđĭ lar klei tŭ dưn.

Mnơ̆ng dhơ̆ng lŏ hma Việt Nam lu jơr, lu mtă

 Biădah klei tŭ anei ka mđrăm mbĭt hŏng bruă mđĭ kyar anôk ba čhĭ hơĭt kjăp, kyua boh sĭt klei dleh dlan sĭt ba čhĭ mnơ̆ng dhơ̆ng lŏ hma, mnơ̆ng dhơ̆ng jăk dŭm krĭng kwar kyua kdrăp mrâo mkra mjing dôk êdu kƀah, ngă dleh kơ anôk ba čhĭ, kyua wưng kriê pioh bhiâo. Mbĭt hŏng anăn, bruă tŭ mă ba mnơ̆ng dhơ̆ng lŏ hma kơ anôk mnia blei điện tử dleh dlan, kyua klei thâo săng mơ̆ng bruă duh mkra hŏng hdră êlan mnia mblei adôk êdu kƀah. Đinh Thị Tuyết Nhung, Khua Êpul hgŭm bruă ana êa drao leh anăn êpul êya Bắc Kạn lač kơ boh klei:

“Mnơ̆ng dhơ̆ng lŏ hma mâo wưng pioh bhiâo, leh anăn anôk bruă ka mâo ôh knhuah jing leh anăn hdră mnia blei čiăng dưi mâo sa hdră klă klơ̆ng čiăng dưi bi tuôm hŏng phung blei yua anăn bruă mnia blei mnơ̆ng dhơ̆ng hlăm hdră mnia blei ka đei jăk. Hmei čang hmăng tĭng bruă sang čư̆ êa srăng mâo dŭm hdră klă klơ̆ng čiăng đru dŭm anôk bruă dưi ba mnơ̆ng dhơ̆ng kơ anôk mnia blei mnơ̆ng dhơ̆ng prŏng “.

Brei dưi mkŏ mjing anăn knăl kơ mnơ̆ng dhơ̆ng lŏ hma

Čiăng mjing anôk ba čhĭ hơĭt kjăp kơ dŭm mta mnơ̆ng dhơ̆ng lŏ hma, brei dưi mkŏ mjing anăn knăl kơ mnơ̆ng dhơ̆ng, mkŏ mjing knhuah bhiăn anôk bruă duh mkra, Mbĭt anăn jing mđing dlăng lu hĭn kơ bruă mkra mjing mnơ̆ng dhơ̆ng lŏ hma ăt msĕ mơh mâo dŭm hdră êlan iêô jak anôk bruă duh mkra mkra mjing čiăng mđĭ ênoh yuôm mnơ̆ng dhơ̆ng lŏ hma.

 Bi ala kơ Anôk bruă mnia blei điện tử Postmart.vn- Nghiêm Tuấn Anh, Knơ̆ng bruă dang kông Việt Nam brei thâo, mơ̆ng hdră logistics, bruă mnia blei điẹn tử mơ̆ng Dang Kông Việt Nam, mâo leh lu boh durian ba čhĭ kơ Mi, vải kơ Japon, Ơ Rôp… Hlăm boh klei mđĭ kyar bruă mnia blei điện tử, bruă mprăp klei thâo, hdră ngă bruă hlăm hdră mrô kơ ƀĭng ngă lŏ hma jing yuôm bhăn snăk:

“Drei mâo lu mta boh kroh jăk snăk, hnơ̆ng jăk, dưi ba čhĭ hlăm ala čar leh anăn ala tač êngao. Ară anei ƀĭng ngă lŏ hma ti krĭng čư̆ čhiăng, krĭng ƀuôn sang, kdrăp hâo hưn ka đĭ kyar hŏng dŭm čar, ƀuôn prŏng ôh. Kyua anăn, bruă mptăp klei thâo kơ ƀĭng ngă lŏ hma, hmei dlăng anăn jing mrô sa čiăng mjing klei tŭ dưn kơ bruă mnia blei điện tử. Kyua anăn, hmei amâp djŏ knŏng dôk hlăm bruă mtô bi hriăm ƀĭng ngă lŏ hma hdră ba mnơ̆ng dhơ̆ng hlăm bruă mnia blei điện tử ôh, ba yua mnơ̆ng dhơ̆ng diñu ôh ƀiădah mprăp kơ jih jang klei thâo hlăm anôk mnia blei mrô.

Pô mblang: H’Zawut Ƀuôn Yă