VOV4.Êđê - Mơ̆ng hrue 15 – 18/9, ti Hà Nội srăng mkŏ mjing klei “Rang mdah mnơ̆ng dhơ̆ng čhĭ mnia bruă lŏ hma hŏng ala tač êngao tal 22 – AgroViet 2022” jing leh klei bi êdah ti anôk bi kƀĭn bruă klei mrâo mơ̆ng Anôk bruă mkŏ mjing klei duh mkra mnia mblei bruă lŏ hma, mơ̆ng phŭn bruă lŏ hma mkŏ mjing hrue mbrue (7/9) ti Hà Nội. Tui si Êpul mkŏ mjing, Klei rang mdah mnơ̆ng čhĭ mnia anei srăng mâo giăm 100 êpul êya, phung duh mkra hlăm ala čar, lehanăn mơ̆ng ala tač êngao nao bi mguôp, hŏng 170 knưng mnơ̆ng.

Hlăm anăn mâo truh 28 knưng mnơ̆ng phung duh mkra ala tač êngao, mâo lu mta mnơ̆ng msĕ si mmao, êa hnuê Manuka, prăi olive, êa msăm, mnơ̆ng bi mƀăt, mnơ̆ng pioh yua kơ bruă pla mjing, kdrăp kpĭ boh kroh... Boh nik, leh 2 thŭn găn klei ruă tưp Covid 19 bi mkŏ mjing hŏng hdră online, klei rang mdah mnơ̆ng dhơ̆ng mnia mblei AgroViet 2022 tal anei srăng mâo phung duh mkra hriê mơ̆ng 6 ala čar mâo: Australia, Russia, Japon; China, Thailand, Indonesia./.

Y-Khem pô mblang