Hdră grăp să sa mta mnơ̆ng ƀrư̆ dưi mđing dlăng hĭn, iêô jak klei hgŭm mơ̆ng lu phung mkra mjing. Gưl ksiêm dlăng, dăp tal anei, mâo 30 mta mnơ̆ng hlăm êpul mnơ̆ng ƀơ̆ng, êa mnăm, êa drao mơ̆ng 18 pô jing knơ̆ng bruă, êpul hgŭm bruă leh anăn gŏ êsei mnia blei ti ƀuôn prŏng Ƀuôn Ama Thuôt, kdriêk Krông Pač, Krông H’Nang, Čư̆ M’Gar leh anăn Krông Ana. 

Anei ăt jing dŭm mta mnơ̆ng lŏ hma êdah êdi, mdê hjăn ti dŭm krĭng kwar dưi bi liê kơ hnơ̆ng, phŭn agha, mrô, klă mngač. Truh ară anei, kluôm čar Dak Lak mâo 110 mnơ̆ng dhơ̆ng OCOP mâo mơ̆ng 3-4 mtŭ. Hlăm hdră tă mđĭ kyar mnơ̆ng dhơ̆ng OCOP, čar Dak Lak gĭr truh thŭn 2025 mâo 200 mnơ̆ng dhơ̆ng OCOP, thŭn 2030 mâo 300 mnơ̆ng dhơ̆ng OCOP dưi bi mklă. Dŭm mta mnơ̆ng dhơ̆ng ƀrư̆ jăk hĭn, dưi ba čhĭ hlăm ala čar leh anăn ala tač êngao./.