Ti krah đang trŏng msăm rơ̆k čăt đĭ mtah mda ƀiădah ăt mâo boh lu, amai Nguyễn Thị Loan, ti să Dak Hà, kdriêk Dak Glŏng, dôk pral kngan pĕ dŭm boh siam ksă hrah. Amai hơ̆k mơak, mơ̆ng hruê bi mguôp pla mjing djam mtam doh mbĭt hŏng êpul hgŭm bruă, gŏ sang amai mâo leh hnư hrui wĭt hơĭt:

        Êlâo dih dleh sơnăk mâo anôk ba čhĭ, ba ti sang čhĭ mnia ênoh êlưih. Ară anei mâo leh êpul hgŭm bruă ba čhĭ kơ pô, pô knŏng pla leh anăn mâo mnơ̆ng dhơ̆ng jăk srăng mâo prăk mnga leh anăn dưi đĭ kyar.

       Đặng Ngọc Hương, Khua kiă kriê Êpul hgŭm bruă lŏ hma Dak Hà, kdriêk Dak Glŏng brei thâo, anôk bruă dôk bi mguôp hŏng giăm 100 gŏ sang ƀĭng ngă lŏ hma ngă bruă ti krĭng pla mjing êbeh 300ha. Mnơ̆ng dhơ̆ng jing djam mtam doh mâo phung čhĭ mnia mơ̆ng ƀuôn prŏng Hồ Chí Minh hrui blei jih. Tŭ jing mơ̆ng anăn êlâo hĭn jing mơ̆ng klei bi mguôp kjăp hŏng ƀĭng ngă lŏ hma čiăng mkra mjing mnơ̆ng dhơ̆ng tŭ jăk:

        “Yuôm bhăn hĭn jing dưi bi mguôp, mơ̆ng hâo hưn mtrŭt mjhar čiăng mkŏ mjing klei bi mguôp, mkŏ mjing êpul êya bi mguôp kơh dưi đĭ kyar ktang.”

          Ăt hluê hdră bi mguôp kjăp mkra mjing bruă lŏ hma mnơ̆ng dhơ̆ng, Êpul hgŭm bruă Thịnh Phát, ti să Quảng Sơn, kdriêk Dak Glŏng, mâo leh dŭm klei kuôl kă mnia mblei hơĭt dŭm mta mnơ̆ng dhơ̆ng djam mtam, boh nik jing djam bei kprêñ. Aduôn Nguyễn Thị Toản, khua kiă kriê Êpul hgŭm bruă brei thâo:

“Ară anei hmei dôk bi mguôp hŏng sa knơ̆ng bruă mnơ̆ng ƀơ̆ng huă mơ̆ng Việt Nam, jing mkra pla mjing djam hbei kprêñ čiăng mkra mjing kimchi Dhŭng Korea ti sang măi Long ăn leh anăn ti Đức Trọng, Lâm Đồng. Mrâo anei hmei ăt bi klă klei kuôl kă hŏng sa knơ̆ng bruă ti Nâm Nung. Grăp hruê mnuih ƀuôn sang ăt hriê ba djam hbei, tal 1 ba ti Long An, tal dua jing ba ti Đức Trọng leh anăn tal 3 hrui blei tinăn mtam”.

          Ară anei kluôm čar Dak Nông mâo 65 klei bi mguôp mkra mjing, ba čhĭ boh mnga bruă lŏ hma hŏng hlăm brô 10.000 gŏ sang nao hgŭm. Anei jing ênoh ƀiă mkă hŏng boh sĭt bruă lŏ hma ti čar anei. Phạm Tuấn Anh, Khua kiă kriê knơ̆ng bruă lŏ hma leh anăn mđĭ kyar krĭng ƀuôn sang čar Dak Nông brei thâo, čar mâo 4 mta bruă phŭn kơ ana pla mjing sui thŭn, hlăm anăn kphê leh anăn tiu mâo ênhă leh anăn boh mngă mrô 1 alŭ wăl krĭng Lăn Dăp Kngư. Êngao kơnăn jing dŭm mta mnơ̆ng dhơ̆ng mâo klei găl jing ana ƀơ̆ng boh dŭm mta (hlăm brô 15.000 ha mâo durian, boh ƀơr, kruê̆ hruê̆, soai, maka), dŭm mta djam mtam, hbei… ăt ƀeh 15.000ha.

          Tui duah anôk mnia mblei kơ boh mnga bruă lŏ hma, dŭm knơ̆ng, dhar bruă, alŭ wăl ti Dak Nông mâo leh lu blư̆ ksiêm dlăng hdră mnia mblei ti dŭm anôk čhĭ mnia phŭn, sang čhĭ mnia prŏng ti ƀuôn prŏng Hồ Chí Minh, mkŏ mjing klei kƀĭn čiăng kơ knơ̆ng bruă mbĭt hŏng ƀĭng ngă lŏ hma, êpul hgŭm bruă bi trông, duah klei blŭ mbĭt, iêo jak dŭm knơ̆ng bruă duh bi liê hlăm bruă mkra mjing. Phạm Tuấn Anh, brei thâo, čar dôk mtrŭt mđĭ bruă duh mkra êpul čiăng mkŏ hŏng hŏng ƀĭng ngă lŏ hma mkŏ mjing krĭng pla mjing, mđĭ hnơ̆ng tŭ jăk mnơ̆ng dhơ̆ng, ƀrư̆ mkŏ mjing boh tŭ dŭm mta mnơ̆ng dhơ̆ng bruă lŏ hma.

“Dhar bruă lŏ hma hmei srăng lŏ dơ̆ng mkŏ mjing dŭm krĭng pla mjing hluê si mta mnơ̆ng dhơ̆ng, hlăm thŭn anei jing kñăm tal êlâo kơ kphê kyua anei jing ana pla mjing phŭn, leh anăn srăng ngă hŏng dŭm mta mnơ̆ng mkăn. Leh anăn grăp krĭng pla mjing srăng mâo dŭm êpul hgŭm bruă jing pô mkŏ hŏng dŭm knơ̆ng bruă nah êgao. Leh anăn diñu jing pô đru kơ ƀĭng ngă lŏ hma hlăm bruă mkra mjing, mkŏ klei ba čhĭ, wăt kơ klei ngăn prăk.”

          Čar Dak Nông ară anei mâo 3 Êpul hgŭm dŭm êpul hgŭm bruă. 193 êpul hgŭm bruă lŏ hma leh anăn dŭm êtuh êpul bi mguôp, đang war hlăm bruă anei. mbĭt hŏng anăn ƀrư̆ ƀrư̆ bi mâo ênŭm dŭm klei găl čiăng bi mguôp, Dak Nông ăt mđing truh kơ bruă lŏ hma lu boh tŭ, dŭm klei bi hmô pla mjing kphê, ana ƀơ̆ng boh bi mguôp hŏng bruă hiu čhưn ênguê, čuă dlăng… Anei jing dŭm knhuah nao djŏ čiăng mđĭ kyar bruă lŏ hma klă sĭt jing sa hlăm 3 kmeh gơ̆ng bruă duh mkra mơ̆ng Dak Nông hluê si Hdră mtrŭn mơ̆ng Klei kƀĭn bruă Đảng čar mdưm leh hlăm wưng kơ anăp.