VOV4.Êđê- Hlăm klei bi kƀĭn hŏng phung čih klei mrâo mkŏ mjing tlam 3/10 ti Hà Nội, K’iăng Khua phŭn bruă lŏ hma leh anăn mđĭ kyar krĭng ƀuôn sang Phùng Đức Tiến bi mklă, srăng kƀĭn dŭm hdră msir kơ anôk ba čhĭ gĭr ktưn truh hdră kñăm 50 êklai đôlar prăk ba čhĭ mnơ̆ng dhơ̆ng lŏ hma, kan hdang kơ ala tač êngao hlăm thŭn anei. Mơ̆ng 9 mlan, bruă lŏ hma lŏ dơ̆ng mđĭ lar hnơ̆ng đĭ kyar man dưn hŏng hnơ̆ng dŭm mta mnơ̆ng dhơ̆ng lŏ hma ba čhĭ kơ ala tač êngao phŭn. Mkă hŏng wưng anei thŭn dih prăk čhĭ mnơ̆ng dhơ̆ng lŏ hma kan hdang 9 mlan akŏ thŭn đi 15,2 %, đăo tĭng hlăm brô 40,8 êklai đôlar. Mâo 7 mta mnơ̆ng dhơ̆ng mâo ênoh yuôm ba čhĭ kơ ala tač êngao êbeh 2 êklai đôlar.  Hlăm dŭm mlan knhal jih thŭn, Phŭn bruă lŏ hma leh anăn mđ kyar krĭng ƀuôn sang srăng lŏ dơ̆ng mđĭ ktang hdră, mđĭ hnơ̆ng, klei tŭ dưn mkra mjing, mnia blei, ktrâo lač, tă hdră dŭm alŭ wăl, boh nik dŭm krĭng phŭn kơ mkra mjing mdiê, rông mnơ̆ng, kan hdang mâo hdră kčah mkra mjing djŏ guôp hŏng anôk čhĭ mnia./.

Pô mblang: H’Zawut Ƀuôn Yă