Klei doh êƀăt sinh học (ATSH) jing dŭm hdră msir gang mkhư̆ lehanăn bi hrŏ klei đĭ lar mơ̆ng kman klei ruă tưp truh ti mnơ̆ng rông, anak mnuih lehanăn wăl hdĭp mda. Čiăng rơ̆ng klei doh êƀăt sinh học brei hluê ngă kjăp dŭm mta si tigŭ anei:

1/. Hluê ngă hdră bi ktlah, ksiêm dlăng.

Krĭng rông mnơ̆ng mâo mnư̆ gang čiăng bi ktlah hŏng krĭng mnuih ƀuôn sang dôk, êlan klông găn êrô.

Bi ktlah krĭng rông ŭn knô, ŭn ana, ŭn êđai, ŭn mă kđeh čĭm lehanăn dŭm mta mnơ̆ng rông mkăn.

Dưm pŏk mdhă ktrâo lač, kăm, klei bhiăn ti dŭm krĭng rông mnơ̆ng. Ksiêm dlăng jih jang mnuih mŭt, kbiă hlăm krĭng rông mnơ̆ng.

Ksiêm dlăng mjeh: Blei mjeh mơ̆ng dŭm anôk thâo klă phŭn agha, dưi tlŏ mgang vaccine djăp ênŭm. Hluê ngă hdră bi ktlah djŏ si klei kčah mtrŭn (14 hruê êlâo kơ mŭt hlăm êpul mnơ̆ng rông).

Ksiêm dlăng kjăp êdeh êdâo mdiăng mnơ̆ng dhơ̆ng mŭt, kbiă hlăm krĭng rông mnơ̆ng.

Ksiêm dlăng kjăp êa mnăm, mnơ̆ng ƀơ̆ng.

- Gang mkhư̆ hlô mnơ̆ng, dŭm mta mnơ̆ng đ’điêt lehanăn mnơ̆ng rông mkăn mŭt hlăm krĭng rông.

-2/. Hdră bi mdoh.

- Bi mdoh nanao war rông, mtih, kniêm.

Grăp gưl bi mdoh krĭng djiêu gah war rông.

- Bi mdoh, mdjiê kman leh grăp gưl rông.

3/. Mdjiê kman.

- Grăp gưl krih êa drao mdjiê kman hlăm war rông lehanăn krĭng djiêu gah găn 1 hruê kăm/1 blư̆. Tơdah mâo klei ruă tưp drei krih êa drao mdjiê kman hluê klei mtă mơ̆ng anôk bruă mdrao mgŭn mnơ̆ng rông.

- Mdjiê kman kdrăp mnơ̆ng, kdrăp yua hlăm klei mă bruă êlâo lehanăn êdei kơ ba yua.

- Kdrăp yua hlăm bruă mdrao mgŭn mnơ̆ng rông brei bi mdoh nanao lehanăn mdjiê kman êlâo lehanăn êdei kơ ba yua.

- Rơ̆ng klei doh êƀăt êlâo kơ mdjiê kman. Ba yua mta mdjiê kman djŏ guôp (Djŏ hnơ̆ng, djŏ wưng).

-Čiăng gang mkhư̆ klei ruă tưp ti ŭn brei drei hluê ngă hdră dlăng kriê ŭn hluê grăp wưng rông.

Hluê ngă kjăp klei bhiăn rông rơ̆ng klei doh êƀăt sinh học

Hluê ngă hdră tlŏ mgang djăp ênŭm dŭm mta vaccine.

-Čiăng gang mkhư̆ klei ruă tưp ti ŭn mă kđeh čĭm, hdră tlŏ vaccine lehanăn ba yua êa drao dưi mtă snei:

         - Leh ŭn mâo 2 hruê, drei tlŏ Mta msei (10%) 2 ml/drei čiăng gang mkhư̆ klei kƀah êrah.

- Leh ŭn mâo 7 hruê drei lŏ tlŏ aruăt 1 vaccine gang mkhư̆ klei ruă mtŭk, dleh bi êwa: Res-Vac; tlŏ aruăt tal 2 lŏ mñă wĭt leh ŭn mâo 21 hruê kñăm gang mkhư̆ klei ruă hlăm ksŏ.

- Leh ŭn mâo 28 truh kơ 32 hruê drei tlŏ aruăt tal 1 vaccine klei ruă ô̆ eh (HC-Vac); tlŏ aruăt tal 2 leh ŭn mâo mơ̆ng 50 – 54 hruê kñăm gang mkhư̆ klei ruă anei.

          - Leh ŭn mâo mơ̆ng 50 truh kơ 54 hruê drei tlŏ vaccine gang mkhư̆ klei ruă kplač ƀăng êgei êluôč kčuôp.

Čiăng gang mkhư̆ klei ruă kơ ŭn, hdră tlŏ mgang vacccine drei hluê ngă snei:

-  Ŭn mprăp ngă mjeh: Tlŏ vaccine gang mkhư̆ klei ŭn ruă tian ô̆ eh leh ŭn mâo 6,5 mlan truh kơ 7 mlan, tlŏ vaccine kplač ƀăng êgei êluôč kčuôp aruăt tal 1 hlăk 6,5 mlan, aruăt tal 2 leh mâo 7 mlan.

- Hŏng ŭn ana rông êđai: Tlŏ vaccine klei ŭn ruă tian ô̆ eh leh ŭn anei mđai mơ̆ng 12 truh 14 hruê, vaccine kplač ƀăng êgei êluôč kčuôp leh mđai mơ̆ng 17 truh 19 hruê.

- Hŏng ŭn knô drei dưi tlŏ vaccine hlăm mlan 3 lehanăn mlan 9 grăơ thŭn.

-Hdră msir mghaih ŭn djŏ klei ruă: Tơdah ŭn bi êdah mâo klei ruă, brei drei bi ktlah mtam.

Tơdah ŭn djiê lehanăn đĭ lar kman klei ruă brei hưn mthâo hŏng anôk bruă mdrao mgŭn mnơ̆ng rông ti alŭ wăl.

Hrui mƀĭn djah djâo, ŭn djiê, ba čuh dơr hluê si klei ktrâo lač mơ̆ng anôk bruă mdrao mgŭn mnơ̆ng rông. Amâo dŭ mdiăng, čhĭ, tă čuh ŭn ruă, ŭn djiê. Amâo duah hwiê ŭn ruă, ŭn djiê pliă plia hlăm wăl hdĭp mda.