Leh dŭm gưl hjan mlan 7, lu phung knuă druh mơ̆ng dliê knŭk kna mkuôm Yŏk Đôn mgăt êdeh dŭ mdiăng dŭm êtuh phŭn ana Čĭm phĭ mơ̆ng đang rah mjeh ba ti wăl dliê 526 čiăng pla mjing. Nguyễn Trung Hiếu, k’iăng khua adŭ bruă kreh knhâo leh anăn bi mguôp tar rŏng lăn, dliê knŭk kna mkuôm Yŏk Đôn brei thâo, 100% ana mjeh dưi rah ti đang war, asăr mjĕ mă mơ̆ng dŭm ana prŏng hlăm đang war. Hlăm klei ksiêm duah mjeh dưi hluê ngă mơ̆ng giăm 2 thŭn êlâo, truh kơ ară anei, dưi ruah leh anăn pla êbeh 1.000 phŭn mjeh ti lu ênhă dliê. Nguyễn Trung Hiếu kah mbha kơ bruă rah mjeh leh anăn pla dliê hŏng ana čĭm phĭ ti dliê knŭk kna mkuôm Yŏk Đôn hlăm wưng êgao.

        “Tlal êlâo pô nao ksiêm dlăng dŭm krĭng mâo ana čĭm phĭ, leh anăn yap dŭm ana mâo, leh kơnăn mkŏ mjing wăl ana kyâo. Leh anăn bi klă klei čăt đĭ hlăm dliê mơ̆ng ana čĭm phĭ ti dŭm wăl dliê êdrah mơ̆ng dliê knŭk kna mkuôm Yŏk Đôn. Hmei mâo klei mơak êdi, kyua dưi đru mguôp hlăm bruă kriê pioh ana mjeh kyâo yuôm bhăn ana čĭm phĭ kơ dliê knŭk kna mkuôm Yŏk Đôn.”

            Ana čĭm phĭ jing ana kyâo prŏng, boh dlông kreh truh 25m, boh prŏng truh kơ 1m. Ti čar Dak Lak, ana kyâo anei mâo lu hlăm dliê knŭk kna mkuôm Yŏk Đôn, dliê knŭk kna muôm Ea Sô…Kyâo čĭm phĭ jing kyâo khăng, kjăp, êlan druêh (gru atao) siam, jing kyâo yuôm mrô sa hlăm klei krah rup leh anăn ngă pưk sang. Lu thŭn êgao, kyua klei mă yua lu, ngă kơ mta ana anei ƀrư̆ hruê ƀrư̆ luč ram.

Nguyễn Hữu Tạo – k’iăng khua kiă kriê anôk bruă răng mgang dliê knŭk kna mkuôm Yŏk Đôn brei thâo, ară anei hlăm dliê knŭk kna mkuôm Yŏk Đôn knŏng dôk mă ti gŭ dlông 200 phŭn ana čĭm phĭ prŏng, tơdah amâo mâo hmao lŏ bi lar mjeh, klei huĭ hyưt ana kyâo anei srăng luč hlăm dliê jing lu êdi. Hluê si Nguyễn Hữu Tạo, bruă ksiêm duah, rah mjeh ana kyâo yuôm bhăn dưi đru kriê pioh, mkŏ mjing gen yuôm, đru mđĭ kyar dliê kjăp, ăt msĕ hŏng rơ̆ng klei lu jơr mnơ̆ng dhơ̆ng hdĭp. Nguyễn Hữu Tạo brei thâo:

        “Hmei mâo leh hdră êlan ksiêm duah kreh knhâo čiăng lŏ dơ̆ng kriê pioh mđĭ kyar ana Čĭm phĭ. Ară anei dưi rah mjeh tŭ jing, leh anăn dôk ksiêm dlăng dŭm anôk pla mjing ti dŭm ênhă lăn djŏ guôp, leh kơnăn srăng mbha ana mjeh kơ mnuih ƀuôn sang pla mjing leh anăn pŏk mlar thiăm. Bruă mđĭ kyar ana čĭm phĭ srăng đru mđĭ kyar klei hdĭp mda mnuih ƀuôn sang”.

            Dliê knŭk kna mkuôm Yŏk Đôn ti čar Dak Lak mâo ênhă prŏng tal 2 hlăm kluôm lăn čar, hŏng êbeh 115.000ha dliê. Dliê tinei mâo wăl mnơ̆ng hdĭp lu jơr, pluă mbĭt dliê mtah, dliê kreh mtah leh anăn dliê luh hla hluê yan. Hluê si hdră kčah, hlăm yang hjan thŭn 2023 anei, dliê knŭk kna mkuôm Yŏk Đon srăng mtrŭt mđĭ bruă rah mjeh leh anăn mkăp brei hlăm brô 3.000 phŭn ana čĭm phĭ mjeh kơ mnuih ƀuôn sang krĭng jĕ giăm čiăng pla leh anăn mđĭ kyar dliê ti alŭ wăl./.