Hlăm jar knăm mơak kphê Ƀuôn Ama Thuôt tal 8 thŭn 2023, aguah 10-3, ti ƀuôn prŏng Ƀuôn Ama Thuôt êpul hgŭm kphê Ƀuôn Ama Thuôt mkŏ mjing Klei bi lông kar kphê jăk Việt Nam thŭn 2023. Anei jing sa hlăm dŭm mta kñăm mơ̆ng knăm mơak, đru hlue ngă hdră kñăm ba Ƀuôn Ama Thuôt jing anôk truh mơ̆ng kphê dlông rŏng lăn.

Mkŏ mjing mơ̆ng hruê 10 truh hruê 13/3, klei bi lông mâo 33 čô bi lông mơ̆ng 9 čar, ƀuôn prŏng hlăm kluôm ala, hlăm anăn mâo 24 čô bi lông kar hŏng Phin leh anăn 27 čô bi lông kar Pour V60 (jing kar hŏng kdrăp kar leh anăn mơar). Klei bi lông kñăm thâo ƀuh, mpŭ, hưn mdah rup phung mbruă êdah êdi hlăm klei kar kphê, hưn mthâo, hưn mdah, mđĭ kyar kphê jăk Việt Nam, dhar kreh kphê Việt Nam đru mđĭ klei blei yua leha năn ênoh yuôm kphê Việt Nam./.