Ayŏng Nguyễn Lê Duy, să Ea Tar, kdriêk Cư M’gar, čar Dak Lak mâo êbeh 10 durian mjeh dona. Ñu brei thâo, wưng hrui pĕ êlâo gŏ sang ñu mâo giăm 200 tôn boh mtah, čhĭ ti đang hŏng ênoh 42.000 prăk hlăm sa kg, dưi hrui wĭt 8 êklai 400 êklăk prăk. Hlăm wưng hrui pĕ thŭn anei, đăo tĭng hnư hrui wĭt răng mâo 2 blư̆ mkă hŏng êlâo anăn kyua ênoh čhĭ đĭ yuôm. Ayŏng Nguyễn Lê Duy brei thâo:

         “Msĕ thŭn êlâo čhĭ hlăm brô 40.000 prăk hlăm sa kg, bi ară anei mơ̆ng 60 – 70.000 prăk hlăm sa kg, leh anăn arăng hiu duah blei leh. Mâo ênoh msĕ sơnei ƀĭng ngă lŏ hma hmei mơak sơnăk, mnuih ƀuôn sang hur har duh bi liê, kriê dlăng ana durian anei.”

Ăt mơak kyua durian mâo ênoh, msĕ si Ngô Công Lương, ti să Ea Yông, kdriêk Krông Pač, ka bi klă ôh klei kuôl kă čhĭ đang durian 180 phung mjeh dona pla pluă hŏng ana kphê. Ñu brei thâo, grăp hruê mâo lu phung hriê dlăng leh anăn čiăng blei jih jang boh durian:

         “Lač kluôm ară anei mâo anôk blei 72 êbâo hlăm sa kg, leh anăn mâo lu sang mă leh prăk êlâo, grăp ha diñu kreh mă 400 – 500 êklăk prăk. Sang kâo ka ruăt ôh, kyua ênoh ka klă. Êla truh dơ̆ng khăt sa hruê kăm srăng bi klă yơh, mmông anăn hlei hriê blei hlŏng čhĭ yơh.”

            Krông Pač jing krĭng pla mjing durian lu hĭng ti čar Dak Lak hŏng êbeh 7.100ha, hlăm anăn êbeh 3000 ha dôk hrui pĕ. Durian tinei lu jing mjeh dona leh anăn Ri6. Kreh mâo mơ̆ng 18 – 20 tôn boh hlăm sa ha. Nguyễn Huy Hoàng, khua adŭ bruă lŏ hma leh anăn mđĭ kyar krĭng ƀuôn sang kdriêk Krông Pač brei thâo, thŭn anei, yan adiê dleh đăo knăl, mâo đa đa đang pla mjing luh mnga leh anăn boh mda lu. Ƀiădah kyua klei kriê dlăng jăk, dŭm boh dôk đuôn siam, prŏng, leh anăn ăt dôk mâo boh.

  “Kdriêk Krông Pač mâo lu boh durian. Arăng mnuih ƀuôn sang dôk kriê dlăng, leh anăn hlăm brô 45 hruê srăng hrui pĕ. Akŏ wưng hruê pĕ, bruă sang čư êa kdriêk srăng mâo hdră êlan ksiêm dlăng leh anăn ngă jăk bruă hâo hưn kơ mnuih ƀuôn sang leh anăn răng mgang klei êđăp ênang hlăm alŭ wăl ăt msĕ hŏng răng mgang ngăn drăp mnuih ƀuôn sang.”

Kluôm čar Dak Lak ară anei mâo 22.500 ha durian, hlăm anăn mâo 10.000ha dôk hrui pĕ. Thŭn dih mâo 170.000 tôn boh, hnư hrui wĭt êbeh 9.500 êklai prăk. Wưng hrui pĕ thŭn anei, mĭn tĭng ti čar Dak Lak năng ai mâo 185.000 tôn boh. Ară anei ksiêm dlăng ti dŭm đang pla mjing ti Krông Pač, Krông Năng, Ƀuôn Hồ, Čư̆ Mgar… ênoh hrui blei mơ̆ng 65 – 75 êbâo hlăm sa kg, tui hluê mjeh dona amâodah Ri6 leh anăn hnơ̆ng tŭ jăk. Ênoh yuôm leh anăn mâo lu boh, durian ti čar Dak Lak thŭn 2023 anei ƀuăn srăng ba wĭt hnư prăk lu hĭn kơ ƀĭng ngă lŏ hma.