VOV4.Êđê-Ti ƀuôn prŏng Ƀuôn Ama Thuôt, Êpul hgŭm ƀĭng ngă lŏ hma čar Dak Lak mkŏ mjing knăm pŏk kčưm hruê kăm ba mdah, ba čhĭ boh mnga bruă lŏ hma kdlưn hĭn čar Dak Lak thŭn 2022 leh anăn mtrŭt mjhar hdră bi lông, bi ktưn “Ƀĭng ngă lŏ hma mkra mjing, mnia mblei boh mnga bruă lŏ hma, mnơ̆ng ƀơ̆ng huă doh nao mbĭt hŏng bruă răng mgang wăl hdĭp mda”.

Mkŏ mjing mơ̆ng ară anei truh kơ jih hruê 13/7 kơ anăp, hdră hruê kăm ba čhĭ boh mnga bruă lŏ hma kdlưn hĭn thŭn 2022 dưi mbha jing 2 gưl, hlăm anăn mơ̆ng hruê 7 - 9/7 mkŏ mjing klei hưn mdah, ba čhĭ boh mnga bruă lŏ hma mơ̆ng čar leh anăn mnơ̆ng yua kơ bruă lŏ hma hŏng kdrăp mrâo mrang, bruă lŏ hma doh. Mơ̆ng hruê 10 – 13/7, gưl kdriêk mkŏ mjing klei hưn mdah, ba mdah, ba čhĭ boh ngă bruă lŏ hma mơ̆ng alŭ wăl. Hdră thŭn anei mâo 60 anôk čhĭ mnia mnơ̆ng thơ̆ng mơ̆ng Êpul ƀĭng ngă lŏ hma dŭm kdriêk, wăl krah, ƀuôn prŏng ti čar Dak Lak leh anăn dŭm čar Gia Lai, Kon Tum, Dak Nông, Lâm Đồng An Giang, Đà Nẵng nao hgŭm.

Pô mblang: Y-Ƀel Êban