VOV4.Êđê - Hrue mbrue (20/9), ti ƀuôn prŏng Ƀuôn Ama Thuôt, Knơ̆ng bruă sang čư̆ êa čar Daklak mkŏ mjing leh klei bi kƀĭn kơ klei găl, lehanăn klei lông dlăng kơ boh mnga jing mnơ̆ng phŭn mơ̆ng Daklak leh Việt Nam nao hlăm klei kuôl kă mnia mblei êngiê mrâo (FTA).

Tui si anôk hâo mdah, boh mnga mơ̆ng čar Daklak mâo čhĭ leh truh kơ 80 ala čar. Msĕ si kphê, tiu, ksu, êa hnuê truh kơ Mi, Japon, EU. Siămdah ênoh ênil bi mnia mblei boh mnga mơ̆ng čar Daklak amâo mâo hơĭt ôh, lu jing mnơ̆ng ka mkra mjing lŏ čhĭ kơ ala čar dôk krah wah, kyuanăn ênoh čhĭ amâo mâo yuôm ôh.

Bi trông ti anôk bi kƀĭn, phung thơ̆ng kơ bruă bi lač, klei tă hdră mă bruă kơ anăp jing yuôm bhăn hlăm klei mkra mjing doh, bi mâo hdră êlan ksiêm bi kjăp, rơ̆ng bi djăp ênoh čuăn mơ̆ng anôk bi mnia mblei, mă bruă hŏng klei klă mngač kơ jih jang boh mnga pô čhĭ./.

Y-Khem pô mblang