Hlăm sa klei kƀĭn grăp tuôr mơ̆ng ƀuôn Khung Nhung, să Quản Bạ, Khua ƀuôn ruah mmông kƀĭn jing 7 mmông krah mmăt leh anăn yua boh blŭ alŭ wăl hlăm klei kƀĭn. Anăn jing hdră êlan jăk hĭn čiăng kơ bruă sang čư êa alŭ wăl dưi bi kƀĭn ênŭm mnuih ƀuôn sang hlăm ƀuôn čiăng hưn mthâo, mbĭt anăn anei ăt jing hdră čiăng mđĭ hmư̆ klei wĭt lač mơ̆ng mnuih ƀuôn sang hŏng dŭm gưl bruă sang čư êa.

Aduôn Cư Thị Sông, mnuih ƀuôn sang ti ƀuôn Khung Nhung, să Quản Bạ brei thâo: Kyua mâo klei kƀĭn ƀuôn, grăp čô dưi thâo klă nik dŭm hdră mtrŭn, hdră êlan mơ̆ng Đảng, knŭk kna čiăng hluê ngă. Ăt kyua mâo klei hâo hưn, mnuih ƀuôn sang dưi mâo hdră ngă mrâo mrâo čiăng mkŏ mjing klei hdĭp trei mđao yâo mơak”.

Ăt msĕ hŏng lu mnuih ƀuôn sang djuê ƀiă ti ƀuôn Khung Nhung. Khădah mâo klei kƀah hlăm klei blŭ leh anăn klei hriăm, ƀiădah klei hmăng hmưi mâo klei mdrŏng sah ăt mâo nanao, leh lu blư̆ nao hlăm klei kƀĭn ƀuôn leh anăn hmư̆ khua ƀuôn, k’kiăng khua ƀuôn bi trông kơ hdră bi mdrŏng, ayŏng Lý Tà Bâu, ti ƀuôn Trúc Sơn, să Quản Bạ jhŏng nao ti anôk bruă sang čư êa să čiăng ksiêm hriăm kơ klei bi hmô mkra mjing, tlaih mơ̆ng klei ƀun ƀin. Ti să, Ayŏng Bâu mâo knuă duh să mtô lač jih hnơ̆ng, mtô brei klei mŭt hlăm mbah Internet hlăm măi tính, brei kơ ayŏng dŭm boh blŭ kliăng čiăng tui duah dŭm mta phŭn pô uêñ mĭn, Phŭn kčưm ka thâo bĭt bla mơh, ƀiădah leh kơnăn, ayŏng Bâu mâo klei hơ̆k mơak leh thâo dŭm klei hưn kơ dŭm klei bi hmô rông bê hlăm Internet.

“Sang kâo čiăng mđĭ kyar klei hdĭp mda hŏng bruă rông bê. Kâo hmư̆ phung mah jiăng jum dar lač hlăm să mâo klei bi hmô rông bê hlăm mạng măi tính anăn, leh anăn kâo nao êmuh ti să, knuă druh să mtô lač kơ pô leh anăn brei pô dlăng hmăi măi, kâo buh boh tŭ dưn leh anăn hmăng hmưi leh dlăng čiăng wĭt mđĭ kyar klei hdĭp mda hŏng bruă rông bê msĕ hlăm măi tính anăn”.

Hluê si ayŏng Lệnh Thế Tú, Knuă druh klam bruă mkŏ mkra krĭng ƀuôn sang mrâo să Quản Bạ, kdiêk Quản Bạ, čar hà Giang, mơ̆ng hruê ayŏng wĭt ngă bruă ti să, ayŏng mâo nanao klei mñă mơ̆ng mnuih ƀuôn sang brei diñu dlăng dŭm klei bi hmô rông mnơ̆ng mâo boh tŭ dưn hlăm măi tĭnh. Ayŏng Tú ƀuh mnuih ƀuôn sang pô hlăm să khădah mâo klei kƀah thâo blŭ klei yuăn ƀiădah diñu mâo nanao klei hmăng hmưi tlaih mơ̆ng klei ƀun ƀĭn, klei ư̆ êpa. Kyuanăn, grăp blư̆ sĭt mâo pô brei ayŏng pŏk măi tính čiăng dlăng, ayŏng mâo nanao klei hur har mtô kơ mnuih ƀuôn sang yua, mŭt dlăng internet.

Hà Giang jing sa hlăm dŭm čar ƀun hĭn hlăm kluôm ala, mbĭt anăn alŭ wăl mâo truh kơ 22 djuê anăn mnuih djuê ƀiă, hŏng hlăm brô 800.000 čô mnuih, hlăm anăn mâo êbeh 90% jing mnuih djuê ƀiă dôk hdĭp mda hlăm 2.000 alŭ ƀuôn. Hŏng lăn ala dleh dlan, klei mưng hdĭp rưng, ti dŭm krĭng čư̆ čhiăng, kyuanăn bruă ba klei haoa hưn truh kơ mnuih ƀuôn sang ăt jing klei dleh dlan hŏng phung knuă druh alŭ wăl. Thào Thái Tâm, pô bi ala bruă sang čư êa să Quản Bạ brei thâo:

“Hlăm dŭm thŭn êgao, bruă hâo hưn ti alŭ wăl să Quản Bạ dưi mâo klei uêñ mĭn êdi, boh nik hŏng bruă hâo hưn klă anăp. Bi hŏng klei hâo hưn anei, hmei tiŏ nao dŭm êpul dhar bruă bi mguôp hŏng Dhar bruă mặt trận să hâo hưn klă anăp hŏng grăp alŭ ƀuôn, grăp gŏ sang, hmei hâo hưn klă anăp hŏng kdrăp mđung asăp blŭ să truh kơ grăp alŭ ƀuôn”.

Hdră hâo hưn hŏng knhuah krĭng wăl, yua boh blŭ alŭ wăl, hluê si klei bhiăn djuê ana hlăm alŭ wăl čiăng ruah hdră hâo hưn, bi mlih klei thâo săng kơ mnuih ƀuôn sang jing mnuih djuê ƀiă ti krĭng dlông. Ƀiădah, čiăng kơ phung ngă bruă hâo hưn mâo ênŭm klei hưn, klei hưn sĭt, djŏ mmông, ăt jing bruă klam mơ̆ng dŭm anôk bruă kriê dlăng dŭm gưl ti Hà Giang. Nguyễn văn Hưng, k’iăng khuă Êpul bruă hâo hưn čar Hà Giang brei thâo:

“Čar Hà Giang dôk duh bi liê đru kơ dŭm anôk bruă si srăng ngă čiăng ba kdrăp hâo hưn truh kơ alŭ ƀuôn hŏng hdră tŭ dưn leh anăn ăt mñă leh hŏng knŭk kna, čiăng lŏ dơ̆ng uêñ mĭn hŏng čar Hà Giang duh bi liê bruă mkŏ mkra čiăng hâo hưn kơ alŭ ƀuôn ăt msĕ hŏng bruă hâo hưn kơ nah gŭ ƀrư̆ hruê ƀrư̆ mâo boh tŭ dưn hĭn.

Čiăng ruh mgaih klei dleh dlan, bruă sang čư êa dŭm gưl, boh nik jing dŭm anôk bruă hâo hưn hlăm alŭ wăl čar Hà Giang ăt dưn yua jih hnơ̆ng ai dưi, kdrăp yâo dôk mâo, bi lu jơr hdră hâo hưn hlăm alŭ wăl hŏng bruă dưn yua hdră hâo hưn lu mta. Êngao kơnăn, sa hdră êlan mâo čar Hà Giang dlăng yuôm bhăn, anăn jing bi mguôp hŏng êpul lĭng kahan hlăm alŭ wăl, boh nik jing lĭng kahan knông lăn ti dŭm krĭng dlông knông lăn čiăng mâo klei hưn klă sĭt, hmar truh kơ mnuih ƀuôn sang.