Dŭm thŭn giăm anei, “Braih Thăng Bình HTB” mơ̆ng Êpul hgŭm bruă lŏ hma Thăng Bình, să Čư̆ Kty, kdriêk Krông Bông mâo lu mnuih blei yua bi mni. Thŭn 2020, “Braih Thăng Bình HTB” dưi bi mklă djăp hnơ̆ng čuăn OCOP 4 mtŭ gưl čar. Boh nik, akŏ thŭn 2022, êpul hgŭm bi mklă ba čhĭ braih kơ ala čar New Zealand, truh 6 ton. Ară anei, “Braih Thăng Bình HTB” mâo leh 26 anôk čhĭ ti 12 čar, ƀuôn prŏng hlăm kluôm ala. Mâo boh tŭ anei, Võ Văn Sơn, Khua Êpul bruă Lŏ hma Thăng Bình brei thâo, jih jang kbiă hruê mơ̆ng hdră bi hgŭm čiăng mđĭ hnơ̆ng tŭ mnơ̆ng dhơ̆ng: “Êlâo adih bi hgŭm čiăng ruh mtlaih klei dleh dlan hlăm bruă pla mjing, ƀiădah leh ruh mtlaih klei anei, ƀĭng ngă lŏ hma lŏ čiăng ruh mtlaih klei dleh hlăm bruă hrui blei anăn jing hdră maketing. Ƀĭng ngă lŏ hma êlâo adih knŏng thâo pla mjing đuič ară anei čiăng hưn mthâo mnơ̆ng brei mâo hdră maketing, anei jing dŭm knhuang nao mâo Êpul bruă đru kơ ƀĭng ngă lŏ hma čiăng ƀrư̆ hưn mthâo truh kơ wăl anôk mnia mblei pprŏng”.

Hŏng dŭm anôk bruă duh mkra ba akŏ hlăm bruă mkăp mnơ̆ng lŏ hma kơ wăl anôk mnia mblei, bruă mtrŭt mđĭ hdră bi hgŭm pla mjing, hrui blei mnơ̆ng dhơ̆ng mjing hdră mkăp mnơ̆ng doh êƀăt jing čiăng êdi kñăm mđing truh kơ hdră pla mjing mnơ̆ng dhơ̆ng mâo boh tŭ yuôm. Êdah êdi msĕ ti Anôk bruă Damaca Nguyên Phương, să Phú Lộc, kdriêk Krông H’Nang, leh nao hgŭm, anôk bruă ƀuăn, ƀĭng ngă lŏ hma dưi hrui blei mnơ̆ng hŏng ênoh čhĭ h’ĭt, êđăp ênang; anôk bruă duh mkra dưi duh bi liê kơ mjeh, mnơ̆ng yua čiăng h’ĭt ai tiê ngă bruă. Mbĭt anăn, anôk bruă duh mkra rơ̆ng phŭn mkăp mnơ̆ng dhơ̆ng, hnơ̆ng tŭ jăk mâo kriê dlăng. Aduôn Nguyễn Thị Thu Phương, khua anôk bruă brei thâo: “Ară anei ƀĭng ngă lŏ hma pla mjing hluê si klei thâo diñu dưi ngă. Hjăn ƀĭng ngă lŏ hma amâo dưi pla mjing mnơ̆ng djăp hnơ̆ng tŭ jăk ôh. Kyua anăn, dŭm anôk bruă duh mkra brei ngă mbĭt čiăng mjing mnơ̆ng jăk msĕ si: Hrui êmiêt djŏ wưng, djŏ mmông čiăng ba wĭt klei tŭ dưn. Ăt msĕ hŏng hdră dlăng kriê si srăng ngă, knŏng ƀĭng ngă lŏ hma amâo dưi ngă klei anei ôh ƀiădah brei mâo wăt anôk bruă duh mkra, anôk bruă knŭk kna đru mbĭt snăn kơh ƀĭng ngă lŏ hma ngă bruă srăng ba wĭt klei tŭ dưn.

Boh sĭt, ti Dak Lak, hdră bi hgŭm mkra mjing mnơ̆ng lŏ hma dôk ƀiă, duh bi liê kơ hdră mkra mjing amâo lu kyua anăn ka dưi mđĭ boh tŭ yuôm mnơ̆ng dhơ̆ng hluê hdră bi hgŭm. Mta mkăn, dŭm anôk bruă duh mkra, êpul hgŭm bruă ka dưi duah “Anôk hrui blei h’ĭt” kyua anăn dleh dưi pŏk mlar hdră bi hgŭm. Klă klơ̆ng, msĕ hŏng cacao, Dak Lak jing krĭng pla truh 1.200 ha, khă snăn hdră bi hgŭm ară anei knŏng mâo 20 0 gŏ êsei hluê êpul bruă hliê, đ’điêt. Klei anei bi hrŏ leh hnơ̆ng tŭ jăk mnơ̆ng dhơ̆ng leh ba hlăm wăl anôk mnia mblei.  Trương Ngọc Quang, Khua anôk bruă Ca Cao Nam Trường Sơn lač snei: “Mđĭ kyar krĭng pla mjing ară anei ti Dak Lak mâo 1.200 ha, snăn brei mâo hdră mđing hĭn čiăng mđĭ kyar. Mơ̆ng anăn đru kơ ƀĭng ngă lŏ hma amâo dah dŭm êpul bruă jhŏng ngă bruă hĭn čiăng diñu thâo hdră bi hgŭm jing sa hlăm dŭm klei čiăng mjêč hlăm hdră mkŏ mjing klei bi hgŭm mđing truh kơ bruă pla mjing h’ĭt kjăp.

Hluê Nguyễn Hoài Dương, Khua knơ̆ng bruă Lŏ hma – mđĭ kyar krĭng ƀuôn sang Dak lak, ară anei, mkŏ mjing hdră bi hgŭm jing hdră msir yuôm bhăn čiăng rơ̆ng anôk hrui blei jăk găl kơ mnơ̆ng lŏ hma. Čiăng đru mđĭ kyar hdră bi hgŭm, Dak Lak dôk pŏk ngă kjăp dŭm Hdră mtrŭn mơ̆ng Knŭk kna mtrŭt mđĭ bruă lŏ bi hgŭm hlăm bruă pla lehanăn hrui blei mnơ̆ng dhơ̆ng. Hlăm anăn, mđing mtrŭt mđĭ hdră mtrŭn duh bi liê msĕ si: Mkra mjing, mkŏ mkra anăn knăl lehanăn bi mklă phŭn agha anôk pla mjing mnơ̆ng. Nguyễn Hoài Dương brei thâo:“Mtô mblang đru mjing klri găl kơ alŭ wăl, krĭng hlăm čar. Boh nik mđing kơ dŭm krĭng mâo lu klei găl kơ mnơ̆ng jăk snăn hdră bi hgŭm hrui blei mnơ̆ng yuôm êdi hlăm hdră mjing boh tŭ yuôm mnơ̆ng. Bi mklă bruă anei, knơ̆ng bruă hưn leh hŏng Anôk bruă sang čư̆ êa čar bi mklă hdră đru, mơ̆ng anăn bi hgŭm hŏng alŭ wăl lehanăn dŭm krĭng hlăm kluôm ala čiăng hrui blei mnơ̆ng hlăm wưng ti anăp.

Dak Lak ară anei mâo êbeh 390 êpul bruă lŏ hma lehanăn êbeh 90 anôk bruă duh mkra blei – ba čhĭ mnơ̆ng kơ ala tač êngao. Mnơ̆ng lŏ hma mơ̆ng čar truh leh ti 68 ala čar, krĭng lăn tar rŏng lăn, boh nik ti Mi, Japon, Angle, Prăng… Anei jing tur knơ̆ng yuôm hlăm bruă hluê ngă hdră bi hgŭm bruă lŏ hma. Tơdah Dak Lak mđĭ lar jăk hdră bi hgŭm srăng đru mguôp yuôm bhăn hlăm klei tĭng dlăng hnơ̆ng tŭ mnơ̆ng lŏ hma, mđĭ boh tŭ yuôm lehanăn bruă ngă lŏ hma h’ĭt kjăp ti anăp klei amâo h’ĭt mơ̆ng wăl anôk mnia mblei./.